تۇرمەدەگىلەر اسكەري كيىم ۇلگىلەرىن تىگە باستايدى
بۇگىن ماجىلىستە قىلمىستىق-اتقارۋ جۇيەسىندەگى ماسەلەلەرگە ارنالعان ۇكىمەت ساعاتىندا ق ر ىشكى ىستەر ءمينيسترى قالمۇحانبەت قاسىموۆ وسىلاي ءمالىم ەتتى.
ءمينيستردىڭ ايتۋىنشا، ەلىمىزدىڭ تۇزەۋ مەكەمەلەرىندە جىل سايىن 12 ميلليارد تەڭگەنىڭ ونىمدەرى شىعارىلادى. بۇلاردىڭ سەكسەن پايىزى تۇزەۋ مەكەمەلەرىنىڭ وزىندىك قاجەتتىلىكتەرىن وتەۋگە جولدانادى.
«تۇزەۋ مەكەمەلەرى كاسىپورىندارىنىڭ الەۋەتى كوپ ەمەس. سوندىقتان دا، ءبىز كاسىپورىنداردىڭ تەحنيكالىق قۋاتىن ارتتىرۋعا، ولاردى جاڭعىرتۋعا قاتىستى جۇمىستاردى اتقارىپ جاتىرمىز. وسىعان وراي، باسەكەلەستىكتى ارتتىرۋ ماڭىزدى. بۇل باعىتتا ۇكىمەت جاقىندا عانا تۇزەۋ مەكەمەلەرىندەگى كاسىپورىنداردىڭ تازا تابىستارىن سالىقتان بوساتۋ تۋرالى شەشىم قابىلدادى»، دەدى ق. قاسىموۆ.
بۇدان بولەك، جاڭا جىلدان باستاپ قىلمىستىق اتقارۋ جۇيەسىنىڭ كاسىپورىندارى تاۋارلار، قىزمەتتەر مەن جۇمىستار بويىنشا مەملەكەتتىك ساتىپ الۋلار تۋرالى زاڭدى قولدانباستان كەلىسىم شارتتار جاساي الادى. بۇنداي تاجىريبە رەسەي مەن بەلارۋس ەلدەرىندە بار كورىنەدى.
«بۇل دا جەتكىلىكسىز. سوندىقتان دا، قازىرگى كۇنى قىلمىستىق اتقارۋ جۇيەسىندەگى كاسىپورىندارعا مەملەكەتتىك قورعانىس تاپسىرىستارىن ورىنداۋ ماسەلەسى قاراستىرىلۋدا. اتاپ ايتقاندا، اسكەري كيىم فورمالارىن، قورعانىس كۇشتەرىنىڭ ايىرما بەلگىلەرىن، باسقا دا اسكەري قۇرىلىمداردىڭ كيىم ۇلگىلەرىن شىعارۋدى جوسپارلاماقپىز. مۇنداي شارالار كەشەنى قىلمىستىق اتقارۋ جۇيەسى كاسىپورىندارىنىڭ قىزمەتىن قامتىپ، سوتتالۋشىلاردى جۇمىسپەن قامتۋعا سەپتىگىن تيگىزەر ەدى»، دەدى ق. قاسىموۆ.
اۆتور: قانات مامەتقازى ۇلى
