قول استىنداعىلاردىڭ جەمقورلىعى ءۇشىن باسشىسى جۇمىستان كەتەدى - ق. قوجامجاروۆ
بۇگىن سەناتتىڭ جالپى وتىرىسىنان كەيىن جۋرناليستەرگە بەرگەن سۇحباتىندا مەملەكەتتىك قىزمەت جانە سىبايلاس جەمقورلىققا قارسى كۇرەس اگەنتتىگىنىڭ ءتوراعاسى قايرات قوجامجاروۆ وسىنداي نورمانىڭ زاڭ ارقىلى بەكىتىلەتىنىن اتاپ ءوتتى.
اگەنتتىك باسشىسىنىڭ سوزىنە قاراعاندا، بۇگىنگى كۇنى مەملەكەتتىك قىزمەتتە ءوتۋ، كوتەرىلۋ تۋرالى ەرەجە بار، بۇل نەگىزىنەن ساياسي مەملەكەتتىك قىزمەتكەرلەرگە قاتىستى.
«اتالعان باعىتتاعى ءبىر تۇزەتۋ 2013 - جىلى ەنگىزىلگەن بولاتىن، وندا ەگەر مەملەكەتتىك ساياسي قىزمەتتەگى باسشىنىڭ قاراماعىنداعى قانداي دا ءبىر قىزمەتكەر سىبايلاس جەمقورلىق قىلمىسى ءۇشىن سوتتالسا، ەگەر ۇكىم زاڭدى كۇشىنە ەنسە، وندا باسشى وتستاۆكاعا كەتۋى كەرەك. بۇندا نەگىزىنەن اڭگىمە سول باسشىنىڭ تاعايىنداۋىمەن نەمەسە ونىڭ كەلىسىمىمەن تاعايىندالعان قىزمەتكەر تۋرالى بولىپ وتىر. وندا مۇنداي وتستاۆكا تۋرالى ءوتىنىش مەملەكەت باسشىسىنا بەرىلەدى جانە ونى پرەزيدەنت ءبىر اي ىشىندە قارايتىن بولادى»، - دەدى قايرات قوجامجاروۆ.
ونىڭ ايتۋىنشا، كەلەر جىلى پارلامەنتكە سىبايلاس جەمقورلىققا قارسى ءىس- قيمىلدى قامتيتىن زاڭ جوباسى كەلىپ تۇسپەك. وندا ەگەر قول استىنداعىلارى سىبايلاس جەمقورلىعى ءۇشىن سوتتالاتىن بولسا، وندا ءبىرىنشى باسشىسى دا جۇمىستان كەتەتىن نورما قامتىلىپ وتىر.
اۆتور: قانات مامەتقازى ۇلى
