الماتىدا ءۇش بالاسىمەن جوعالىپ كەتكەن كەلىنشەكتىڭ حاتى تابىلدى
ونىڭ كۇيەۋى وتباسىن سوڭعى رەت قىركۇيەكتىڭ اياعىندا كورىپتى.
سول كەزدە ول جۇمىسقا كەتكەن. ال كەشكىسىن ۇيگە قايتىپ كەلگەندە، وندا ايەلى مەن بالالارى جوق بولىپ شىققان. سودان بەرى تۋرا 3 اپتا ءوتتى. ءبىراق جاقىندارىنان ازىرگە ەشقانداي حابار جوق.
«كەشىر، بەكە. مەن كەتتىم. كىلت قارا سومكەنىڭ ىشىندە جاتىر». بۇل - ءۇش بالامەن بىرگە ءىز-ءتۇسسىز جوعالىپ كەتكەن گۇلجان توقتاعۇلوۆانىڭ ۇيدەن كەتەر الدىندا جازعان حاتى. ءۇش بالاسىن كەرەك-جاراعىمەن قوسا قىركۇيەكتىڭ 25- كۇنى وزىمەن بىرگە الا كەتىپتى. سودان بەرى 20 كۇننەن اسا دا، ءالى ەشقانداي حابار جوق.
بەكزات قويلىبايەۆ، گ. توقتاعۇلوۆانىڭ كۇيەۋى:
- بالالاردىڭ كيىمى جوق. ءبارىن جيناپ الىپ كەتىپ قالىپتى. بىلمەيمىن قايدا كەتكەنىن. وتباسىمىزدا ۇرىس-كەرىس ەشتەڭە بولعان جوق. ءبارى جاقسى بولدى.
گۇلجان توقتاعۇلوۆانىڭ نەگىزىنەن پسيحولوگيالىق اۋىتقۋى دا بار ەكەن. بۇعان دەيىن ول «اپايىمدى ىزدەيمىن» دەگەن سىلتاۋمەن ۇيدەن كەتىپ قالىپ، ءبىراز ۋاقىتتان كەيىن قايتىپ كەلىپتى. ءبىراق بۇل جولى بەكزات قويلىبايەۆ ايەلى مەن بالالارى ءۇشىن ەرەكشە الاڭداپ ءجۇر. سەبەبى كورشىلەرى گۇلجاننىڭ ءۇش بالاسىمەن بىرگە قارا «دجيپكە» وتىرىپ جاتقانىن كورىپتى. ال وتاعاسى ونداي قىمبات اۆتوكولىگى بار ەشقانداي تانىسىمىز جوق دەيدى.
بەكزات قويلىبايەۆ، گ. توقتاعۇلوۆانىڭ كۇيەۋى:
- تانىمايتىن بىرەۋ الىپ كەتتى ما ەكەن. ءبىر ءدىني اعىمعا كىرىپ كەتۋى مۇمكىن. مەشىتتىڭ ماڭىندا كوپ جۇرەتىن. سونداي كۇدىگىم بار.
گۇلجان توقتاعۇلوۆانىڭ 5 جانە 7 جاستاعى قىزدارىنىڭ ەسىمدەرى - ايجان مەن بالجان. سونداي-اق، 10 ايلىق ەمىزۋلى نۇريسلام دەگەن ۇلى بار. قازىر ولاردى ىزدەۋگە پوليتسيا جۇمىلدىرىلعان. ال ەگەر ءسىز بۇل ازاماتتار جايىندا قانداي دا ءبىر اقپارات بىلسەڭىز، ءبىزدىڭ رەداكسيامىزعا حابارلاسىڭىز. سەبەبى، ولاردى ارداقتى اكە سۇيىكتى كۇيەۋ ساعىنا كۇتىپ وتىر.
- جوعالماي تۇرىپ ءبارىمىز مەدەۋگە شىققانبىز. وتباسىمىزبەن قىدىرىپ. مىناۋ سول سۋرەتتەر. تەلەفوندا قالىپتى. فوتو قىلىپ شىعارعانمىن، - دەيدى بەكزات قويلىبايەۆ.
دوسجان مارات ۇلى
ktk
