مەسسي باپكەر شەشىمىن قۇلاعىنا ىلمەدى

 ليونەل مەسسي ءبىر دوپتى ەنشىسىنە جازىپ، لا- ليگا تاريحىنداعى ەڭ ۇزدىك سۇرمەرگەن اتاعىنا قول جەتكىزۋگە جاقىنداي ءتۇستى. «كامپ نوۋدا» وتكەن كەزدەسۋ 3:0 ناتيجەسىمەن الاڭ يەلەرىنىڭ پايداسىنا شەشىلدى. حاۆي مەن نەيمار ءبىر- ءبىر گولدان سوقسا، ارگەنتينالىق سۇرمەرگەن يسپانيا بىرىنشىلىگىندەگى 250-گولىن سوقتى. ەندى ەكى گول سوقسا، ايگىلى تەلمو ساررا رەكوردىنىڭ مۇرتىن بۇزاتىن بولادى. الداعى «رەالمەن» وتەتىن ويىندا بۇل جەتىستىگىن باعىندىرار بولسا، «بلاۋگرانا» جانكۇيەرلەرى ءۇشىن ۇلكەن قۋانىش بولارى ءسوزسىز.

 ال كوماندا مەن قاقپاشى كلاۋديو براۆونىڭ گول سوقتىرماي كەلە جاتقان ويىندارىنا ءالى نۇكتە قويىلا قويعان جوق. بالكىم، مادريدتىك كلۋب قوناقتاردىڭ رەكوردىن جالعاستىرۋىنا مۇمكىندىك بەرمەس. «ەيبارمەن» وتكەن ويىندا «بارسەلونا» باس باپكەرى لۋيس ەنريكە 76 مينۋتتا ليونەل مەسسيدى اۋىستىرماق بولعان. الايدا شابۋىلشى ءوز قارسىلىعىن ءبىلدىرىپ، باپكەر شەشىمىن ەلەمەگەن. ناتيجەسىندە مۋنير ەل- حاددادي نەيماردىڭ ورنىنا الاڭعا شىققان. بۇل كورىنىس قازىرگى تاڭدا اقپارات قۇرالدارىندا قىزۋ تالقىلانىپ جاتىر. VIII تۋر قورىتىندىسىندا يسپانيا بىرىنشىلىگىنىڭ كوشىن 22 ۇپايمەن «بارسەلونا» باستاپ كەلەدى. ەكىنشى ورىندا 19 ۇپايمەن «سيەۆيليا» تۇرسا، ولاردان ءبىر ۇپايى كەم «رەال» ۇشتىكتى قورىتىندىلاپ تۇر. ال ۇزدىك سۇرمەرگەندەر كوشىنىڭ تىزگىنى كريشتيانۋ رونالدۋدا. پورتۋگالدىق ويىنشىنىڭ ەنشىسىندە 15 گول بار.

 اقپارات كوزى: massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى