ەۋروپا ساۋلەتى مەن ديزاينىنىڭ وزىق ۇلگىلەرى تالدىقورعاندا قولدانىلماق
الماتى وبلىسى اكىمدىگىنىڭ باسپا ءسوز قىزمەتىنەن حابارلاعانداي، گەرمانيانىڭ ديۋسسەلدورف قالاسىندا وتكەن «گەرمانيانىڭ تۇرعىن ءۇي قاتىناسى جانە كوممۋنالدىق شارۋاشىلىق كەشەنى. وزىق تاجىريبە. يننوۆاتسيا» اتتى حالىقارالىق سەمينارعا قاتىسىپ قايتقان تالدىقورعان قالاسىنىڭ اكىمى ەرمەك الپىسوۆ جيىن بارىسىندا پرەزەنتاتسيا جاسادى.
سەمينارعا قاتىسقان تالدىقورعاندىق دەلەگاتسيا ديۋسسەلدورف، بونن، بوحۋم، كيەلن، امستەردام قالالارىندا بولىپ قايتقان ەدى. سول ساپارلارىندا ولار گەرمانيالىق تۇرعىن ءۇي كوممۋنالدىق قىزمەت كەشەنى جۇيەسىنىڭ جۇمىس ەرەكشەلىكتەرىمەن تانىستى، قوقىس وڭدەۋ زاۋىتتارىندا بولىپ، وتباسىلىق ءسۇت فەرمالارىن ارالاپ كوردى. دەلەگاتسيا مۇشەلەرى سولتۇستىك رەين- ۆەستافيليا فەدەرالدى جەرىنىڭ حريستيان- دەموكراتيالىق وداعى باسقارماسىنىڭ باسشىسى گيۋنتەر ديۋسسەلمەن، ەرگەلەنتس قالاسى مەرياسىنىڭ وكىلىمەن، سونداي- اق «VBW GmbH» جانە «ماستەرريند» كومپانيالارىنىڭ وكىلدەرىمەن جۇزدەسكەن.
پرەزەنتاتسيا بارىسىندا قالا اكىمى ە. الپىسوۆ نەمىستەردىڭ تۇرعىن ءۇي قاتىناستارى قىزمەتىندەگى جۇمىس جۇيەسىنىڭ كەيبىر ەلەمەنتتەرىن قولدانا وتىرىپ، وبلىس ورتالىعىندا ينۆەستيتسيا سالۋ نەگىزىندە قوقىس وڭدەيتىن شاعىن زاۋىت تۇرعىزۋدى قانات قاقتى جوبا شەڭبەرىندە قاراستىرۋدى ۇسىندى.
«مىڭ رەت ەستىگەننەن ءبىر رەت كورگەن ارتىق» دەگەن. ەۋروپانى ارالاساڭ كوپ نارسەنى كورىپ، كوڭىلگە تۇيۋگە بولادى. بۇل ساپار ءبارىمىز ءۇشىن پايدالى بولدى دەپ ويلايمىن. دەگەنمەن، ءبىزدىڭ حالقىمىزدىڭ مادەنيەتى مەن مەنتاليتەتىندەگى ەرەكشەلىكتەردى دە ۇمىتپاۋىمىز كەرەك. ەۋروپانىڭ بىزگە ۇلگى بولا الاتىن جاقتارى بار، بىزگە كەرەك ەمەس تۇستارى دا بار. سوندىقتان ءبىز ەڭ ۇزدىك دەگەن، ءبىزدىڭ قالاعا كەلەدى دەگەن ۇلگىلەردى عانا الىپ، قولدانۋىمىز كەرەك»، - دەدى ءوڭىر باسشىسى اماندىق باتالوۆ.
كەزدەسۋ سوڭىندا قالا ساۋلەتشىلەرى وبلىس اكىمىنە وبلىس ورتالىعىن كوركەيتۋگە قاتىستى ەۋروپالىق ساۋلەت پەن ديزاين ەلەمەنتتەرى بار جوبالاردى تانىستىردى.
