مۇعالىم ماماندىعى تۋرالى شىعارما
ومىردە ماماندىقتىڭ ءتۇرى كوپ. ءار ماماندىقتىڭ وزىندىك ەرەكشەلىگى بار. دارىگەر ادامداردى ەمدەسە، مۇعالىم ولاردى وقىتادى، ءانشى ءان ايتادى، قۇرىلىسشى ءۇي سالسا، تىگىنشى كيىم تىگەدى. تاعى باسقا دا ماماندىقتار تۋرالى ايتا بەرۋگە بولادى.
ادامدار ماماندىقتى جۇرەگىنىڭ قالاۋى بويىنشا تاڭداۋى كەرەك. ويتكەنى، ءاربىر ادامنىڭ بولاشاعى تاڭداعان ماماندىعىنا تىكەلەي بايلانىستى. ءوز ءىسىن جاقسى كورىپ، ۇلكەن جاۋاپكەرشىلىكپەن اتقارعاندا عانا ادام ءوزىن باقىتتى سەزىنەدى ەكەن.
جاس ۇرپاقتى ءبىلىم نارىمەن سۋسىنداتار، شاكىرت جۇرەگىنە گۇل ەگەر، بالا جانىنىڭ باعبانى اياۋلى ۇستازدار ەمەس پە؟ ءيا، عىلىم يەسى عالىم دا، ەل قورعاعان باتىر دا، تىلىنەن بال تامعان اقىندار دا، تەگەۋرىنە تەمىر بالقىتقان جۇمىسشى دا، ەگىن ەككەن ديحان دا، مال باعىپ تەرىن توككەن شوپان دا ءبارى-ءبارى ۇستازدان ءبىلىم العان. سوندىقتان ۇلاعاتتى ۇستازدارعا بۇكىل ادام بالاسى قۇرمەتپەن باس يەدى.
ۇستاز - تاۋدان ارقىراي اققان تاۋ وزەنى سەكىلدى، اينالاسىنا قۋات بەرىپ، جولىندا كەزدەسكەندەردى سۋىمەن نارلەندىرىپ، تاۋداي قيىندىقتاردى تاستاي دومالاتىپ، ءبىلىمنىڭ سار دالاسىندا تىنىشتىق تاۋىپ، دامىلدايدى. ۇستاز - جەر دەگەن الەمنىڭ بەتىن كوركەيتكەن، شاكىرتتەرىنە شۋاق توككەن كۇن- انا. ۇستاز - اقىلدىڭ توزبايتۇعىن اسىلى. قاسيەتتى ماماندىق يەلەرىنىڭ ىشىندەگى جاۋھارى. وزگە ماماندىق اتاۋلىلارى وزدەرىنىڭ ءتۇر-سيپاتىن مىڭ قۇبىلتىپ جاتسا دا، ەش وزگەرىسسىز سول ءباز باياعى قالپىندا جاس ۇرپاققا ادامگەرشىلىك قاسيەتتەردىڭ ءدانىن ەككەن ديقانشى.
مەنىڭ ماماندىعىم - مۇعالىم. قيىندىعى مەن قىزىعى مول وسى ماماندىقتى بالا كۇنىمنەن ارماندادىم. ادام بالاسىنا كومەكتەسۋ - يگىلىكتى ىستەردىڭ باستاماسى.
2011-جىلى الماتى قالاسىنداعى 1№ مەكتەپ-گيمنازياعا قازاق ءتىلى مەن ادەبيەت ءپان مۇعالىمى بولىپ جۇمىسقا ورنالاستىم. ەڭ العاش «ۇستاز» دەگەن اتاققا يە بولۋىم دا وسى مەكتەپتەن باستالدى. بۇل مەكتەپ وقۋشىلارى مەنىڭ ارماندارىمنىڭ جۇزەگە اسۋىنا ءوز ۇلەستەرىن قوستى.
«بالا جۇرەگى- كىشكەنتاي كۇي ساندىق. سول ساندىقتىڭ كىلتىن تاپساڭ عانا اشىلادى. مۇعالىمنىڭ قولىندا ءار كەزدە سول كىلت تۇرۋ كەرەك» - دەپ، م. شاحانوۆ اعامىز ايتقانداي، ءار بالانىڭ جۇرەگىنە جول تابۋ، بالا بويىنداعى دارىندى اشۋ مۇعالىمنىڭ ەڭ باستى مىندەتى دەپ ويلايمىن.
