بۇكىل الەمدىك تاەكۆوندو فەدەراتسياسىنداعى تۇڭعىش قازاق

بۇل قۋانىشتى حاباردى قازاقستان تاەكۆوندو فەدەراتسياسى تاراتتى. بۋتاندا وتكەن بۇكىل الەمدىك تاەكۆوندو فەدەراتسياسىنىڭ (WTF) كەزەكتەن تىس باسقوسۋىندا وسى ۇيىمنىڭ پرەزيدەنتى، دوكتور چۋنگ ۆون چو ارمان شىلمانوۆتىڭ قولىنا WTF اتقارۋ كوميتەتىنىڭ مۇشەسى سەرتيفيكاتىن تابىس ەتكەن. ارمان بۇل لاۋازىمعا ەكى جىلعا، ياعني 2016-جىلعى ريو-دە-جانايرو وليمپياداسىنا دەيىن سايلاندى.

ءسويتىپ، ارمان WTF-ءتىڭ بارلىق قابلداناتىن شەشىمدەرىنە رەسمي تۇردە داۋىس بەرۋ قۇقىعىنا يە بولدى. ول ەندى بۇكىل الەمدىك تاەكۆوندو فەدەراتسياسىنىڭ بارلىق باسقوسۋلارى مەن سايلاۋلارىنا قاتىساتىن بولادى.

قازىرگى تاڭدا WTF باسشىلارى جەكپە-جەك ەرەجەلەرىنە وزگەرىستەر ەنگىزۋمەن جانە ءوز قۇرامىنا وسى سپورت تۇرىمەن شۇعىلداناتىن باسقا دا ەلدەردى كوبىرەك تارتۋمەن اينالىسۋدا ەكەن.

وزدەرىڭىز بىلەسىزدەر، ارمان شىلمانوۆ - ازىرشە وليمپيادا ويىندارىنان جۇلدە العان جالعىز وتانداسىمىز. قازىر ول قازاقستان تاەكۆوندو فەدەراتسياسىنىڭ (WTF) سپورتتىق ديرەكتورى جانە مەملەكەتتىك جاتتىقتىرۋشىسى بولىپ قىزمەت ەتەدى.

ەندى ءبىر كوڭىل اۋدارارلىعى، ارمان شىلمانوۆ - WTF مۇشەسى بولىپ وتىرعان العاشقى جەرلەسىمىز. بۇعان دەيىن قازاقستان تاەكۆوندوسىنىڭ قايراتكەرلەرى تەك ازيا وداعى قۇرامىندا عانا بولعان.

اۆتور: نۇرعازى ساسايەۆ

«الاش ايناسى»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى