شەكاراداعى اتىستان سوڭ وڭتۇستىك كورەيا «بەس قارۋىن» سايلاي باستادى
بۇل تۋرالى بۇگىن اسكەري شتاب باسشىلارىنىڭ بىرىككەن كوميتەتىنەن حابارلادى.
ەسكە سالا كەتەيىك، وتكەن اپتادا قوس كورەيا اسكەريلەرى سولتۇستىك دەماركاتسيالىق اۋماقتا جانە تەڭىز شەكاراسىندا ءبىر- بىرىنە وق جاۋدىرعان بولاتىن.
سارى تەڭىزدە ورنالاسقان اتالمىش تەڭىز شەكاراسى سولتۇستىك جانە وڭتۇستىك كورەيا مەملەكەتتەرىنىڭ اراسىنداعى ەڭ داۋلى اۋماق بولىپ تابىلادى جانە 1999, 2002 مەن 2009 - جىلدارى ەڭ قانتوگىستى قاقتىعىستار وسى جەردە ورىن العان.
«سولتۇستىكتەن كەنەت شابۋىلدارعا جانە سارى تەڭىزدەگى ءبىرقاتار ارالداردى باسىپ الۋعا توتەپ بەرۋ ءۇشىن سول وڭىرگە قوسىمشا Chiron Man زىمىراندارى مەن بروندى تەحنيكا جەتكىزىلدى» ، - دەلىنگەن اسكەري شتاب باسشىلارىنىڭ بىرىككەن كوميتەتى (Joint Chiefs of Staff) تاراتقان حابارلامادا.
سونداي- اق 155 م م جانە 105 ميلليمەترلىك ارتيللەريا جاقىن ماڭعا ورنالاستىرىلعان.
«اسكەريلەر ەگەر سولتۇستىك كورەيا تاراپىنان تۇتقيىلدان شابۋىلى جاسالاتىن جاعدايدا قولعا الىناتىن شارالاردىڭ بىرنەشە نۇسقاسىن دايىنداۋدا» ، - دەپ جازادى JCS.
سونىمەن قاتار باياندامادا اتاپ كورسەتىلگەنىندەي، سەۋل تاراپى اسكەري جاساقتىڭ تولىق دايىندىعىن قامتاماسىز ەتىپ وتىر.
ءوز كەزەگىندە ساياساتكەرلەر شەكارادا ورىن العان مۇنداي وقىس جاعدايدىڭ ورىن الۋى ەكى مەملەكەتتىڭ جىلىپ كەلە جاتقان قارىم- قاتىناسىنا بالتا شابۋى ىقتيمال دەپ باعا بەرە باستادى. بۇعان دەيىن ينچحوندا ەكى مەملەكەتتىڭ لاۋازىمدى تۇلعالارى كەزدەسىپ، قاراشا ايىنىڭ باسىندا تاعى ءبىر ماڭىزدى ساياسي تالقىلاۋلار وتكىزۋ جونىندەگى ۋاعدالاستىق جاساسقان، الايدا پحەنيان تاراپى وسى اتىستاردان كەيىن بۇل كەلىسىم ورىندالماۋى مۇمكىن ەكەندىگىن ايتۋدا.
اۆتور: جاسۇلان جولدىبايەۆ
