قايرات نۇرتاس بۇرىن-سوڭدى بولماعان شوۋ جاسادى - فوتو
وندا قايراتتىڭ «الماتى ءتۇنى»، «سۇرانامىن»، «ول سەن ەمەس»، «اۋىرمايدى جۇرەك»، «مەيلى»، «وكىنىش» سىندى جانە ت. ب. كوپشىلىكتىڭ ءسۇيىپ تىڭدايتىن اندەرى ورىندالدى.
قايرات بيبىگۇل تولەگەنوۆانىڭ "تاقيالى پەرىشتە" فيلمىندە ورىنداعان "انا تۋرالى" جىرىن اندەتتى، سول كەزدە ساحنادا قازاق ەستراداسىنىڭ نازىك جاندى جارقىن جۇلدىزدارىنىڭ سۋرەتتەرىنەن سلايد كورسەتىلدى. ولاردىڭ اراسىندا، قايراتتىڭ اناسى ءارى پروديۋسسەرى گۇلزيرا حانىم دا بولدى.
كەش قوناعى رەتىندە كەلگەن «نۇرمۇقاسان» دۋەتى قايراتپەن بىرگە ءان شىرقاپ، كورەرمەننىڭ قوشەمەتىنە يە بولدى.
ودان سوڭ جاڭا قۇرامداعى «كەشيۋ» توبى شىعىپ، ساحنا ءسانىن كەلتىردى.
كەشتە سونداي-اق، بەركۋت، جانار دۇعالوۆا جانە سيۆي ماحمۋدي سىندى قازاق ەستراداسىنىڭ تانىمال انشىلەرى ءوز ونەرلەرىن ورتاعا سالدى.
ءبىر كۇن ىشىندە ەكى بىردەي كونسەرتتىڭ بولاتىنىنا قاراماستان، زالدا ينە شانشار ورىن بولمادى. شاماسى، استانالىقتار قايراتتىڭ اندەرىن ساعىنىپ قالعان سىڭايلى. ولاردىڭ اراسىندا نەمەرەلەرىن ەرتىپ كەلگەن اپا-اجەلەرىمىز دە، جاس جىگىت-قىزدارىمىز دا بار. كەلۋشىلەرگە قاراپ، قايراتتىڭ اندەرىن جاسى دا، كارىسى دە بىردەي ءسۇيىپ تىڭدايتىنىنا كوز جەتكىزۋگە بولادى.
«كەش كوڭىلىڭىزدەن شىقتى ما؟» دەگەن ساۋالعا تومەندەگىدەي جاۋاپتار الدىم:
ايدانا: «يا، وتە ۇنادى. مەن مۇندا قۇربىلارىممەن كەلدىم. جالپى، قايرات نۇرتاستىڭ جاڭادان شىققان «سەن دە، مەن دە» دەگەن ءانىن ۇناتامىن. سوزدەرى وزىمە جاقىن».
قۇندىز: «قايرات نۇرتاستى ءسۇيىپ تىڭدايمىن، ونىڭ فاناتىمىن دەپ ايتا المايمىن. مەنى قىزىقتىرعانى 3D شوۋ بولدى. سول 3D شوۋدى كورۋ ءۇشىن كەلدىم. كوردىم... ۇناپ جاتىر».
مەرۋەرت: «مەن دە انيماتسيالىق شوۋدى كورۋ ءۇشىن كەلگەنمىن. كەرەمەت اسەر الدىم دەپ وتىرىك ايتپاي-اق قويايىن. ءبىراق جاندى داۋىستا ورىنداعانى ءۇشىن قايراتقا ريزا بولدىم».
جۇماگۇل اپاي: «بيلەتتەر قىمباتتاۋ بولعان سوڭ بالكوننان الىپ ەدىم، الىستاۋ بولىپ قالدى. سول بولماسا، باسقالاي ۇنادى، تولىقتاي كوڭىلىمنەن شىقتى. قايراتتىڭ ولەڭدەرىن تويلاردا تىڭداپ، بيلەپ جاتامىز عوي. ولەڭدەرى ادەمى، ءوزى دە سۇيكىمدى. نەمەرەم جاقسى كورەدى. سونى الىپ كەلىپ وتىرعان جايىم بار».
داستان: «مەن وسى كونتسەرت ءۇشىن پەتروپاۆل قالاسىنان كەلدىم. وتە ۇنادى. قايرات نۇرتاس الماتى مەن استانادان باسقا قالالاردا دا وسىنداي كونسەرتتەر بەرسە دەگەن تىلەك. ايتپەسە، ءوزىڭىز تۇسىنەسىز عوي جۇمىستان شىعا المايمىز».
«el.kz»
