ساراپشىلار: ەۋرازيالىق ەكونوميكالىق وداق قىتاي ءۇشىن جاڭا مۇمكىندىكتەر اشادى - فوتو
بۇل ويدى قىتاي ساراپشىلارى بۇگىن ق ح ر-داعى ق ر ەلشىلىگىندە «ەۋرازيالىق كەڭىستىكتەگى گەوساياسي احۋال جانە قازاقستان مەن قىتاي قارىم-قاتىناسى» تاقىرىبىندا وتكەن دوڭگەلەك ۇستەل بارىسىندا ايتتى.
ق ح ر مەملەكەتتىك كەڭەسى جانىنداعى دامۋ پروبلەمالارىن زەرتتەۋ ورتالىعىنىڭ ەۋرازيالىق الەۋمەتتىك دامۋ ينستيتۋتىنىڭ باسشىسى چجاو چانتسين، قىتاي حالىقارالىق زەرتتەۋلەر اكادەمياسى ەۋرازيا ينستيتۋتى ديرەكتورىنىڭ ورىنباسارى لي سزىگو، قىتاي زاماناۋي حالىقارالىق قارىم-قاتىناستار اكادەمياسىنىڭ ورتالىق ازيا ءبولىمىن مەڭگەرۋشىسى دين سياوسين، قىتاي قوعامدىق عىلىمدار اكادەمياسىنىڭ رەسەي، شىعىس ەۋروپا جانە ورتالىق ازيا ينستيتۋتىنىڭ ورتالىق ازيا ءبولىمىنىڭ مەڭگەرۋشىسىنىڭ ورىنباسارى چجان نين مەن باسقا دا ءبىرقاتار ساراپشىلار بەيجىڭنىڭ ە ا ە و ەلدەرىمەن ىنتىماقتاستىعىنا قاتىستى وڭ بولجامدارىن ءبىلدىردى.
ەكىجاقتى تاۋار اينالىمىنا كەرى اسەرىن تيگىزۋى مۇمكىن فاكتورلار رەتىندە قىتاي عالىمدارى ءونىم ستاندارتتارىنىڭ كوتەرىلۋى مەن قازاقستانداعى كەدەندىك باج سالىعىنىڭ ۇلعايۋىن اتادى.
قىتايداعى قازاقستان ەلشىسى نۇرلان ەرمەكبايەۆ شاراعا قاتىسۋشىلاردى مەملەكەت باسشىسىنىڭ قازاقستان حالقىنا ارناعان «قازاقستان جولى-2050: ءبىر ماقسات، ءبىر مۇددە، ءبىر بولاشاق» جولداۋىندا ەل الدىنا قويعان ناقتى مىندەتتەر جايلى حاباردار ەتتى. ول سونداي-اق قازاقستاننىڭ قىتايعا فوسفور تىڭايتقىشتارىن، كومىر جانە اۋىل شارۋاشىلىعى ونىمدەرىن ەكسپورتتاۋعا الەۋەتى مول ەكەنىن اتاپ ءوتتى.
