پۋتين مەن پوروشەنكو يتاليادا كەزدەستى
Reuters اگەنتتىگىنىڭ جازۋىنشا، ۋكراينانى قولدايتىندارىن اشىق بىلدىرگەن ەۋروپا جەتەكشىلەرى رەسەيدەن اتىستى توقتاتۋ رەجيمى تالاپتارىن ورىنداۋدى تالاپ ەتۋگە ءازىر بولعان.
ە و پەن رەسەي اراسىنداعى قارىم- قاتىناستى رەتتەۋ ماسەلەسىندە بەلسەنىپ شىققان گەرمانيا كانسلەرى انگەلا مەركەل رەسەيمەن كەلىسسوز جۇرگىزۋگە ىنتالى ەكەنىن بايقاتتى. Los Angeles Times گازەتىنىڭ جازۋىنشا، ميلانداعى كەزدەسۋ الدىندا انگەلا مەركەل نەمىس دەپۋتاتتارىنا رەسەيگە ءۇش تالاپ قويۋعا - رەسەيدىڭ بۇكىل قارۋلى كۇشتەرىن ۋكراينا جەرىنەن شىعارۋدى؛ ە ق ى ۇ- نىڭ (و ب س ە) رەسەي مەن ۋكراينا شەكاراسىن كۇزەتىپ، باقىلاۋىنا؛ قازاننىڭ 26- كۇنى ۋكراينانىڭ بۇكىل تەرريتورياسىندا ەلدىڭ جاڭا پارلامەنتىن سايلاۋعا مۇمكىندىك بەرۋدى تالاپ ەتۋگە ۋادە ەتكەن.
بەيسەنبى كۇنگە بەلگىلەنگەن كەزدەسۋ ۆلاديمير پۋتيننىڭ يتالياعا جوسپارلى مەرزىمنەن كەشىگىپ كەلۋىنە بايلانىستى كەيىنگە شەگەرىلدى. ەكى ساعاتتان اسا سوزىلعان كەلىسسوز ءتۇن ورتاسىندا اياقتالىپ، ەكى جاق تا ورتاق مامىلەگە كەلە الماعاندارىن مويىندادى.
Reuters اگەنتتىگىنىڭ جازۋىنشا، جۇما كۇنى انگەلا مەركەل «ەشقانداي وزگەرىس بايقامادىم. كەلىسسوزدەردى جالعاستىرامىز. كەيبىر ماسەلەلەر بويىنشا پروگرەسس بار، ءبىراق ۋكراينانىڭ تەرريتوريالىق تۇتاستىعىن بۇزۋعا قاتىستى نەگىزگى ماسەلە ءالى شەشىلگەن جوق» دەپ مالىمدەگەن.
انگەلا مەركەل 1994 - جىلى قابىلدانعان بۋداپەشت مەموراندۋمىندا رەسەي ۋكراينانىڭ تەرريتوريالىق تۇتاستىعىن قۇرامىنداعى قىرىممەن بىرگە مويىنداعانىن ۋكراينانىڭ تاۋەلسىزدىگىنە كۇمان كەلتىرە سويلەگەن ۆلاديمير پۋتيننىڭ ەسىنە سالعان.
رەسەي پرەزيدەنتى ۆلاديمير پۋتين، گەرمانيا كانتسلەرى انگەلا مەركەل جانە ۋكراينا پرەزيدەنتى پەتر پوروشەنكو. ميلان، 17 قازان 2014 -جىل.
جۇما كۇنگى تاڭعى اس ۇستىندەگى كەلىسسوزدەرگە رەسەي تارابىنىڭ دا كوڭىلى تولماعان. «روسسيسكايا گازەتا» باسىلىمى رەسەي پرەزيدەنتىنىڭ باسپا ءسوز حاتشىسى دميتري پەسكوۆتىڭ «ۋكراينانىڭ وڭتۇستىك-شىعىسىنداعى ناقتى جاعدايدى كەيبىر قاتىسۋشىلار مۇلدە تۇسىنگىسى كەلمەدى دەپ وكىنىشپەن ايتۋعا بولادى» دەگەن سوزدەرىن كەلتىرگەن.
گازەتتىڭ جازۋىنشا، «كەيبىر قاتىسۋشىلار وبەكتيۆتىلىك تانىتۋعا مۇلدە تىرىسپادى» دەگەن ول ءبىراق «جالپى كونسترۋكتيۆتى كەلىسسوز ءوتتى» دەپ مالىمدەگەن.
پۋتين بەرلۋسكونيدىڭ ۇيىنە قوناققا باردى
سامميتتەن كەيىن ۆلاديمير پۋتين يتاليانىڭ بۇرىنعى پرەمەر-ءمينيسترى سيلۆيو بەرلۋسكونيدىڭ ۇيىندە بولعان. جۋرناليستىك زەرتتەۋ جۇرگىزگەن BBC-دىڭ حابارلاۋىنشا، «سالىقتان جالتاردى» دەگەن ايىپپەن سوتتالعان سيلۆيو بەرلۋسكونيدىڭ ۇيىنە بارعان ۆلاديمير پۋتين جەرگىلىكتى ۋاقىت بويىنشا تاڭعى 03:45 تە قايتقان.
مۇمكىندىگى شەكتەۋلى جاندارعا ارنالعان قارتتار ۇيىندە ءبىر جىل قوعامدىق جۇمىس ىستەۋ جازاسىنا كەسىلگەن 78 جاستاعى سيلۆيو بەرلۋسكونيمەن كەزدەسۋ ءۇشىن رەسەي پرەزيدەنتى سوت ورىندارىنان ارنايى رۇقسات العان.
- رەسمي ءىس-شارالار اياقتالعاننان كەيىن پۋتين ءوزىنىڭ ەسكى دوسى بەرلۋسكونيمەن جولىعۋعا باردى، - دەيدى رەسەي پرەزيدەنتىنىڭ باسپا ءسوز حاتشىسى دميتري پەسكوۆ.
«ازاتتىق» سايتى
