مۇحتار ءابليازوۆتىڭ بالدىزىنا قاتىستى قىلمىستىق ءىس تەرگەلۋدە
«اگەنتتىكپەن بىرلەسىپ سىرىم شالابايەۆتىڭ زاڭسىز ءىس-ارەكەتتەرىنە قاتىستى تەرگەۋ ءىسى جۇرگىزىلۋدە. ق ر قىلمىستىق كودەكسىنىڭ 205- بابىنا ساي (سالىق رەجيمىن جۇرگىزۋدە زاڭسىز ارەكەت ەتۋ) تەرگەۋ امالدارى ءجۇرىپ جاتىر» - دەلىنگەن اتالمىش ۆەدومستۆو جىبەرگەن حاتتا.
ەسكە سالايىق، سىرىم شالابايەۆ ينتەرپول ىزدەستىرگەن تۇلعالار تىزىمىنەن كورىنبەي كەتكەن بولاتىن. ونى ۋكراينا بيلىگى ىزدەستىرگەن ەدى. ول 2013-جىلدىڭ شىلدە ايىنا دەيىن بۇل تىزىمدە تۇرعان.
سونداي-اق بۇدان بۇرىن ءمالىم بولعانداي، ونىڭ اتىراۋدا جالعان قۇجات جاساۋعا قاتىسى بارى انىقتالعان. شالابايەۆتىڭ اتىنا اتىراۋدا جالعان پاسپورت جاسالعان. بۇل قىلمىستىق ىسكە قاتىستى سوت جەتى ادامدى ايىپتاعان بولاتىن. ولاردىڭ ىشىندە كوشى-قون پوليتسياسىنىڭ قىزمەتكەرى جومارت كۇشاليەۆ تە بار. ول ءىرى كولەمدە پارا العانى ءۇشىن توعىز جىلعا سوتتالىپ، مۇلكى تاركىلەندى.
ايتا كەتۋ كەرەك، سوڭعى دەرەكتەرگە جۇگىنسەك، سىرىم شالابايەۆ قاشىپ ءجۇر. 2011-جىلى لوندون سوتى سوتقا قۇرمەت كورسەتپەگەنى ءۇشىن ونى 18 ايعا باس بوستاندىعىنان ايىرۋعا ۇكىم شىعارعان.
