قىتايدىڭ «قۇبىلاي حان» تەلەحيكاياسىنا كىمدەر ءتۇستى؟
ءتۇسىرىلىم الاڭى 30 مىڭ شارشى مەتردى الىپ جاتقان كورىنەدى. وندا بەس جاڭا پاۆيلون سالىنىپ، موڭعول يمپەرياسى مەن سۋن پاتشالىعىنىڭ قامالدارى تۇرعىزىلعان. نەگىزگى كەيىپكەرلەردى سومداۋ ءۇشىن 20 مەملەكەتتەن 600 اكتەر شاقىرىلىپتى.
موڭكە حاننىڭ باس قولباسشىسى سۋكە رولىنە قازاق ازاماتى بەكىتىلگەن. ول - ق ح ر-دىڭ التاي قالاسىندا دۇنيەگە كەلگەن دالەلحان قادىر ەسىمدى قانداسىمىز. جالپى، الەمدىك بەستسەللەرگە قاتىسقان ادام سانى - 5 مىڭ. باستى وبرازداعى ارتيستەردىڭ ءارقايسىسى ۇلكەن ىرىكتەۋدەن ءوتىپ، ءوز مىندەتىن ابىرويمەن الىپ شىققان.
تاريحي تۋىندى ارقىلى تانىمالدىلىعى ارتا تۇسكەن ونەرپازدار ومىرىنە ءۇڭىلىپ كورگەن ەدىك...
قۇبىلاي حان رولىندەگى حۋ جۋن 1968 - جىلى 18 - ناۋرىزدا بەيجىڭدە دۇنيەگە كەلگەن. ۇلتى - ءمانجۇر. اكەسى - باريتون داۋىستى تانىمال وپەرا ءانشىسى باۋ شان حۋ. 1991 - جىلى ق ح ر ورتالىق ونەر اكادەمياسىن بىتىرگەن. كينو جانە تەاتر اكتەرى. 1990 - جىلدان ءارتۇرلى فيلمدەرگە شاقىرىلا باستاعان. يتاليا كينو فەستيۆالىندە «ەڭ ۇزدىك اكتەر» اتالىمىن جەڭىپ العان. قىتايدىڭ «ەڭ تارتىمدى اكتەرى» سىيلىعىنىڭ يەگەرى. مەملەكەتتىك ءبىرىنشى دارەجەلى ارتيست. بويى 1م,85 سم. نەگىزىنەن، درامالىق، تاريحي جانە اتىس-شابىس جانرىنداعى فيلمدەرگە تۇسكەندى ۇناتادى. ايەلى فاڭ لۋ تەاتر ءارتيسى. ءبىر قىزى بار.
چابەن رولىندەگى حاس سۇلۋدىڭ ەسىمى - ۋي شىمان. 1975 - جىلى 25 - مامىردا شياڭگاڭ ومىرگە كەلگەن. ۇلتى - قىتاي. 1997 - جىلى - شياڭگاڭ ارۋى بايقاۋىندا ءۇشىنشى ورىن الىپ، ونەر جولىنا العاش قادام باسادى.
2006 - جىلى «ءتورت قىرلى سامۇرىق» فيلمىندە ءبىر ءوزى ءتورت كەيىپكەردى سومداپ، ازيادا ەڭ ۇزدىك اكتريسا اتاعىن جەڭىپ العان.
سورقاقتاني وبرازىن موڭعوليانىڭ ايگىلى اكتريساسى حاسى گاۋۆا شەبەر سومداعان. ول 1960 -جىلى دۇنيەگە كەلگەن. شاڭحاي ونەر اكادەمياسىنىڭ تۇلەگى. «جىلقىشى»، «شيان شينحاي» فيلمدەرىندە باستى رولدەردە ويناعان.
موڭكە حاننىڭ باس قولباسشىسى سۋكە ءرولىن قانداسىمىز دالەلحان قادىر جوعارى دارەجەدە جەتكىزگەن. ول التاي قالاسىندا ومىرگە كەلىپ، بەيجىڭ ونەر اكادەمياسىن اكتەرلىك ماماندىعى بويىنشا ءتامامداعان. مەملەكەتتىك ءبىرىنشى دارەجەلى ارتيست. ميللياردتاردىڭ ىشىنەن سۋىرىلىپ العا شىعىپ، ءوز تالانتىن مويىنداتقانداردىڭ ءبىرى. «شىڭعىس حان»، «قارلى تاۋدىڭ قاس باتىرلارى»، «كورىكتى مەكەن» سياقتى فيلمدەرگە تۇسكەن.
تولەي رولىندەگى لۋي لياڭۆيدىڭ كىندىك قانى 1956 - جىلى 22 - جەلتوقساندا ۆەتنامدا تامعان. الپىسىنشى جىلدارى شياڭگاڭگا قونىس اۋدارعان. 1980 - جىلى «شاڭحاي تان» فيلمىندەگى ديڭلي رولىمەن كوپشىلىككە تانىلعان. جۇزدەن استام كينوعا تۇسكەن.
موڭكە ءرولىن قىتاي ازاماتى گاۋ فا سومدايدى. ول 1959 - جىلى 29 - ساۋىردە قىتايدىڭ دايان قالاسىندا ومىرگە كەلگەن. ق ح ر ورتالىق ونەر اكادەمياسىن بىتىرگەن. 2002 - جىلى «التىن قانجار» سىيلىعىمەن ماراپاتتالعان.
ارىق بۇعا رولىندەگى اكتەردىڭ اتى-ءجونى - ۋ يە. تۋعان جىلى - 1975، ءساۋىر ايىنىڭ 25 ى. ۇلتى - دۇنگەن. ق ح ر ورتالىق ونەر اكادەمياسىن اكتەرلىك ماماندىعى بويىنشا بىتىرگەن. ۋ-شۋدان سپورت شەبەرى جانە قىتاي چەمپيونى. «شىن-جىن باتىر»، «باتىسقا ساياحات» سىندى فيلمدەرگە تۇسكەن.
تورەگەنە ءرولى تانىمال قىتاي اكتريساسى ساي ۆەنيانعا جۇكتەلگەن. قىتايدىڭ جياڭسۋ ولكەسىندە تۋعان. نانجيڭ اگرارلىق ۋنيۆەرسيتەتىن بىتىرگەن.
فيلمدەگى باستى كەيىپكەرلەردىڭ ءبىرى - قايمىش. بۇل ءرولدى ۋ تيانۋي شىنايى الىپ شىققان. ول 1978 - جىلى 8 قاراشادا مالايزيادا تۋعان. اكتريسا، تەلەجۇرگىزۋشى. 1998 - جىلعى مالايزيا قىتايلارى ارۋى بايقاۋىنىڭ جەڭىمپازى.
رەداكسيادان:
ماتەريال دايىنداۋ بارىسىندا كومەك كورسەتكەنى ءۇشىن - اۋدارماشى التىنبەك ءجۇماشارىپ ۇلى مەن «قازاقستان» تەلەراديوكورپوراتسياسىنىڭ باسپا ءسوز حاتشىسى راۋان ەسقاليعا ۇلكەن راقمەت ايتامىز!
اۆتور: بايداۋلەت قانشايىم
«ايقىن»
