جوعالىپ كەتكەن وقۋشىلار تابىلدى
وسىعان دەيىن حابارلانعانداي، 10 جانە 12 جاستاعى ەكى دوس وقۋشى مەكتەپكە كەتكەننەن ۇيلەرىنە قايتىپ كەلمەگەن. 14- قازان كۇنى اتا-انالارى پوليتسياعا بالالارىنىڭ جوعالعانىن حابارلادى. ەكى تاۋلىك وتكەن سوڭ ولار وزدەرىنىڭ تۋعان اۋىلى پۋتينتسيەۆودان 30 شاقىرىم جەردەگى پارىگينو اۋىلىنان تابىلدى.
بالالاردى ىزدەۋگە زىريانوۆ ا ءى ءى ب قىزمەتكەرلەرى بىردەن كىرىستى. بۇل ىسكە جەكە قۇرامنىڭ 80 پايىزدان استام قىزمەتكەرى جۇمىلدىرىلدى.
ىزدەۋ توپتارى جاقىن ماڭداعى مالەيەۆ، زۋبوۆ، بايانوۆ، پارىگينو اۋىلدارىنا ءبولىندى. جەرگىلىكتى تۇرعىندارعا جوعالعان بالالار تۋرالى مالىمەت تاراتىلدى.
جەرگىلىكتى ۋچاسكە ينسپەكتورىنا پارىگينو اۋىلىنداعى دۇكەندەردىڭ ءبىرىنىڭ ساتۋشىسى بۇرىن تانىس ەمەس ەكى بالانىڭ ول جۇمىس جاسايتىن دۇكەنىنەن ءتاتتى توقاشتار ساتىپ العانىن ايتقان. وقۋشىلاردىڭ ءتۇر-تۇلعاسى جوعالعان بالالاردىڭ سيپاتتاماسىمەن سايكەس كەلگەن. بۇل اقپاراتتى العاننان كەيىن ۋچاسكەلىك ينسپەكتور كريمينالدىق پوليتسيا قىزمەتكەرلەرىمەن بىرلەسە ىزدەستىرىپ، بالالاردى قاراۋسىز قالعان ەسكى قازاندىقتان تاپقان.
انىقتالعانداي، بالالار سول جەردە تۇنەپ شىققان.
