قازاق ۇشقىشتارىنىڭ ۇياسى تابىلدى
اۆياتسيالىق وتىندى رەسەيدەن الاتىنىمىز، جەردىڭ الىستىعى، ۇشقىشتىڭ تاپشىلىعى، بيلەتتىڭ قىمباتتىعى، ىشكى باعىتتىڭ ازدىعى - جازا بەرەيىن بە، تەك.. . ءسىز وقۋدان جالىعىپ كەتەسىز.
ءبىراق، بۇل باعىتتا كۇز بولسا دا، سەڭ قوزعالىپ جاتقانىن (كۇزدىڭ نە قاتىسى بار دەسەي، سەبەبى Ab-Initio 2009 -جىلدان بەرى باستالدى) يسپانياعا بارعان ساپارىمىزدا ءبىلىپ قايتتىق. Ab-Initio باعدارلاماسىن ۇلتتىق اۋە تاسىمالداۋشى - «ەير استانا» كومپانياسىنىڭ شەڭبەرىندە «بولاشاق» شاكىرتاقىسىنىڭ بالاماسى دەسە بولادى.
قالاي- قالاي؟ Ab-Initio باعدارلاماسىنا سايكەس، ءالى اۆياتسيانىڭ ءالىپىن تاياق دەپ بىلمەيتىن تالاي وسكىننىڭ وقۋىن «ەير استانا» ءوز موينىنا الادى. ايتپاقشى، 11000 مەتر بيىكتىكتە جىبەرە سالماس بۇرىن تالاپتىلاردىڭ دەنساۋلىعىن تەكسەرىپ، اعىلشىن تىلىنە قاراپ، لوگيكاسى مەن ماتەماتيكاسىن سىنايدى. وقۋ دەگەندە، ەندى سودان ىرىكتەلگەندەرى ا ق ش- تا، يرلانديادا نەمەسە يسپانيادا 15 ايلىق تەوريالىق- پراكتيكالىق كۋرستاردان وتەدى.
وقۋ بىتەدى. ەندى تۇلەكتەر ءسال-پالدەن سوڭ «ەير استانانىڭ» ەكىنشى ۇشقىشى رەتىندە ىشكى باعىتتارعا ۇشا باستايدى. شارت بويىنشا جاس ۇشقىش وقۋ قارجىسىنىڭ 50 پايىزىن 7 جىلدىڭ ىشىندە كومپانياعا قايتارۋى ءتيىس. قىسقاسى، وقۋ تەگىن دەۋگە بولادى، جۇمىس تابىلىپ تۇر، جالاقى كەلىپ تۇر - راحات ەمەس پە؟
Ab-Initio وسىلايشا كەلىمسەك لەگيونەردىڭ قولىنا قاراپ قالماي، ءوز ۇشقىشىمىزدى باپتاپ، باسىن سيپاۋعا جول اشتى. وسى باعدارلامامەن بۇگىنگە دەيىن 142 كادەت الەمنىڭ ءۇش ەلىندە وقۋىن اياقتاسا، 25- ءىءبىلىمىن جالعاستىرىپ جاتىر. ال «ەير استانانىڭ» مۇنىمەن توقتاماي، جىلىنا 25-30 جاستى وقۋعا جەتەكتەپ اپاراتىن جوسپارى بار.
ەندى ءبىزدىڭ يسپانيانىڭ وڭتۇستىگىندەگى حەرەس- دە- لا- فرونتەرا قالاسىنا نە ءۇشىن بارعانىمىز تۇسىنىكتىرەك بولعان شىعار. وسى قالانىڭ ىرگەسىندە ورنالاسقانىمەن، ەۋروپاداعى ەڭ بەدەلدى وقۋ ورىندارىنىڭ بىرىنەن سانالاتىن Flight Training Europe ۇشقىشتار مەكتەبىن 6 ستۋدەنتىمىز ءبىتىرىپ شىقتى. ولار - تەمىرلان قادىروۆ، مۇحامەدجان مۇستافين، التىنبەك زەينەلوۆ، ءۋاليحان يسابايەۆ، ارتەم كۋداشيەۆ جانە ناتاليا لينچەنكو.
ءارقايسىسىنىڭ اۆياتسياعا كەلۋ اڭگىمەسى دە قىزىق. مىسالى، مۇحامەدجان مۇستافيننىڭ اكەسى بەرىك 30 -جىلدان بەرى ۇشقىش بولسا، ۇلكەن اعاسى دا «ەير استانانىڭ» ۇشقىشى. قىسقاسى، مۇحامەدجاندا باسقا تاڭداۋ بولماعان عوي) التىنبەك زەينەلوۆ بولسا، استانادا مەكتەپ وقىپ ءجۇرىپ، اەروكلۋبتىڭ ساباعىنان قالماپتى. بالا كەزىنەن كوك اسپاندا قۇسشا قالىقتاپ ءجۇرۋدى ارمانداسا، ەندى ءبىر- ەكى ايدا سوعان شىنىمەن قول جەتكىزبەك.
ناتاليا لينچەنكونىڭ اكەسى الماتى اەروكلۋبىن ءبىرتالاي جىل باسقارعان. الايدا، ناتاليا زاڭگەردىڭ ديپلومىن الىپ، ەڭبەك جولىن باسقا سالادا باستاپ كورمەكشى بولادى. ءبىر كۇنى قاراسا، ۇشاقتا ستيۋاردەسسا بولىپ ءجۇر.. وسى قىزمەتتە بىرنەشە جىل جۇرگەن سوڭ، اقىرى تاۋەكەل دەپ حەرەستىڭ مەكتەبىنەن ءبىر- اق شىعادى. الداعى ۋاقىتتا ءسىز ۇشاققا وتىرعاندا «سالەمەتسىزدەر، بۇل ۇشاق كومانديرى ناتاليا لينچەنكو» دەپ تۇرسا، دىم دا تاڭ قالماڭىز.. .
