وي-ءورىسىمدى كەڭەيتەم دەسەڭىز «وي مارجاندارىن» وقىڭىز
ماماندىعى دا، ءومىر بويى اتقارعان قىزمەتى دە قالام ۇستاعان قاۋىمنان بولەك.
بۇرىنعى ينجەنەر-ەلەكتريك افوريزمدەردى، ناقىلداردى، قاناتتى سوزدەردى ۇزاق جىلداردان بەرى ءوزىنىڭ جان ءلاززاتى ءۇشىن اۋدارۋمەن اينالىسادى.
الۋان تاقىرىپتاردى قوزعايتىن جازبالارى ارا-تۇرا گازەت-جۋرنالداردا باسىلىپ تۇرادى.
افوريزممەن «اۋىراتىن» احاڭ جاقىندا ىقىلىم زاماننان بەرگى دانالاردىڭ ايتقان ايشىقتى سوزدەرىن «توعاناي ت» باسپاسىنان «وي مارجاندارى» دەگەن اتپەن ءارقايسىسى 500 بەتتەن اساتىن قوماقتى-قوماقتى قوس كىتاپ ەتىپ شىعاردى. كوپ جىلداردان بەرى قاعىس قالدىرماي جيناپ، اۋدارعان، كىتاپ ەتىپ باستىرعان بۇل ەڭبەكتەردەن ءسىز مىڭداعان جىلداردىڭ ەسكىرمەيتىن دانالىق ويلارىن ۇشىراتاسىز.
ادامزاتتىڭ الدىنان ءاردايىم شىققان جانە شىعا بەرەتىن كوكەيكەستى ماسەلەلەر بويىنشا پايعامبارلار مەن دانىشپاندىعىمەن دارالانعان تۇلعالاردىڭ ايتقان قىسقا دا نۇسقا لەبىزدەرىن، ءار عاسىردا عۇمىر كەشكەن داناگوي وي يەلەرىنىڭ قالدىرعان تولعاقتى تۇجىرىمدارىن جانە بۇگىنگى زامانداعى قاسيەتتى قالام ۇستاعان قايراتكەرلەردىڭ سوقتالى سوزدەرىمەن تانىساسىز.
تاقىرىپ اياسى اۋقىمدى. اۋەلى كىتاپتان افوريزمگە قاتىستى قاناتتى سوزدەر مەن ناقىشتى ناقىلداردى وقىپ، ادام، ادامگەرشىلىك، ادامداردىڭ كەمشىلىكتەرى تۋرالى وي-پىكىرلەرگە قانىعاسىز. ودان كەيىن اقيقات، ادام ءومىرى، ءومىر قۇبىلىستارى، ۋاقىت پەن زامان، شىندىق پەن وتىرىك، ادالدىق، ار-ۇيات، ادەپ پەن ادەت، نامىس، مىنەز-قۇلىق، قارىم-قاتىناس، ءومىر جانە ءولىمنىڭ ءمان-ماڭىزى، ايەل مەن ەركەك، بايلىق پەن كەدەيلىك، باقىت پەن سور، ءبىلىم مەن عىلىم، دەنساۋلىق جونىندەگى ۇلىلاردىڭ نە دەگەنىن بىلە الاسىز.
كىتاپ سوڭىندا اۆتورلاردىڭ كورسەتكىشى قوسا بەرىلگەن. وزىق وي ۇلت پەن ۇلىس تاڭدامايدى. وسىلايشا، الەم حالىقتارىنىڭ دانالىقتارىن انا تىلىمىزدە تۇشىمدى سويلەتكەن احاڭ قوس تومدىعى ارقىلى قازاق بالاسىنا تاپتىرمايتىن قىمبات قازىنا سىيلاپ وتىر.
دانالىق مايەگىنە بويلاپ، وي-ءورىسىمدى كەڭەيتەم، كوبىرەك بىلسەم، ءتىپتى ءومىرىڭىزدى وزگەرتەم دەسەڭىز، «وي مارجاندارىن» وقىڭىز، وكىنبەيسىز.
«ايقىن»
