شامشىدەن باتا العان ۇستاز
الماتى قالاسى، بوستاندىق اۋدانىنداعى № 88 جالپى ءبىلىم بەرەتىن مەكتەپتە مۋزىكا جانە تاريح پانىنەن ساباق بەرەدى.
شاكىرتتەرى حالىقارالىق، رەسپۋبليكالىق بايقاۋلاردا الدىڭعى ورىنداردان كورىنىپ، ەڭ جوعارى جەتىستىكتەرگە قول جەتكىزىپ كەلەدى.
ۇلاعاتتى ۇستاز بالا كەزىندە كورنەكتى سازگەر، قازاقستاننىڭ حالىق ءارتيسى ءشامشى قالداياقوۆتان باتا العان. ال كۇمىس كومەي، جەزتاڭداي ءانشى روزا رىمبايەۆامەن ءبىر ساحناعا شىعىپ، قوس داۋىستا ءان سالعان ءساتىن ءومىر جولىنداعى ساتتىلىكتەردىڭ بىرىنە بالايدى.
گۇلنارا التىنبەك قىزىنىڭ ايتۋىنشا، انشىلىك قاسيەت اكەسىنەن دارىپتى. وڭتۇستىك قازاقستان وبلىسى، وتىرار اۋدانى، ماياقۇم اۋىلىندا دۇنيەگە كەلگەن ول كىشكەنتايىنان ءشامشى اندەرىن تىڭداپ وسەدى. اكەسى التىنبەك راحيموۆ قازاق ءۆالسىنىڭ كورولى دەسە، ىشكەن اسىن جەرگە قوياتىن كورىنەدى.
جارى كانالكۇل مەن بىرىنەن كەيىن ءبىرى ومىرگە كەلگەن 11 بالاسىنىڭ ورتاسىندا وتىرىپ، «ارىس جاعاسىندا»، «سىر سۇلۋى»، «باقىت قۇشاعىندا»، «انا تۋرالى جىر»، «تەرىسكەي»، «اقەركە - اقجايىق»، «ءانىم سەن ەدىڭ»، «اقماڭدايلىم»، «اق بانتيك»، «قايىقتا» سياقتى اندەرىن شىرقاعاندا، تىڭداۋشىلارىن تاڭداندىرماي قويمايدى ەكەن.
- اكەم ءاندى جۇرەكپەن ايتاتىن. كوزىمىزدى اشقالى داۋىسىن ەستىپ، ونەرىن ۇيرەندىك. مەكتەپ قابىرعاسىندا دا كوركەم ونەرپازدار ۇيىرمەسىنە بەلسەنە اتسالىساتىنمىن. بىردە اۋىلعا ءشامشى اتامىز قوناققا كەلدى. اۋىل تۇرعىندارىمەن كەزدەستى. سول جۇزدەسۋ بارىسىندا «جاۋ، جاڭبىر» ءانىن ورىنداعانىمدا، ريزا بولىپ، اق باتاسىن بەرگەن. ەسەيگەندە ءانشى بولامىن دەپ ويلايتىنمىن. الايدا اكەم ۇستازدىق جولعا تۇسكەنىمدى قالادى، - دەيدى ول.
گۇلنارا التىنبەك قىزى مەكتەپ بىتىرگەننەن كەيىن، 1991 - جىلى ع. مۇراتبايەۆ اتىنداعى جەتىساي گۋمانيتارلىق كوللەدجىنىڭ مۋزىكا فاكۋلتەتىنە وقۋعا تۇسەدى. ءبىلىم ورداسىن اياقتاعان سوڭ اكە ءسوزىن جەرگە تاستاماي، ۇستازدىق قىزمەتكە كىرىسۋگە بەل بايلايدى. الماتىعا قونىس اۋدارىپ، № 88 جالپى ءبىلىم بەرەتىن مەكتەپكە مۋزىكا ءپانىنىڭ ۇستازى رەتىندە جۇمىسقا ورنالاسادى. 2003 - جىلى ءبىلىمىن جالعاستىرماق نيەتپەن قازاق مەملەكەتتىك قىزدار ۋنيۆەرسيتەتىنىڭ تاريح فاكۋلتەتىنە قۇجات تاپسىرادى. 2004 - جىلدان باستاپ، مۋزىكامەن بىرگە، تاريح پانىنەن دە ساباق بەرە باستايدى.