كۇندەلىكتى تاڭەرتەڭ مەكتەپ اۋلاسىنا جاقىنداعاندا، بالالاردىڭ سىڭعىرلاي كۇلگەن داۋىستارى مەنى قۋانىشقا بولەيدى. مەكتەپكە كىرگەننەن-اق، ءوزىمدى مازالاعان سان ءتۇرلى ويلاردان ارىلىپ، وقۋشىلارىمنىڭ ءتاتتى قىلىقتارىمەن ادەمى جۇزدەرىنەن شاتتانامىن. «بالاسىز ءۇي مازار، بالالى ءۇي بازار» - دەپ اتا-بابالارىمىز بەكەر ايتپاسا كەرەك. بالالاردىڭ ءار كۇنى ءبىزدىڭ كوز الدىمىزدا ءوتىپ جاتىر.
الدىمىزعا كەلگەن بالالار - بىرەۋدىڭ ماڭداي الدى جارىعى، ەندى ءبىرى - جار دەگەندە جالعىزى، ءبىرى - ەركە، ءبىرى - قوي اۋزىنان ءشوپ الماس مومىنى. ماڭداي الدى جارىعىن تاڭشولپانداي جارقىراتىپ، جار دەگەندە جالعىزدى كوپشىلدىككە ۇيرەتىپ، قوي اۋزىنان ءشوپ الماستى ورتادا جارقىلداپ سويلەر شەشەن قىلىپ تاربيەلەۋ ءۇشىن قاجىماس قايرات پەن باتىرلىق قاجەت.
مەكتەپ - بالالاردىڭ ەكىنشى ءۇيى بولسا، ال ۇستازدار ەكىنشى اناسى دەسەك تە ارتىق ەتپەيدى. ءار ءۇيدىڭ ەركەلەرىن ءبىر ارناعا توعىستىرىپ، ولارمەن جۇمىس جاساۋ وڭايعا سوقپايدى. الايدا بالانىڭ ءتىلىن تاۋىپ، تىلدەسۋ، جاقسى تاربيە بەرۋدىڭ ءوزى ءبىر ۇلكەن عانيبەت. اق پاراق بەتىنە سىزۋ سىزعانداي بالانىڭ كىرشىكسىز ساناسىنا العاشقى ادامگەرشىلىك، مەيىرىمدىلىك نۇرىن سەۋىپ، ءبىلىم، ونەر نارىمەن سۋسىنداتۋ مىنا ءبىز مۇعالىمدەردىڭ ەنشىسىندە.
سوزدەن جىر كەستەسىن ورگەن عافۋ قايىربەكوۆ ۇستاز دەگەن ءسوزدىڭ انىقتاماسىن ءدال بەرگەن.
ۇستاز بولۋ - سەزىمنىڭ اقىندىعى،
ۇستاز بولۋ - جۇرەكتىڭ باتىرلىعى.
ۇستاز بولۋ - مىنەزدىڭ كۇن شۋاعى،
ازبايتۇعىن ادامنىڭ اسىلدىعى.
وسى ءتورت قاسيەت ءار ۇستازدىڭ بويىنان تابىلۋى قاجەت. سەبەبى مۇعالىم قاي ساباقتا بولماسىن وقۋشىسىن ەركىندىككە باۋليدى. سوندىقتان دا ۇستازدىڭ مىندەتى تالاپ پەن ەڭبەكتى وقۋشىدان تالاپ ەتە وتىرىپ، ءبىلىمنىڭ تەڭىزىنەن مارجان تەرگىزۋ. وقۋشى ساباعىڭنان ەشقاشان جالىقپاۋ كەرەك.
ۇستاز - قاراتاۋدىڭ قويناۋىنداي تەرەڭدە جاتقان كەندى اشىپ، ءبىلىم مەن عىلىمنىڭ جەمىسىنىڭ ءدامىن تاتتىراتىن، ارمانسىزعا ارمان ۇيالاتىپ، قاناتسىزعا دارىن قاناتىن بىتىرەتىن عاجايىپ كۇش يەسى. مەنىڭ ماماندىعىم الەمدەگى ەڭ قاجەت ماماندىقتاردىڭ ءبىرى. سوندىقتان ماماندىعىمدى ماقتان تۇتامىن.
ناۋشابەكوۆا ك. م.
1№ مەكتەپ-گيمنازيانىڭ قازاق ءتىلى مەن ادەبيەتى ءپانىنىڭ ءمۇعالىمى
الماتى قالاسى
massaget.kz
