اتىراۋ وبلىسىنىڭ اكىمى قول استىنداعى قىزمەتكەرلەرى جەمقورلىقپەن ءىستى بولسا، ورنىنان كەتپەيتىندىگىن مالىمدەدى

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە اتىراۋ وبلىسىنىڭ اكىمى باقتىقوجا ىزمۇحامبەتوۆ ءمالىم ەتتى.

«قول استىمداعى قىزمەتكەرلەرگە كەلەر بولساق، ولاردىڭ بارلىعى ءۇشىن 100 پايىز سەنىمدىمىن دەپ ايتا المايمىن. ەگەر دە بىرەۋى قاتەلىك جاساپ، جاۋاپكەرشىلىككە تارتىلىپ جاتسا، مەن وتستاۆكاعا كەتپەيمىن. مەن سىزدەرگە بىردەن ايتامىن. اركىم ءوزى ىستەگەن ءىسىن موينىمەن كوتەرۋى كەرەك. مەنىڭ قىزمەتتىك ۇستانىمىم وسى. مەن بۇنى قىزمەتكەرلەرىمە ۇنەمى قايتالاپ ايتىپ وتىرامىن» ، - دەدى ب. ىزمۇحامبەتوۆ بۇگىن ورتالىق كوممۋنيكاتسيالار قىزمەتىندە وتكەن بريفينگتە جۋرناليستەردىڭ سۇراقتارىنا جاۋاپ بەرە وتىرىپ.

«ەشتەڭە ىستەمەگەن ادام عانا قاتەلەسپەيدى» دەگەن ماقال بار. جۇمىستىڭ اتى - جۇمىس. جەمقورلىقپەن اينالىسۋ ءبىر بولەك، ال جۇمىس بارىسىندا ءبىر قاتەلىك جىبەرىپ الۋىڭ - ءبىر باسقا. دەگەنمەن كەز كەلگەن قاتەلىك جاۋاپكەرشىلىكتەن جالتارتپايدى»، - دەدى اكىم.

ونىڭ ايتۋىنشا، بۇگىندە اتىراۋ وبلىسىنىڭ اكىمدىگىندە سەنىمدى ادامدار قىزمەت ەتەدى.

 «اپپاراتتاعى «تازالاۋ» تۋرالى ايتار بولساق، مەنىڭ بۇل جۇمىسقا قاتىسىم جوق. ونى قۇقىق قورعاۋ ورگاندارى جۇرگىزگەن. مەن تەك سول جۇمىستار جۇرگىزىلىپ جاتقان كەزدە كەلگەنمىن»، - دەدى ب. ىزمۇحامبەتوۆ.

 اۆتور: ءابۋ- اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى