ەلىمىزگە شەتەلدىك جۇمىس كۇشىن تارتۋ جۇيەسى تۇبەگەيلى وزگەرىسكە ۇشىرايدى
بۇل تۋرالى بۇگىن ماجىلىستەگى «نۇر وتان» پارتياسى فراكسياسى جانىنداعى الەۋمەتتىك كەڭەستىڭ شەتەلدىك جۇمىس كۇشىن تارتۋ ماسەلەسى تالقىلانعان وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.
ءمينيستردىڭ سوزىنە قاراعاندا، بۇگىنگى تاڭدا كوشى-قون جانە جۇمىسپەن قامتۋ ماسەلەلەرىنە ارنالعان زاڭ جوباسى ازىرلەنۋدە. اتالعان زاڭ جوباسى ءبىر جاعىنان ىشكى قاۋىپسىزدىك پەن ۇلتتىق ەڭبەك نارىعىن قورعاۋدى قامتاماسىز ەتۋگە باعىتتالسا، ەكىنشى جاعىنان ەكونوميكانىڭ كادرعا سۇرانىسىن قاناعاتتاندىرۋدى كوزدەيدى. بۇل رەتتە كادر سۇرانىسى نەگىزىنەن جوعارى بىلىكتى مامانداردىڭ ەركىن نارىعىن قۇرۋ، جۇمىس بەرۋشىلەر ءۇشىن شەتەلدىك جۇمىس كۇشىن تارتۋ ۇدەرىسىن ليبەرالداندىرۋ ارقىلى جۇزەگە اسىرىلماق.
«سونىمەن قاتار، زاڭ جوباسى وزدىگىنەن جۇمىسقا ورنالاسۋ ماسەلەلەرىن، شەتەلدىك مامانداردى كۆوتا مەن رۇقساتتان تىس وزدىگىنەن تارتۋ شارالارىن قاراستىرادى. بۇل باعىت نەگىزىنەن كۆوتادان تىس اتقارىلادى، الايدا شەتەلدىك جۇمىسشىلارعا رۇقساتتىڭ ورنىنا بىلىكتىلىككە ساي ەكەندىگى تۋرالى انىقتامالار بەرىلەدى.
ايتا كەتەرلىگى، بۇگىنگە دەيىن بىزدە ۇكىمەت ايقىنداعان ماماندىقتار ءتىزىمى بەكىتىلىپ كەلگەن بولاتىن. ءبىز بۇنى كۆوتادان تىس جۇزەگە اسىرۋدى ۇسىنامىز. ال الگىندەي انىقتامالار رۇقساتنامالاردىڭ ورنىنا جۇرەتىن بولادى. دەگەنمەن، انىقتاما نەگىزىنەن جۇمىسشىنىڭ بىلىكتىلىگى جوعارى ەكەنىن عانا راستايتىن بولادى. وسىعان وراي، شەتەلدىك جۇمىسشى قازاقستاننىڭ كەز كەلگەن وڭىرىنەن ءۇش ايدىڭ ىشىندە بىلىكتىلىگى بويىنشا كەز كەلگەن جۇمىستى تاۋىپ، وعان ورنالاسا الادى» ، - دەيدى ت. دۇيسەنوۆا.
بۇدان بولەك، مينيستر شەتەلدىك جۇمىس كۇشىن تارتۋ ۇدەرىسىن جەتىلدىرۋ اياسىندا جۇمىس بەرۋشىگە رۇقسات بەرۋ يدەولوگياسى تۇتاستاي قايتا قارالاتىنىن اتاپ ءوتتى. «ءبىز نەنى قايتا قاراۋدى جوسپارلاپ وتىرمىز؟ ۇسىنىلاتىن ءتارتىپ بويىنشا كۆوتالار ەكونوميكالىق بەلسەندى حالىققا شاعا وتىرىپ ەسەپكە الىنبايدى، كەرىسىنشە سالالار بويىنشا ەسەپتەلەتىن بولادى. ماسەلەن، ەكونوميكالىق قىزمەت تۇرلەرى بويىنشا وسى سالا قىزمەتكەرلەر سانىنىڭ پايىزدىق قاتىناسىنا قاراي بولىنەدى»، - دەدى ت. دۇيسەنوۆا. ونىڭ ايتۋىنشا، قازىرگى كۇنى شەتەلدىك جۇمىس كۇشىن تارتۋعا كۆوتا مولشەرى ەكونوميكالىق بەلسەندى حالىق سانىنا شاعىلىپ انىقتالادى. «الايدا، بۇل رەتتە قاي سالاعا شەتەلدىك جۇمىس كۇشىنىڭ كوبىرەك كەرەك ەكەنىن ەشكىم دە ايتا المايدى»، - دەيدى مينيستر.
اۆتور: قانات مامەتقازى ۇلى