20 جىلدىق تاجىريبەسىندە تالاي تالانتتى بالالاردى ونەرگە باۋلىدى. ەل تاريحىن وقىتىپ، جان-جاقتى ءبىلىمدى ءارى ادامگەرشىلىگى مول ازاماتتاردى تاربيەلەپ شىعاردى. ءبىراق «ساحناعا شىقسام» دەگەن بالا ارمانىن ەش ۇمىتقان ەمەس. «ساباقتى ينە ساتىمەن» دەگەندەي، 2005 - جىلى ۇستازدار مەرەكەسىنە وراي، سول كەزدەگى الماتى قالاسىنىڭ اكىمى يمانعالي تاسماعامبەتوۆتىڭ باستاماسىمەن وتكەن مەرەكەلىك كونسەرتتە ويلاماعان جەردەن تىلەگى قابىل بولادى.
- روزا رىمبايەۆامەن جولىم كۇتپەگەن جەردەن ءتۇيىستى. مەرەكەلىك كەشكە سوڭعى دايىندىق ءجۇرىپ جاتقان. جۇرگىزۋشىلەر جانىما كەلىپ، توسىن ۇسىنىس ايتقاندا، جوسپارلارىنىڭ جۇزەگە اساتىنىنا كۇمانىم بولدى. ءبىراق كوپ ۇزاماي ستۋدەنتتەر سارايىنا حالىق ءارتيسى كىرىپ كەلگەندە، ءوز كوزىمە ءوزىم سەنبەدىم. ۇيىمداستىرۋشىلارعا «الدىن-الا نەگە ەسكەرتپەدىڭىزدەر، ءبىراز دايىندىق جاساۋ كەرەك ەدى عوي» دەگەنىمدە، «ول كىسى ءوزى تىڭداپ كورمەي، ەشتەڭە دەي المادىق» دەيدى. ونەر يەسى داۋىسىمدى ەستىپ، بىردەن كەلىسىمىن بەردى. ەرتەڭىنە قالا جۇرتشىلىعى الدىندا ءشومىشباي ساريەۆتىڭ ولەڭىنە جازىلعان ە. ىنتىقبايەۆتىڭ «قازاق ەلى» ءانىن بىرگە شىرقادىق. سول كەزدە ول كىسى «ءومىر بويى بىرگە ءان شىرقاپ جۇرگەندەيمىز» دەپ جىلى لەبىزىن ءبىلدىرىپ، مەنى شىن جۇرەكپەن قۇتتىقتادى. توبەم كوككە ەكى ەلى جەتپەي قالدى، اسەرىمدى سوزبەن جەتكىزە المايمىن. بۇكىل ۇستازدار قاۋىمى قۇتتىقتاپ، مەنىڭ عانا ەمەس، مەكتەپتىڭ مەرەيىن اسىردى. اننەن ءالى دە قول ۇزە قويعان جوقپىن.
قولىم قالت ەتسە، ءان سالعاندى دۇرىس كورەمىن. اسىرەسە، پاتريوتتىق شىعارمالار مەن ليريكالىق تۋىندىلاردى جانىم سۇيەدى. ونەر ادامدارىمەن ءجيى ارالاسىپ، اڭگىمە-دۇكەن قۇرىپ، شىعارماشىلىق قارىم-قاتىناس جاساپ تۇرامىن. مىسالى، مادەنيەت قايراتكەرى جۇبانىش جەكسەن ۇلىمەن ع. مۇراتبايەۆ اتىنداعى جەتىساي گۋمانيتارلىق كوللەدجىنىڭ مۋزىكا فاكۋلتەتىندە بىرگە وقىدىق. سول ۋاقىتتان بەرى بايلانىسىمىز ۇزىلگەن ەمەس. وتباسىمىزبەن ارالاسامىز. ونەردەگى وزگەرىستەر مەن جاڭالىقتاردى ۇنەمى سۇراستىرىپ، تالقىلاپ وتىرامىز، - دەيدى گۇلنارا راحيموۆا.
