بريتاندىق كولىكتەر قىتايدا شىعا باستادى
سالتاناتتى جيىندا قىتايدا جاسالعان تۇڭعىش Jaguar Land Rover كولىگىنىڭ تانىستىرىلىمى بولدى. بۇل كولىك الداعى قاراشادا گۋانجۋدا وتەتىن 12- حالىقارالىق اۆتوموبيل كورمەسىنە شىعارىلادى.
ايتا كەتەيىك، بريتاندىق برەندتىڭ تاريحىندا بۇل كولىك - شەتەلدە تولىق قۇراستىرىلىپ تۇرعان ءبىرىنشى نۇسقا. بۇعان قىتايدا JLR- ءدىڭ ءوتىمدى بولا باستاۋى ىقپال ەتتى. ماسەلەن، 2013-جىلى كومپانيا قىتايدا 95 مىڭ كولىگىن ساتسا، 2014-جىلدىڭ تەك، 9 ايىندا 92 مىڭ ماشينانى ساتقان. مۇنىمەن، جىل سايىنعى ساتۋ كولەمى 30-38 پايىزعا ارتىپ وتىرعانىن كورسەتتى.
Chery Jaguar Land Rover Automotive Co بىرلەسكەن كاسىپورنى باسشىلارىنىڭ مالىمدەۋىنشە، زاۋىت جىل سايىن قىتايدا ءارتۇرلى مودەلدەگى كولىكتىڭ شامامەن 130 مىڭىن جاساۋدى جوسپارلاپ وتىر.
ەسكە سالا كەتەيىك، قازىرگى ۋاقىتتا نەمىس برەندتەرى: Audi, BMW جانە Mercedes-Benz قىتاي نارىعىنداعى پرەميۋم كلاسىنداعى كولىكتەر كوشىن باستاپ كەلەدى. ولاردان كەيىن JLR مەن Volvo تۇر.
