اقساقالدارمەن اقىلداسا وتىرىپ قۇسبەگىلىكتىڭ جاڭا ەرەجەلەرىن جاساۋ قاجەت - ە. قاناعاتوۆ
بۇل تۋرالى بۇگىن الماتىدا «بۇركىتشى» فەدەراتسياسى مەن مەملەكەتتىك ورگانداردىڭ اراسىندا قىران قۇستاردى قورعاۋ بويىنشا بايلانىس ورناتۋ» اتتى دوڭگەلەك ۇستەل بارىسىندا ق ر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ ءتوراعاسى ەلسيار قاناعاتوۆ ءمالىم ەتتى.
ونىڭ ايتۋىنشا، قازاقستاندا ۇلتتىق سپورت تۇرلەرىن دامىتاتىن ۋاقىت كەلىپ جەتتى.
«قۇسبەگىلىك - ەلىمىزدە كەنجەلەپ قالعان ونەر. كەزىندە ول نە ونەر ەمەس، نە سپورت ەمەس، ءبىر اۋىر كۇي كەشكەن كەزدە قۇسبەگىلىكپەن اينالىساتىن اقساقالدارمەن اقىلداسا وتىرىپ، اڭ اۋلايتىن جىرتقىش قۇستاردى باپتاۋ، اڭعا سالۋ ەرەجەلەرىن جاساپ ەدىك. قازىر ول مۇلدەم ەسكىردى. ەندى حالىقارالىق تاجىريبەلەرگە سۇيەنە وتىرىپ، قۇسبەگىلىكتىڭ جالپى جاڭا ەرەجەلەرىن، ادىستەمەسىن جاساپ، ونى ۇلتتىق سپورتتىڭ ءبىر ءتۇرى رەتىندە ءارى قاراي دامىتۋىمىز قاجەت. ول ءۇشىن بيۋدجەتتەن قارجىلاندىرىلاتىن مەملەكەتتىك ورتالىق اشۋ قاجەت دەپ سانايمىن. مىنە، سول ورتالىقتا كوكپار بولسىن، توعىزقۇمالاق بولسىن، بۇركىتشىلىك بولسىن، بارلىق ۇلتتىق سپورت تۇرلەرىنىڭ ماماندارى جينالىپ، اركىم ءوز سالاسىن دامىتۋ بويىنشا جۇمىس جاسار ەدى. ودان كەيىن ءار وبلىستا ۇلتتىق سپورت مەكتەپتەرىن، بولىمشەلەرىن اشىپ، وندا جاستاردى ۇلتتىق سپورت تۇرلەرىنە ۇيرەتۋىمىز كەرەك»، - دەدى ە. قاناعاتوۆ.
ايتا كەتەيىك، بۇل جيىنعا قۇسبەگىلەر، ق ر مادەنيەت جانە سپورت مينيسترلىگى مەن ق ر ۇلتتىق سپورت تۇرلەرى قاۋىمداستىعىنىڭ وكىلدەرى، سونداي- اق زوولوگ جانە بيولوگ عالىمدار قاتىستى.
اۆتور: جاپپاربەرگەن ايبوتا
