اباي شىعارمالارىن قىتايشا سويلەتكەن كىم؟
اباي تۋىندىلارىن تۇڭعىش رەت حانزۋ تىلىنە ءتارجىمالاعان حاحۋاڭ جاڭ نەمەسە قاباي اقساقالدىڭ ۇلتى - سىبە. 86 دان اسقان قاريا بىرنەشە تىلدە ەركىن سويلەيدى، ويى جاتىق. ءتىپتى ۇلى اقىن اباي تۋرالى تاعى ءبىر كىتاپ جازۋدا ەكەن.
قاباي، اۋدارماشى:
- مەنىڭ ازىرشە ءبىر ويىم بار. ول اباي ولەڭدەرىنىڭ ىشىندەگى ءبىر تاڭدامالى كىتاپتارىن شىعارسام دەيمىن.
ويتكەنى ول جاستايىنان قازاق اقىندارىنىڭ ولەڭىنە ىنتىق. ال ابايعا دەگەن ىقىلاسى ايرىقشا. اقىننىڭ شىعارماسىنا دەگەن شىنايى سەزىم، كەسەك تۋىندىنى كۇردەلى تىلگە اۋدارۋدا كوپ كومەك بولدى.
قاباي، اۋدارماشى:
- ابايدى قازاقتار قانشا وقىسا دا، وقي بەرەدى، جاقسى كورەدى. ەندى ءبىز اۋدارعانىمەن، ابايدىڭ ولەڭدەرىنىڭ ويىن كەلتىرسەك تە، ونى كوركەمدىك جاعىنان جەتكىزدىك دەپ ايتا المايمىز. ءوزىمنىڭ شامام جەتكەنشە اۋداردىم، ەندى كەيىنگى اۋدارماشىلار جاقسى اۋدارسا دەپ ويلايمىن. اباي ولەڭدەرىن قاز قالپىندا قىتايشا جەتكىزۋ وڭاي ەمەس. مىسالى «قانسوناردا بۇركىتشى شىعادى اڭعا» دەگەندى حانزۋشا جەتكىزۋ ءتىپتى قيىن. ويتكەنى قىتايلار قازاقتار سياقتى اڭعا شىعىپ، بۇركىت سالماعان. ابايدىڭ اۋدارماسىن جالپى بىرەۋ ەمەس، كوپ ادام اۋدارسا، جاقسى بولادى.
دەگەنمەن، اباي سالعان ءسوز ونەرىنىڭ سارا جولىنا عاشىق بولعان قاباي مۇحتار اۋەزوۆتىڭ «اباي جولىن» دا اۋدارىپ باستىرعان. قاباي اقساقالدىڭ «قازاق اقىندارى» اتتى قىتاي تىلىندەگى كىتابى دا بار. مۇندا ايتىس ونەرىنىڭ تەك بىزگە عانا ءتان ەكەنى جازىلعان جانە بۇحار جىراۋدىڭ، جىر الىبى جامبىل مەن ايكۇمىستىڭ، ءبىرجان سال مەن سارانىڭ ايتىستارى اۋدارىلعان. ەڭ باستىسى، اباي شىعارمالارىن ميللياردتىڭ تىلىندە تۇڭعىش رەت سويلەتكەن - قاباي.
اۆتورلارى: نۇربەك بەكەن، جاڭ ءسۇي