كەيىپكەرىمىز ۇستازدىق قىزمەتىندە دە ۇنەمى جاڭاشىلدىققا ۇمتىلادى. جاڭا تەحنولوگيالاردى قولدانا وتىرىپ، تىڭ ىزدەنىستەر جاسايدى. مەكتەپتەگى وتەتىن بارلىق مەرەكەلىك ءىس- شارالاردىڭ بەلسەندى ۇيىمداستىرۋشىسى.
رەسپۋبليكالىق گازەت-جۋرنالداردا ۇستازدىق تاجىريبەسىن ارىپتەستەرىمەن ءبولىسىپ وتىرادى.
- بيىلدان باستاپ ءان-كۇي ساباعىنىڭ وقۋ باعدارلاماسىنا قازاقستاننىڭ حالىق ءارتيسى، قايتالانباس ونەر يەلەرى روزا باعلانوۆا، بيبىگۇل تولەگەنوۆا، قايرات بايبوسىنوۆ، روزا رىمبايەۆالاردىڭ شىعارماشىلىعى، ءومىرى تۋرالى ارنايى باعدارلاما ەنگىزىلدى. الداعى ۋاقىتتا ەسىمى ەلگە تانىمال نۇرعالي ءنۇسىپجانوۆ، ەسكەندىر حاسانعاليەۆ، ماقپال ءجۇنىسوۆا، سەيدوللا بايتەرەكوۆ، «دوس-مۇقاسان» ءانسامبلى، اسەت بەيسەۋوۆ سىندى ونەر تارلاندارىن كەڭىنەن دارىپتەسە دەپ ويلايمىن، - دەيدى تاجىربيەلى ۇستاز.
ال تاريح ءپانى بويىنشا شاكىرتتەرىنە كەزىندە ءارتۇرلى سەبەپتەرمەن بۇرمالانعان وقيعالاردىڭ اق-قاراسىن اشىپ، تۇسىندىرۋگە تىرىسادى.
ەڭبەگى جەمىسسىز ەمەس. ونەرلى ورەندەرى رەسپۋبليكالىق، قالالىق، اۋداندىق، تەلەۆيزيالىق ءان بايقاۋلارىنان جۇلدەلى ورىندارعا يە بولدى. ماسەلەن، جاس ءانشى، «ەركە» توبىنىڭ بۇرىنعى مۇشەسى اسەل ءتاجىعۇلوۆا قازاق ەستراداسىندا تانىلىپ ۇلگەرگەن جاڭا ەسىمدەردىڭ ءبىرى. ەرنات مۇقاتاي، اسحات كامالوۆ، ءتاۋىرجان قودار - ت. جۇرگەنوۆ اتىنداعى ونەر اكادەمياسىنىڭ ستۋدەنتتەرى. ايگەرىم ۇزەنوۆا - 2011 - جىلى وتكەن «ەڭ ادەمى ارۋ» قالالىق بايقاۋىنىڭ 1- ورىن يەگەرى.
2012-2013 وقۋ جىلىندا بىتىرگەن تۇلەكتەرى زەرە احمەتقازى، ايگەرىم ماناپ، ايگەرىم تۇرسىن - «التىن بەلگى» يەلەرى.
سامات اندرەيەۆ، اسىل الىبەك قىزى، اقجان قۇلبالايەۆ، ادەل قاپار، سانجار تۇرسىن، انار قۋاتحان قىزى سىندى شاكىرتتەرىنىڭ بولاشاعىنان ۇلكەن ءۇمىت كۇتتىرەدى.
- قازاق تاريحىن، ونەرىن ءاربىر قازاق بالاسى جەتىك ءبىلۋى ءتيىس دەپ ەسەپتەيمىن. باستى ماقساتىم - ەلىمىزدىڭ ۇلتجاندى، پاتريوت ازاماتتارىن تاربيەلەۋ، ولارعا ساپالى ءبىلىم بەرۋ. دارىندى بالالاردىڭ تالانتى مەن قابىلەتىن اشىپ، ونەر الەمىنىڭ جاڭا تۇلعالارىن دايارلاۋ. وسى جولدا ايانباي ەڭبەك ەتىپ، الداعى ۋاقىتتا دا بار كۇش-جىگەرىمدى سارقا جۇمساۋعا كۇش سالامىن، - دەيدى گۇلنارا راحيموۆا.
اۆتور: بايداۋلەت قانشايىم
«ايقىن»
