قازاقستاندا دەرەكتى فيلم تۇسىرگەن قىتاي رەجيسسەرى ءتۇسىرىلىم توبىن كيىز ۇيدە تۇنەۋگە ماجبۇرلەگەن

قىتايلىق رەجيسسەر ءوزى ءۇشىن قازاقستاندى جاڭا قىرىنان اشقانىن، بۇل ەلگە ساپارىندا ەڭ العاش رەت قازاقتىڭ ۇلتتىق تاعامى - ەت پەن پىسكەن الما جەپ كورگەندىگىن ايتتى.

رەجيسسەر كوشپەندىلىك ءداستۇردى جاقىنىراق سەزىنۋ ءۇشىن ءتۇسىرىلىم توبىن ءبىر ءتۇن كيىز ۇيدە تۇنەۋگە ماجبۇرلەگەن. ونشاقتى ەنتۋزياست شارىن وزەنىنىڭ باۋرايىندا وركەنيەت يگىلىكتەرىنەن الىستا كوشپەندىلىك ءومىردىڭ ىستىق-سۋىعىن سەزىنۋگە تىرىسقان.

«ول جەردە جارىق، سۋ، جىلۋ بولعان جوق. ءتىپتى تاماقتانۋدى ۇمىتىپ كەتكەن كەزدەرى بولدى. ءبىراق تابيعات پەن ادامنىڭ ۇندەستىگى نينوعا ۇلكەن اسەر قالدىردى. ءبىز ەۋروپادان شارشادىق. ول ەشكىمگە تاڭسىق ەمەس، ال ورتالىق ازيادا الەم كورمەگەن جاۋھارلار بار»، - دەدى جوبا ۇيلەستىرۋشىسى جۇلدىز سەيسەنبەكوۆا.

قىتايلىق رەجيسسەر ەلىمىزدە زەرتتەلۋى كەمشىن سوعىپ جاتقان كونە قالالاردىڭ تاريحىنا باسا نازار اۋداردى. ءتۇسىرىلىم توبى ءبىر دە ءبىر جاۋ الا الماعان ساۋران، وتىرار قالالارىندا بولىپ قايتتى.

«اسىرەسە، ۇلى جىبەك جولى بويىنداعى قالالاردىڭ ارحەولوگيالىق بايلىقتارى وتە قىزىقتى. مەنىڭ كەلەسى جۇمىسىم ارحەولوگيالىق باعىتتا بولۋى مۇمكىن»، - دەپ كۇلدى نينو ۆانگ.

سونداي-اق قىتايلىق مامان قازاق كينوسىنىڭ بۇگىنگى دامۋىن وتە جوعارى باعالادى.

«جاقىندا قىتايدا قازاق كينوسىنىڭ اپتالىعى ءوتتى. جەرگىلىكتى سىنشىلار «ليكۆيداتور»، «رەكەتير»، «شال» فيلمدەرىن كورىپ قازاق كينوسىنىڭ دەڭگەيىنە تاڭ قالعان بولاتىن. مەن دە «شال» فيلمىندە باستى ءرولدى سومداعان ەربولات توعىزاقوۆتىڭ كاسىبي اكتەر ەمەس ەكەندىگىنە تاڭ قالدىم. سونداي شىنايى ويناعان»، - دەدى ن. ۆانگ.

China Movie Chanel وكىلدەرىنىڭ ايتۋىنشا، فيلم بەس ەپيزودتان تۇرادى. ءار ءبولىمنىڭ ۇزاقتىعى 20 مينۋتقا سوزىلادى. بۇل بولىمدەر «ەكسپو-2017»، قازاقستان تالعامى، ۇلى جىبەك جولى، قازاقستان حالقى، كادر سىرتىنداعى دۇنيە تاقىرىبىنا ارنالعان. جاڭا تۋىندى قىتاي ەلىنىڭ ورتالىق تەلەارناسىنان 2015-جىلدىڭ ناۋرىزىنان باستاپ كورسەتىلەتىن بولادى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى