ايەلدەر ءسۇت بەزى قاتەرلى ىسىگى دەرتىنە كوبىنە وزدەرىن «ۇمىتاتىن» شاقتا شالدىعادى - مامان

بۇل تۋرالى بۇگىن الماتى قالاسىندا ءوتىپ جاتقان بارلىق جاستاعى ايەلدەرگە ارنالعان تەگىن ماممولوگيالىق تەكسەرۋ شاراسى اياسىندا الماتى قالالىق ونكولوگيا ورتالىعىنىڭ حيرۋرگ-ونكولوگ، ماممولوگ مامانى مۇراتجان ساقتاعانوۆ ءمالىم ەتتى.

ونىڭ ايتۋىنشا، ءدال وسى كەزەڭدە ايەلدەر پسيحولوگيالىق كۇيزەلىستەردى ءجيى باستان كەشەدى.

«بۇل شاق ايەلدەردىڭ ناعىز جۇمىسقا بەرىلگەن كەزى. ونىڭ ۇستىنە بۇل كەزەڭدە بالالار دا ءوسىپ جەتىلەدى. ولاردىڭ دا قام-قارەكەتى ارتا تۇسەدى دەگەندەي. ياعني، ابىگەرلىك كوبەيەدى. سونىڭ سالدارىنان ايەلدەر دەنساۋلىقتارىنا ءمان بەرمەي، ءتىپتى وزدەرىن «ۇمىتىپ» تا كەتەدى.

مىنە، وسى جانە وزگە دە سەبەپتەرگە بايلانىستى اعزادا گورمانالدىق تەڭسىزدىك ورىن الادى. بۇل، ارينە ايەلدىڭ كوڭىل-كۇيىنە اسەر ەتەدى. ەگەر دەر كەزىندە دارىگەرگە قارالماسا، ارتى اۋىر جاعدايلارعا اكەپ سوقتىرۋى مۇمكىن» - دەدى م. ساقتاعانوۆ.

سونىمەن قاتار، ماممولوگ مامان سەمىزدىك، زياندى ادەتتەرگە بوي الدىرۋ (تەمەكى تارتۋ، اراق ءىشۋ)، تۇسىك جاساتتىرۋ، بالانى جەتكىلىكتى ەمىزدىرمەۋ، ءجوندى تاماقتانباۋ ءسۇت بەزى قاتەرلى ىسىگىنە شالدىعۋ قاۋپىن ارتتىرا تۇسەتىندىگىن جەتكىزدى.

سوندىقتان، ءسۇت بەزىنىڭ ءتۇسى، ءپىشىنى وزگەرەر بولسا، ونىڭ بەتىندە نەمەسە قولتىعىندا اۋىرمايتىن تۇيىندەر پايدا بولسا، ەمشەك ۇشى تارتىلسا نەمەسە ودان سۇيىقتىق شىعاتىن بولسا تەز ارادا دارىگەرگە قارالىپ، مامموگرافيادان (رەنتگەندىك ءتۇسىرىلىم) جانە ۋلترادىبىستى زەرتتەۋدەن (ۋ ز ي) ءوتۋ قاجەت.

«ءسۇت بەزى قاتەرلى ىسىگىنىڭ ءتورت ساتىسى بولادى. ەگەر ايەل اۋرۋ بەلگىلەرى پايدا بولعان مەزەت، ونىڭ 1-2 - ساتىسىندا دارىگەرگە قارالاتىن بولسا، وندا ولاردىڭ 90-95 پايىزى، ال ەۋروپا ەلدەرىندە 98 پايىزعا دەيىنى قۇلان تازا ايىعىپ كەتەدى. ال اۋرۋدى اسقىندىرىپ، 3-4 ساتىسىنا جەتكىزىپ بارىپ قارالعانداردىڭ جاعدايلارى ارينە، قيىن. ويتكەنى بۇل شاقتا دەرت اسقىنىپ، وكپەنى، ميدى زاقىمداۋى مۇمكىن. بۇل كەزدە سيمتوماتيكالىق ەمدەر قولدانىلادى» - دەدى م. ساقتاعانوۆ.

ايتا كەتەلىك، الماتى ونكولوگيالىق ورتالىعىندا جىلىنا 500 ايەلدە ءسۇت بەزى قاتەرلى ىسىگى انىقتالادى ەكەن. ولاردىڭ 80 پايىزىندا اۋرۋ ءبىرىنشى جانە ەكىنشى ساتىدا بولسا، 20 پايىزىندا دەرت ءۇشىنشى جانە ءتورتىنشى ساتىدا بولادى.

سوندىقتان، ءسۇت بەزى قاتەرلى ىسىگى قانشالىقتى ەرتە انىقتالسا، سونشالىقتى ءتيىمدى ەمدەلەدى.

ايتالىق، قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ دەرەكتەرى بويىنشا ەلىمىزدە 2012 - جىلى سكرينينگتىك تەكسەرۋدىڭ ارقاسىندا 3951 ايەلگە ۋاقتىلى دياگنوز قويىلعان.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى