وتانشىلدىق سەزىمدى وياتادى - ا. سابىروۆ، اتىراۋ مەملەكەتتىك ۋنيۆەرسيتەتىنىڭ دوتسەنتى
ول - جاستاردىڭ اراسىندا وتانشىلدىق سەزىمدى وياتۋعا اتسالىسۋ.
جانە وسىناۋ ۇلى ماقساتتى كوزدەگەن ساپاردى جاستاردىڭ ۇيىمداستىرۋىنان ەلىمىزدە وتانشىل رۋحتاعى بۋىننىڭ ءوسىپ كەلە جاتقانى بايقالادى، - دەيدى ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ دوتسەنتى ايدار سابىروۆ.
عالىم پىكىرى «ەگەمەن قازاقستان» گازەتىنىڭ بۇگىنگى سانىندا «وتانشىلدىق سەزىمدى وياتادى» دەگەن تاقىرىپپەن بەرىلىپ وتىر.
«بۇل شارانىڭ، اسىرەسە، قازىرگى جاس ۇرپاقتىڭ باتىسشىل داڭعىرلاعان مۋزىكاسىمەن اۋەستەنىپ، ينتەرنەت جەلىسىنە تاڭىلىپ وتىرعان ساتىندە ماڭىزى مەن ءمانى ايرىقشا ارتا تۇسەدى. ۇركەردەي جالىنداعان توپتىڭ ەلدىڭ، جەردىڭ تاريحى مەن ادەبيەتىن، مادەنيەتى مەن ونەرىن ناسيحاتتاعان ىزگى ءىسى كەز كەلگەن جاستى ەلەڭ ەتكىزەرى، وتانشىلدىق سەزىمىن وياتارى داۋسىز. ويتكەنى، اۆتوەكسپەديتسيا قۇرامىنداعى ەتنوگرافتار ەلىمىزدىڭ ءار وڭىرىندەگى تاريحي قۇندى ەسكەرتكىشتەردىڭ وزىندىك ەرەكشەلىگى بارىنا نازار اۋدارىپ كەلەدى.
ءوزىنىڭ كىندىك قانى تامعان جەرىن عانا ەمەس، تۇتاستاي ەلدى سۇيۋگە، وتاندى سۇيۋگە ۇندەيتىن مۇنداي شارالار ءبىر رەتتىك بولىپ قالماۋى قاجەت.
ەندى الداعى جىلدارى التاي وڭىرىنەن باستالىپ، كاسپي جاعالاۋىنا دەيىنگى ارالىقتى ءجۇرىپ وتەتىن ەكسپەديتسيانى باسقاشا ۇيىمداستىرۋدىڭ قاجەتتىگى سۇرانىپ تۇرعانداي. بالكىم، ءبىر ءوڭىردىڭ جاستارى كەلەسى ءبىر وبلىسقا تۋريستىك ساپارمەن كەلىپ، تاريحي، مادەني، تانىمدىق سيپاتى باسىم ورىندارىن ارالاسا نۇر ۇستىنە نۇر بولار ەدى. مۇنداي ساپارلاردان جاستار تاعىلىمدىق، تانىمدىق ساباق الارى انىق.
ەلىمىزدىڭ ءار وڭىرىندەگى جاستاردىڭ ءبىر شوعىرى اباي، شاكارىمدەي، مۇحتارداي زاڭعار تۇلعالار ومىرگە كەلگەن، الاش تۋى تىگىلگەن سەمەي وڭىرىنە بارىپ جاتسا، عانيبەت ەمەس پە؟ ماسەلەن، جۇمەكەن ناجىمەدەنوۆتىڭ اتاسى بالاسىن سوعىسقا اتتاندىرار الدىندا تابان ءىزىن سورعا باستىرىپ، ۇستىنە قازان توڭكەرىپ قويعان. ناجىمەدەن قاريا بالاسىن ساعىنعاندا توڭكەرۋلى قازاندى كوتەرىپ، بالاسىنىڭ ءىزىن الاقانىمەن ايالاي سيپايدى ەكەن. اڭىزعا بەرگىسىز وسى تاريحي ورىندى وزگە ءوڭىردىڭ جاستارى ءوز كوزدەرىمەن كورسە، ونىڭ اسەرى ەرەكشە بولارىنا سەنەمىن.
قورىتا ايتقاندا، التاي ەتەگىندەگى جاستاردىڭ اقتاۋداعى نە قىزىلورداداعى تۇستاستارىمەن، جامبىل جەرىندەگى جاس بۋىننىڭ اباي مەن ماحامبەتتەي اقىندارىنىڭ تابان ءىزى قالعان، قانىشتاي عۇلاما عالىمنىڭ كىندىك قانى تامعان وڭىرلەردەگى زامانداستارىمەن تەرەڭىرەك تانىسۋى مەن ارالاسۋىنا، پىكىر الماسىپ، دوستاسۋىنا ىقپالى تيەر ەدى.
وزىمىزدەن كەيىنگى بۋىننىڭ ەل مەن جەر تاريحىن تەك كىتاپتان عانا وقۋمەن شەكتەلمەي، ابايلار مەن ماحامبەتتەردىڭ سارقىتى - مۇقاعاليداي ءبىرتۋار اسىلدارىمىزدىڭ بالداۋرەنى وتكەن كيەلى توپىراقتى كوزبەن كورىپ، قاسيەتىن سەزىنسە ەكەن»، دەيدى ايدار سابىروۆ.
