قازاق ەلىندە بارلىق ۇلت وكىلدەرى ءوز ءتىلىن، مادەنيەتىن، سالت-ءداستۇرىن دامىتۋىنا مۇمكىندىك الىپ وتىر
ونىڭ ايتۋىنشا، قازاقستاندا ەلباسى ساياساتى ارقاسىندا ۇلتارالىق تاتۋلىق پەن كەلىسىم سالتانات قۇرىپ كەلەدى. قازاق حالقى وزگە ۇلت وكىلدەرىنە قۇشاق جايىپ، باۋىرىنا باستى. مۇنى وتكەن عاسىردىڭ وتىزىنشى جىلدارى جەر اۋدارىلىپ كەلگەن كورەي حالقىنىڭ وكىلدەرى دە ەش ۋاقىتتا ۇمىتپاق ەمەس. قازىر ەلىمىزدە ءار ۇلتتىڭ تولىققاندى ءومىر ءسۇرىپ، قازاقستاننىڭ ودان ءارى دامۋىنا ۇلەس قوسۋى ءۇشىن بارلىق جاعداي جاسالعان. بۇل رەتتە بارلىق ۇلت وكىلدەرىنىڭ قازاق حالقىمەن ءبىر ماقسات-مۇددەدە عۇمىر كەشىپ، توپتاسا ءبىلۋىنىڭ ماڭىزى زور. وسى ورايدا مەملەكەتتىك ءتىلدى مەڭگەرۋ ماڭىزدى ءرول اتقارادى.
«قازاقستان حالقى اسسامبلەياسىنىڭ ۇيىتقى بولۋىمەن مەكتەپكە دەيىنگى ۇيىمدارعا ارنالعان مەملەكەتتىك ءتىلدى ۇيرەنۋ باعدارلاماسى دايىندالدى. «جاڭا شەشىم» ءبىلىم قورى مۋلتيمەديالىق تەحنولوگيا نەگىزىندە وسىنداي باعدارلاما جاسادى. وسى باعدارلامالاردىڭ تۇساۋكەسەرىن ءبىزدىڭ ورتالىق ورال قالاسىندا جانە اۋدانداردا وتكىزدى. رەسپۋبليكامىزداعى بارلىق ەتنوستىڭ مەملەكەتتىك ءتىلدى مەڭگەرۋىنە وسى باعدارلامالاردىڭ سەبەپشى بولارىنا سەنىمىم مول. جەكە وزىمە كەلسەم، قازاق ءتىلىن شامامەن 40 پايىزداي بىلەمىن. ۋاقىت بولعاندا بىلمەيتىن سوزدەرىمدى ۇيرەنىپ ءجۇرمىن. ءتۇرلى شارالاردا سويلەپ، بايانداما جاساعاندا، ءسوزىمدى مىندەتتى تۇردە مەملەكەتتىك تىلدە باستايمىن. قازاقتىڭ اقىن-جازۋشىلارىنىڭ قاناتتى سوزدەرىن قولدانامىن. وزگە ارىپتەستەرىمدى دە ءتىل ۇيرەنۋگە شاقىرامىن»، دەدى م. پاك.