بلوگەر دەپ ەركەلەتىپ ەرتىپ اپارعان سوڭ، حەرەس ۇشقىشتار مەكتەبىنىڭ جاعدايىن وزىمىزشە باعامداپ تاستاعانبىز عوي الگى جەردە. تاريحى: ءوزى Flight Training Europe مەكتەبى دەگەنىمىز، تۇبىندە شوتلانديانىڭ پرەستۋيگىندەگى بريتان اەروعارىش- ۇشۋ كوللەدجى. 1999 - جىلى وسى كوللەدجدى شوتلانديادان يسپانياعا كوشىرەدى دە، 2003 - جىلدان باستاپ اتى FTE Jerez بوپ وزگەرەدى. ورنالاسقان جەرى: يسپانيانىڭ وڭتۇستىگى، قار تۇسپەيدى، كليماتى جۇمساق، جىلدىڭ 300 كۇنىندە ۇشۋعا قولايلى اۋا- رايى، حالىقارالىق اۋەجاي.
وقۋ باعدارلاماسى: 800 ساعات - اۋديتوريادا 150 ساعات - ۇشاقتا، 56 ساعات - سيمۋلياتوردا. كامپۋسى كۋرورتتان كەم ەمەس. قازىر وقىپ جاتقان 160 ستۋدەنت ساباقتان تىس كەزىندە باسسەينىنە شومىلىپ، ۆولەيبولىن ويناپ، كلۋبىندا دەمالا الادى. تەحنيكالىق جاراعى: 2 موتورلى Diamond-تىڭ 5 ۇشاعى جانە 1 موتورلى Piper Warrior- دىڭ 20 ۇشاعى بار. وسى وقۋ- جاتتىعۋ ۇشاقتارىنان بولەك ولاردىڭ جەردەگى سيمۋلياتورلارى بارىن دا ايتا كەتەيىك. ءبىراق، بۇل مەكتەپتىڭ باستى ماقتانىشى، ارينە الىپ Boeing-737-800W ۇشاعىنىڭ سيمۋلياتورى. كادىمگى اۋە كەمەسىنىڭ اينا- قاتەسىز كوشىرمەسى. بۇل كابيناعا ءبىر كىرگەن سوڭ، شىققىڭ كەلمەيدى. قۋسا دا، تەنتەك بۇزاۋ سەكىلدى وسى ماڭدى اينالىپ جۇرەسىڭ دە قوياسىڭ....
وقۋ ورداسىندا اۆياتسيا سالاسىنىڭ ەڭ ۇزدىك ماماندارى ءدارىس بەرەتىنىن ەندى ايتپاسا دا تۇسىنىكتى شىعار (2 ايەل مۇعالىم بارىن ايتۋ ماڭىزدى ما، ماڭىزدى ەمەس پە؟ ) . مەكتەپ جايلى وسىمەن ءتامام. ايتپاقشى، 6 ستۋدەنتىمىزدىڭ وقۋ ورنىن ءتامام قىلۋىنا «ەير استانا» باسشىسى پيتەر فوستەردىڭ ءوزى ارنايى كەلىپ، جاس ۇشقىشتاردى الەمدىك ستاندارتقا ساي سەرتيفيكات جانە توسبەلگىسىمەن ماراپاتتادى.
سالتاناتتى كەشتە FTE Jەrez مەكتەبىنىڭ ديرەكتورى وسكار سوردو، «ەير استانانىڭ» ۇشۋ قۇرامىن وقىتۋ جونىندەگى ديرەكتورى فيليپپوس سياككاس، «ەير استانانىڭ» وندىرىستىك ماسەلەلەر بويىنشا ۆيتسە- پرەزيدەنتى ەنتوني رەگان جانە Boeing 767/757 ۇشاعىنىڭ كومانديرى تيمۋر ماشۋروۆ تا قاتىسىپ، كادەتتەردى قۇتتىقتاپ جاتتى ايتەۋىر.
وسىلايشا، الەمنىڭ اۋزىمەن قۇس ىلگەن Emirates, British Airways, Qatar Airways, Loganair سەكىلدى ونشاقتى اۋە كومپانيالارىنىڭ ۇشقىشتارىن دايارلاپ جۇرگەن حەرەس مەكتەبى ءبىزدىڭ «ەير استانا» پيلوتتارى ءۇشىن دە ۇياعا اينالىپتى. قازاق اۆياتسياسىنىڭ كەلەشەگى بار ەكەنىنە كوزىمدى جەتكىزىپ قايتتىم.
«ەير- انىقتاما» :
بۇگىندە «ەير استانانىڭ» پاركىندە 30 ۇشاق بار بولسا، سونىڭ 14- ءى - جاڭا، نەبارى 18 ايدىڭ ىشىندە الىنعان. 2016-2018 - جىلدار ارالىعىندا تاعى 9 ۇشاقتى ساتىپ الۋ قاراستىرىلعان. قازىر كومپانيا 45 باعىتپەن اۋە قاتىناسىن ورناتقان. وسى رەتتە ساپارىمىزدى ۇيىمداستىرعان «ەير استانا» اۋە كومپانياسىنىڭ جۇرتشىلىقپەن بايلانىس ءبولىمىنىڭ ۆيتسە- پرەزيدەنتى بەللا تورمىشيەۆاعا، PR- مەنەدجەرلەر تىلەك ءابدىراحيموۆ پەن ساۋلە سەرعازينوۆاعا راحمەتتەن باسقا ايتارىمىز جوق.
وركەن كەنجەبەك
jaqsy.kz
