قازاقستانداعى ەڭ تانىمال كەلىن كىم؟
عالامتوردا ءسابينا ەسىمدى كەلىن جايىندا تۇسىرىلگەن ءفيلمنىڭ رەسمي ترەيلەرى كورسەتىلدى. بۇل تۋرالى Tengrinews.kz تىلشىسىنە وسى فيلمدە باستى ءرولدى سومداعان، ءارى فيلم رەجيسسەرى نۇرتاس ادامبايەۆ ايتىپ بەردى.
ول فيلمدە اۋىلعا ەركىنەن تىس الىپ قاشىپ كەتكەن قازاقستانداعى ەڭ تانىمال كەلىن ءسابينا قارسىبايەۆانىڭ باسىنان وتكەن وقيعالار باياندالادى. «فيلم پرەمەراسى 27 - قاراشاعا جوسپارلانىپ وتىر. ءسابينا تۋرالى جالپى العاندا ءارى جەڭىل، ءارى جاعىمدى، ءارى كۇلكىلى وتباسىلىق كومەديا بولىپ شىقتى. ول فيلمدە ءبىز باستى رولدەگى كەيىپكەردىڭ تىعىرىقتان قالاي شىقپاق بولعانىن كورسەتۋگە تىرىستىق. سول ارقىلى ءبىز ەلىمىزدەگى بارشا كەلىندەردىڭ باسىندا بار ماسەلەلەردى كورسەتۋدى الدىمىزعا ماقسات ەتىپ قويدىق. مەنىم ويىمشا بۇل فيلم وسى جىلدىڭ ەڭ ءساتتى جوباسى بولادى»، - دەدى اكتەر نۇرتاس ادامبايەۆ.
