ابايدىڭ ۇرپاعى مەملەكەت قامقورلىعىنا ءزارۋ مە؟
ساۋال بارىسىندا دەپۋتات قازاق حالقىنىڭ ۇلى اقىنى، ادامزات اۋقىمىنداعى كەمەڭگەر اباي قۇنانبايەۆتىڭ اۋلەتى كوممۋنيستىك قاتىگەز رەجيمنىڭ اياۋسىز قۋعىن-سۇرگىنىنە ۇشىراعانىن ايتىپ، اقىن بالالارى مەن باۋىرلارى اتىلعانىن، تۇرمەلەردە كوز جۇمىپ، جەر اۋدارىلعانىن ايتادى.
ونىڭ سوزىنە قاراعاندا، قاندى قىرعىننان امان قالعاندارى ۇلى وتان سوعىسىندا وققا ۇشتى. «مايدانعا اتتانعان ون ادامنان ەسەن-ساۋ ورالعانى - ابايدىڭ ماعاۋيادان تارايتىن شوبەرە قىزى سوعىسقا ءوزى سۇرانىپ كەتكەن. بەلگىلى قالامگەر مەدەۋ سارسەكەننىڭ دەرەكتەرى بويىنشا، اقىن ۇرپاعىنان بۇگىن ارامىزدا جۇرگەن جالعىز تۇياق - ابايدىڭ ءدىلدادان تۋعان ۇلى اقىلبايدىڭ بالاسى. اقىلبايدان ءرامىنقۇل، ودان باعىپۇر، سول باعۇپىردىڭ بالاسى اقىلبايەۆ ايدار مەن ونىڭ جالعىز ۇلى دانيار الماتى قالاسىندا تۇرىپ جاتىر. دانيار اقىلبايەۆ - ابايدىڭ بەسىنشى ۇرپاعى»، - دەيدى دەپۋتات.
دانيار اقىلبايەۆ لەنينگرادتاعى گيدرومەتەورولوگيا ينستيۋتىنىڭ «مۇحيت تانۋ» فاكۋلتەتىن بىتىرسە دە، ماماندىعى بويىنشا جۇمىس تابا الماي، ماڭعىستاۋداعى مۇناي كومپانياسىنىڭ بىرىندە ەڭبەك ەتەدى ەكەن. قازىر الماتىدا تۇرىپ جاتقان كورىنەدى.
«ابايدىڭ اقىن ۇلى، «ەڭلىك-كەبەك»، «ابىلاي» پوەمالارىن جازعان ماعاۋيانىڭ نەمەرەسى - قازەل جاعىپار قىزى دۇنيەدەن وزارىندا بەرىپ كەتكەن ەكى بولمەلى ەسكى ۇيدە ءۇش بالامەن تۇرىپ جاتىر. ابايدىڭ اقىلبايدان تارايتىن ءتورتىنشى ۇرپاعى دانياردىڭ اكەسى ا. اقىلبايەۆ تا الماتىدا، ءبىراق ءالى كۇنگە دەيىن باسپاناسى جوق»، - دەدى ا. سمايىل.
«وسى تۇستا ويلاناسىڭ، ۇلى اقىننىڭ قازاق حالقىنا رۋحاني تۇعىر بولىپ كەلە جاتقان، بولا دا بەرەتىن دانىشپاننىڭ بۇگىنگى تۇياقتارى مەملەكەتتىڭ قامقورلىعىنا بولەنۋگە ءتيىس ەمەس پە؟ مۇنى ەل ازاماتتارى بىزدەن بۇرىن دا ويلاعان. قازاق كەڭەستىك سوتسياليستىك رەسپۋبليكاسى حالىق كوميسسارلار كەڭەسىنىڭ 1945-جىلعى 15- تامىزداعى قاۋلىسى اباي ەسىمىن ماڭگىلىك ەستە قالدىرۋعا ارنالادى. 95 جانە 100 جىلدىق مەرەيتويلارىن جوعارى دەڭگەيدە اتاپ ءوتۋ ۇيعارىلادى.
اقىننىڭ سول كەزدەگى كوزى ءتىرى ۇرپاقتارى - اقىلباي ۇلى يسمايلعا، قازەل جاعىپاروۆاعا، ءۋاسيلا جاقىپوۆاعا، اقليا ورازبايەۆاعا، كاميلا وسپانوۆاعا، ءبيبى ىسقاقوۆاعا 500 رۋبل كولەمىندە دەربەس زەينەتاقى تاعايىندالادى. سۇراپىل سوعىستان سوڭعى قيىن جىلداردا دا قازاق ابزالدارى مەن ەل باسقارعان ەستىلەرى اقىن ۇرپاعىنا قۇرمەت كورسەتە العان. ءبىز دە تەكتىلىك دەڭگەيىنەن تابىلايىق، ايدار اقىلبايەۆقا باسپانا بەرىپ، كەمەڭگەردىڭ باتاسىنا كەنەلەيىك. اباي اۋلەتىن جالعاستىراتىن جالعىز ءۇمىت دانيار اقىلبايەۆتىڭ جاي-كۇيىمەن تانىسىپ، كومەك قولىمىزدى سوزايىق»، - دەدى دەپۋتات.
اۆتور: قانات مامەتقازى ۇلى
