قازاقستان شەتەلدىك تالانتتى جاستاردى وقىتىپ، جۇمىسقا ورنالاستىرۋ ءۇشىن گرانت ءبولۋدى قاراستىرادى
بۇل تۋرالى بۇگىن ماجىلىستەگى «نۇر وتان» پارتياسى فراكتسياسى جانىنداعى الەۋمەتتىك كەڭەستىڭ وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.
ءمينيستردىڭ سوزىنە قاراعاندا، بۇگىنگى كۇنى ەلىمىزدەگى ەڭبەك رەسۋرسىنىڭ تاپشىلىعىن ەڭسەرۋ ماقساتىندا شەت ەلدىك جۇمىس كۇشىن تارتۋعا جاعدايلار جاسالعان. ال شەت ەلدىك ەڭبەك كۇشى نەگىزىنەن جۇمىس بەرۋشىلەر تاراپىنان ۇسىنىلاتىن كۆوتا مەن رۇقساتتار بويىنشا نەمەسە يندۋستريالاندىرۋ كارتاسىنىڭ باسىم جوبالارىن جۇزەگە اسىرۋ اياسىندا، سونداي- اق كورپوراتيۆتىك اۋىسۋلار جانە حالىقارالىق كەلىسىمشارتتار ارقىلى تارتىلادى.
«ەڭبەك نارىعىن رەتتەۋدەگى تاعى ءبىر باسىم باعىت ەلىمىزگە تالانتتى شەت ەلدىك جاستاردى تارتۋ. بۇل رەتتە ءبىز تيىسىنشە گرانتتار ءبولۋدى قاراستىرماقپىز. جالپى، بۇنداي پراكتيكا بارلىق جەردە قولدانىلادى. ەگەر تالانتتى جاستار بىزدە وقىسا، وندا ءبىز ولارعا وقۋىن بىتىرگەننەن كەيىن قازاقستاندا ءۇش جىل بويى ءوزى وقىعان ماماندىعى بويىنشا جۇمىس ىستەۋىنە مۇمكىندىك بەرەمىز، ولار وسى مەزگىل ارالىعىندا كۆوتا نەمەسە ارنايى رۇقساتسىز جۇمىس ىستەي الاتىن بولادى» ، - دەدى تامارا دۇيسەنوۆا.
ونىڭ ايتۋىنا قاراعاندا، ءۇش جىل وتكەننەن كەيىن الگى گرانت يەسى ءوزىنىڭ شەتەلدىك جۇمىس كۇشى رەتىندەگى مارتەبەسىن ناقتىلاۋى كەرەك. ياعني، ولار نە جۇمىس بەرۋشىنىڭ كۆوتاسى ارقىلى، نە وزدىگىنەن جۇمىسقا ورنالاسۋعا كەلگەن شەتەلدىك ەكەنى تۋرالى مارتەبەنى الۋى كەرەك. ءمينيستردىڭ سوزىنە قاراعاندا، بۇنداي شارا قازاقستاننىڭ حالىقارالىق ەڭبەك نارىعىنا ينتەگراتسياسىن قامتاماسىز ەتىپ قانا قويماي، شەتەلدىك جوعارى بىلىكتى جۇمىس كۇشىن تارتۋعا، سونداي- اق ىشكى ەڭبەك نارىعىن قورعاۋعا سەپتىگىن تيگىزەدى.
اۆتور: قانات مامەتقازى ۇلى
