استانادا « تۇركى الەمى: تۇلعالار تاعىلىمى» اتتى حالىقارالىق عىلىمي كونفەرەنسيا وتەدى
27-28 - قازان كۇندەرى بەيبىتشىلىك جانە كەلىسىم سارايىندا « تۇركى الەمى: تۇلعالار تاعىلىمى» اتتى حالىقارالىق عىلىمي كونفەرەنسيا وتەدى. شارانى حالىقارالىق تۇركى اكادەمياسى، ل. ن گۋميليەۆ اتىنداعى ەۋرازيا ۇلتتىق ۋنيۆەرسيتەتى جانە وڭتۇستىك قازاقستان وبلىسىنىڭ اكىمدىگى بىرلەسىپ وتكىزەدى، دەپ حابارلايدى حالىقارالىق تۇركى اكادەمياسىنىڭ باسپا ءسوز قىزمەتىنەن.
ەلباسى ن. نازاربايەۆ بىلتىر ءازىربايجاننىڭ گابالا قالاسىندا وتكەن تۇركىتىلدەس مەملەكەتتەردىڭ ىنتىماقتاستىق كەڭەسىنىڭ Ⅲ سامميتىندە تۇركى اكادەمياسىنا تۇركى الەمى تۋرالى حالىقارالىق جيىن وتكىزۋدى جانە بيىل ماۋسىم ايىندا تۇركيانىڭ بودرۋم قالاسىندا بولعان تۇركى كەڭەسىنىڭ IV سامميتىندە تۇركى الەمى ينتەگراتسياسىنىڭ باعدارلاماسىن جاساۋدى جۇكتەگەن بولاتىن. وسى ورايدا ۇيىمداستىرىلعان شارا تۇركى الەمىنىڭ بىرلىگى جولىندا قىزمەت ەتكەن قايراتكەرلەر - اليبەك حۋسەينزادەنىڭ تۋعانىنا 150 جىل، مامەد ەمين راسۋلزادەنىڭ تۋعانىنا 130 جىل، تۇرار رىسقۇلوۆ پەن سۇلتانبەك قوجانوۆتىڭ تۋعانىنا 120 جىل جانە بيىل يۋنەسكو ەسكە الۋ جىلى رەتىندە بەلگىلەگەن يسمايل گاسپرينسكييدىڭ قايتىس بولعانىنا 100 جىل تولۋىنا وراي وتكىزىلۋدە.
القالى جيىنعا قازاقستانمەن قاتار، ءازىربايجان، قىرعىز رەسپۋبليكاسى، تۇركيا، وزبەكستان، رەسەي، ا ق ش، موڭعوليا، جاپونيا جانە ت. ب. ەلدەردىڭ عالىمدارى، قوعام قايراتكەرلەرى، ساياساتكەرلەرى مەن زيالىلارى قاتىسىپ، تۇركى الەمىنە ورتاق تۇلعالار تۋرالى تىڭ دەرەكتەرگە نەگىزدەلگەن باياندامالار جاسايدى.
سونىمەن قاتار، تۇركىگە ورتاق تۇلعالاردىڭ ۇرپاقتارى جيىنعا ارنايى كەلەدى. اتاپ ايتقاندا، « تىلدە، ىستە، پىكىردە - بىرلىك» يدەياسىن ومىرلىك ۇستانىم ەتكەن، تۇگەل تۇركىگە تاراعان « ءتارجىمان» گازەتىن شىعارعان قايراتكەر يسمايل گاسپرينسكيدىڭ شوبەرەسى گۇلنار سەيتۆانيەۆا، مەملەكەت جانە قوعام قايراتكەرى سۇلتانبەك قوجانوۆتىڭ نەمەرەسى سۆەتلانا قوجانوۆا القالى جيىنعا قاتىسىپ، ءسوز سويلەيدى.
مۇنداي كونفەرەنسيانى وتكىزۋدەگى ماقسات - ءيسى تۇركىگە ورتاق، اعارتۋ سالاسىندا وشپەس ءىز قالدىرعان، ازاتتىق ءۇشىن كۇرەسكەن، تۇركى حالىقتارىنىڭ بىرلىگىن بەكەمدەۋ جولىنا ءومىرىن ارناعان تاۋ تۇلعالاردى ۇلىقتاۋ.
