الماتىدا جىلىنا ەكى مەزگىل وتەتىن ءداستۇرلى ءسان اپتالىعى باستالدى
ءبىراق، ءسان مەرەكەسىنە قاتىسقان سىنشىل كورەرمەندەر ءساندى كيىمدەردەن ءمىن تاپپاساق تا، سانگەرلەردەن ءبىر اعاتتىق سەزىلەدى - دەيدى. ايتۋلارىنشا، سوڭعى جىلدارى شىعارماشىلىق توقىراۋ ۇستىندە جۇرگەن ديزاينەرلەر ءبىرىنىڭ ءپىشىنىن ءبىرى كوشىرىپ پايدالانا باستاعان. بۇنى سانگەرلەردىڭ وزدەرى دە مويىنداپ وتىر.
شەتەلدىڭ داڭعازا مۋزىكاسىنان قاشىپ، جاڭا توپتاماسىن قازاقتىڭ اۋەزدى اۋەنىمەن ورتاعا الىپ شىققان جالعىز ديزاينەر - ايا باپاني بولدى. جۇقارتىلعان كيىزدىڭ ۇستىنە ورنەكتەلىپ باسىلعان ويۋ - جاس سانگەردىڭ جەكە قول تاڭباسىنا اينالعان. سودان- اق بولار، باعاسى قىمبات بولسا دا ايانىڭ كيىمدەرىنە سۇرانىس جوعارى. الايدا سوڭعى كەزدەرى ونىڭ كيىم ۇلگىلەرى وزگە ديزاينەرلەردىڭ توپتامالارىنان تابىلىپ ءجۇر.
ايا باپاني، سانگەر:
مەنىڭ كيىمدەرىمە كىشكەنە ەلىكتەيتىن نەشە- ءتۇرلى ديزاينەرلەر بار. مىسالى قازىر بي- بوتا دەگەن جاڭا ديزاينەر بار. ونىڭ لوگوتيپى دە مەنىڭ لوگوتيپىمە وتە ۇقسايدى. تۋرا سولاي ويۋلانىپ، ب ءارپىن سالعان. مىسالى سول قىز يدەيانى مەنەن العان. مىنە مىسالى مىنانداي كويلەك، بۇل دا مەنىڭ ۇرلانعان يدەيام.
ءوز شىعارماشىلىعىنىڭ ۇشقىنىن وزگەدەن بايقاعاندار قاتارىندا قولدان جاسالعان اشەكەي بۇيىمداردىڭ شەبەرى - اسەم نۇرسەيىت تە بار. سانگەردىڭ قاراماعىندا جۇمىس ىستەپ جۇرگەن كومەكشىلەرىنىڭ ءبىرى كوپ جىلدان بەرى ديزاينەردىڭ جۇمىسىن سىرتتان باقىلاپ، تانىمالدىلىعىن قايتالاعىسى كەلگەن ەكەن.
اسەم نۇرسەيىت، سانگەر:
مەندە ءبىر جاعداي بولعان. مەنىڭ دۇكەنىمدە ىستەگەن ءبىر قىز كەيىن اشەكەيلەر جاساي باستادى. وعان مەن وتە رەنجىدىم، نەگە ولاي ىستەدى، ادامگەرشىلىگى قايدا دەپ، جۇمىسقا العانىما وكىنگەن بولاتىنمىن.
ءسان اپتالىعىنىڭ تۇراقتى قاتىسۋشىسى - گرۋزيالىق سانگەر كەتي چحيكۆادزە كەيدە وزگە ارىپتەستەرىنىڭ كيىمدەرىن سارالاپ، ۇتىمدى ويلاردى وزىنە الاتىنىن جاسىرمادى. بۇل ۇلكەن نارىق، سوندىقتان تىڭنان دۇنيە ويلاپ تابۋ قيىن - دەيدى ول. الايدا وزگە ادام سەنەن شىعارماشىلىق شابىت تاۋىپ، ساعان ەلىكتەي تۇسسە - بۇل تانىمالدىلىعىڭنىڭ ءبىر كورىنىسى - دەيدى ول.
جانار جولتاەۆا، ءتىلشى:
قالدىقتان قالقا، توزىقتان تورقا، ۇزدىكتەن ۇلدە مەن بۇلدە جاساپ ۇيرەنگەن شەبەرلەرىمىز بيىل دا ءبىر- بىرىنەن قالىس قالمادى. تالعامپاز كورەرمەننىڭ كوڭىلىنەن شىعۋ ءۇشىن بارىن سالدى. الايدا نارىقتا دوستىق جوق، تەك ساۋدا عانا دەيدى سانگەرلەر.
وسىلايشا، كيىمدەرىن داراعا بالاپ، ولاردى قىمباتقا باعالاپ، حالىقتان زور قۇرمەت كۇتەتىن وتاندىق سانگەرلەرىمىز ءوز كاسىبىنە ادال بولىپ ءجۇرۋدى ەسكەرمەي ءجۇر.
جانار جولتايەۆا، باۋىرجان نارىمبەتوۆ.
« 31- ارنا»
