سەنات وتىرىسىندا قازاقستان مەن رەسەيدىڭ تاتۋ كورشىلىگى جانە وداقتاستىعى تۋرالى شارت تالقىلاندى

اتالعان شارتقا بىلتىرعى جىلدىڭ قاراشاسىندا ەكاتەرينبۋرگ قالاسىندا قول قويىلعان. شارتتىڭ ماقساتى قازاقستان مەن رەسەيدىڭ ستراتەگيالىق ارىپتەستىگىن، ساياسي، ساۋدا-ەكونوميكالىق، عىلىمي-تەحنيكالىق، ەنەرگەتيكا، ترانزيت، ەكولوگيالىق، گۋمانيتارلىق، مادەني جانە باسقا دا سالالارداعى ىنتىماقتاستىقتى دامىتۋ بولىپ تابىلادى.

«قازاقستان رەسەيدى ەۋرازيالىق كەڭىستىكتەگى ماڭىزدى ساياسي جانە ەكونوميكالىق ارىپتەس رەتىندە قاراستىرادى. رەسەيمەن كوپجاقتى جوسپارلى قاتىناستاردى دامىتۋ ەلىمىزدىڭ ستراتەگيالىق مۇددەلەرىنە ساي كەلەدى. بۇل رەتتە شارت رەسەيمەن نەگىز قۇراۋشى قۇجاتتىڭ ءبىرى بولىپ تابىلادى، وندا ەكىجاقتى ىنتىماقتاستىقتىڭ بازالىق پرينتسيپتەرى كورسەتىلگەن»، - دەدى ق ر سىرتقى ىستەر ءمينيسترىنىڭ ورىنباسارى اسقار مۋسينوۆ.

ونىڭ ايتۋىنشا، قۇجات ايماقتاعى بەيبىتشىلىك پەن قاۋىپسىزدىكتى نىعايتۋ ماقساتىندا وزەكتى حالىقارالىق ماسەلەلەر بويىنشا ەكىجاقتى ساياسي ديالوگتى دامىتۋعا قىزمەت ەتىپ، ساۋدا، ەكونوميكالىق قاتىناستاردىڭ دامۋىنا ءوز ىقپالىن تيگىزەدى.

شارتقا سايكەس، تاراپتار كەلىسىلگەن سىرتقى ساياساتتى جۇرگىزەدى، ەۋرازيالىق كەڭىستىك پەن بۇكىل الەمدە بەيبىتشىلىكتى نىعايتۋ، تۇراقتىلىق پەن قاۋىپسىزدىكتى ارتتىرۋ ىسىندە تىعىز ءوزارا ءىس-قيمىل جاسايدى.

اتالعان زاڭ جوباسى سەناتتىڭ جالپى وتىرىسىندا تالقىلاۋعا شىعارىلادى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى