تۇركياداعى قانداستارىمىز اتا كاسىپتەرىن جاڭعىرتۋدا
وتكەن عاسىردىڭ ەلۋىنشى جىلدارى انادولى جەرىنە العاش تابان تىرەگەن اعايىن ءتورت تۇلىكپەن جان باقتى. ودان كەيىنگى ۇرپاق اتا كاسىپتى مول تابىس اكەلەتىندەي ەتىپ وندىرىسكە وزگەرىس ەنگىزدى.
قازىر تۇركيا 2 ميلليارد ا ق ش دوللارىنىڭ تەرى بۇيىمدارىن سىرتقا ەكسپورتتايدى. ال وسى ساۋدا-ساتتىقتا ىسكەر قانداستارىمىزدىڭ دا ۇلەسى باسىم. ءبىراق بيىل ەلدەگى تەرى يندۋسترياسى ءبىرقاتار قيىندىقتارعا تاپ بولىپ وتىر.
تۇركيانىڭ زەيتۇنبۇرنى اۋدانى. مۇندا قالا بويىنشا تەرىنى وڭدەپ، بىلعارى تىگەتىن سەحتەر مەن دايىن ءونىمدى نارىققا شىعاراتىن دۇكەندەر جەلىسى ورنالاسقان. ال تۇركيادا تەرى ءوندىرىسىنىڭ قالىپتاسىپ، دامۋىنا وزگە ەمەس ءدال وسى اۋدانداعى جەرگىلىكتى قاراكوز قانداستارىمىزدىڭ ەڭبەگى زور.
كاسىپكەر احمەت ءاقجۇز 35 جىلدان بەرى بىلعارى وندىرىسىندە جۇمىس ىستەپ كەلەدى. العاشىندا تەرىنى الىپ-ساتۋمەن اينالىسقان. كەيىن قاراجاتتىڭ باسى قۇرالعاندا تەرى بۇيىمدارىن ساتاتىن ارنايى دۇكەن اشىپتى.
سول ساتتەن باستاپ سۇيىكتى ءىسى تابىس اكەلە باستاعان. بۇگىندە ول شيكى تەرىنى وڭدەپ، دايىن تون ەتىپ تىگىپ بەرەتىن وندىرىستىك تىزبەكتى ىسكە قوسىپ وتىر. ءبىر عانا تىگىن ماشيناسىنان باستالعان سەحتىڭ قازىرگى جۇمىسى قىز-قىز قايناپ تۇر.
الايدا كاسىپكەرلەر بيىل تەرى بۇيىمدارىن ساتىپ الۋشىلار كۇرت ازايىپ، وسىعان وراي ءبىرقاتار قيىندىقتاردىڭ ورىن العانىن ايتىپ، شاعىمدانۋدا. تۇركيا تەرى ءوندىرىسى قوعامىنىڭ ءتوراعاسى ەردال ماتراش ساۋدا اينالىمنىڭ تومەندەۋى الەمدەگى ساياسي جاعدايدىڭ تۇراقسىزدىعىمەن بايلانىستىرادى. وسىعان وراي بيىل تۇركيادا تەرى بۇيىمدارىنىڭ ەكسپورتى ازايادى دەپ جوسپارلانىپ وتىر.
گۇلەمير ەكەمەن، تۇركيالىق كاسىپكەر:
- قازان ايى - تەرى بۇيىمدارىنىڭ ماۋسىمى. سەبەبى وسى ارالىقتا شەتەلدەن كەلەتىن تۇتىنۋشىلار دۇكەندەرىمىزدەگى توندارىمىزدىڭ ءبىرىن قالدىرماي كوتەرمە باعادا سىپىرىپ الىپ كەتەتىن. ال قازىر كورىپ تۇرسىز، بارلىعى ىلگىشتەرىندە ءىلۋلى. جيىرما سەگىز جىلدان بەرى تون ساتامىن. الەمدىك داعدارىس بولعان جىلداردىڭ وزىندە ءدال بيىلعىداي مۇشكىل حالگە تۇسكەن جوق ەدىك.
تەرى بۇيىمدارىنىڭ باعاسى جىلداعىدان ايتارلىقتاي تومەندەسە دە، توپىرلاعان تۇتىنۋشىلار كورىنبەيدى. تون ساتىلاتىن ماۋسىمنىڭ وزىندە تامىلجىعان تىنىشتىق. سوندىقتان كاسىپكەرلەر بۇل جىلعا كۇدەر ءۇزىپ، ەندى كەلەسى جىلعا ءۇمىت ارتۋدا.
24.kz
