قاراعاندىداعى قايتا ىسكە قوسىلعان كرەمني زاۋىتى تولىقتاي مەملەكەت مەنشىگىنە ءوتتى

«بايتەرەك» حولدينگى «سامۇرىق قازىنا» ۇلتتىق ءال-اۋقات قورىمەن بىرگە قاراعاندىداعى مەتاللۋرگيالىق كرەمني ءوندىرۋ زاۋىتىن قايتا ىسكە قوستى. توعىز ايدان استام ۋاقىت بۇرىن ءبىز وسى جوبانى باستادىق. سىزدەر وسىنىڭ الدىنداعى مەنشىك يەلەرىنىڭ قارىزدارىنان قۇتىلا الماي، قازاقستاننىڭ دامۋ بانكىنەن العان نەسيەلەرىن قايتارا الماعانىن بىلەسىزدەر. ءبىز بۇل اكتيۆتى مەملەكەتكە قايتارىپ بەردىك»، - دەدى ق. بىشىمبايەۆ ءوندىرىستى ىسكە قوسۋ شاراسى بارىسىندا.

ول ەندى زاۋىتتىڭ 100 پايىز مەملەكەت مەنشىگىندە ەكەنىن اتاپ ءوتتى. كاسىپورىننىڭ تەحنيكالىق وندىرىستىك وپەراتورى «سامۇرىق قازىنا» ۇلتتىق ءال-اۋقات قورىنىڭ ەنشىلەس قۇرىلىمى «تاۋ-كەن سامۇرىق» كومپانياسى بولىپ تابىلادى.

قاراعاندى وبلىسىنىڭ اكىمى نۇرمۇحامبەت ابدىبەكوۆ ءوندىرىستىڭ الداعى ۋاقىتتا دامي تۇسەتىنىنە سەنىم ءبىلدىردى.

«بۇگىن ءبىزدىڭ وبلىسىمىز ءۇشىن ەرەكشە كۇن، كرەمني ءوندىرىسى قايتا ىسكە قوسىلۋدا، - دەدى ايماق باسشىسى. - زاۋىت ءونىمى الەمدىك نارىقتا سۇرانىسقا يە، ساپاسى جوعارى».

كومپانيا مالىمەتتەرى بويىنشا، زاۋىتقا 300 دەن استام مامان قايتىپ كەلگەن. «بايتەرەك» باسقارۋ حولدينگىنىڭ اقپاراتى بويىنشا، كاسىپورىندى جانداندىرۋ ءۇشىن باستاپقى پروتسەدۋرالارعا 1,4 ميلليارد تەڭگەدەن استام قاراجات جۇمسالدى.

ەسكە سالا كەتەيىك، مەتاللۋرگيالىق كرەمني شىعاراتىن قۇنى شامامەن 170 ميلليون دوللار بولاتىن «Silicium Kazakhstan»  ج ش س قاراعاندىدا 2008-جىلى سالىندى، الايدا ول ەكى جىل وتكەن سوڭ عانا ىسكە قوسىلدى. ەكى جىل جۇمىس ىستەگەننەن كەيىن زاۋىت جۇمىسى توقتاتىلدى. «Silicium Kazakhstan»  ج ش س-نىڭ قۇرىلتايشىلارى «باسكو»، «تيتان» جانە گەرمانيالىق «ThyssenKrupp Mannex» كومپانياسى بولدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى