ايەلدەر شالبارىنىڭ شىعۋ تاريحى
ءبىرىنشى دۇنيەجۇزىلىك سوعىسقا دەيىن ايەلدەردە شالبار كيۋ ءداستۇرى بولماعان. بۇل ۋاقىتتا ايەلدەردىڭ كيىم ۇلگىسىندە كويلەكتەر، كەڭ ەتەكتى بەلدەمشەلەر تانىمال ەدى. ءبىراق سوعىس باستالعاننان كەيىن ايەلدەرگە مۇنداي كيىممەن ءجۇرۋ ىڭعايسىز بولادى. ءسويتىپ، ولار ەر ادامدارشا كيىنە باستايدى. سەبەبى، ەرلەرى سوعىسقا كەتكەندە ۇيدەگى بار شارۋانى ايەلدەرگە ءوز موينىنا الۋعا تۋرا كەلدى. وسىلايشا ايەلدەر العاش رەت شالبار كيگەن بولاتىن.
سوعىس ءجۇرىپ جاتقان كەزدە ايەلدەر شالباردى تەك جۇمىس كيىمى رەتىندە عانا پايدالانعان. ءبىراق، ۋاقىت وتە كەلە ولار شالباردىڭ ىڭعايلى ءارى جايلى كيىم ەكەنىن بايقايدى دا، مۇنى جۇمىستان تىس ۋاقىتتا دا كيەتىن بولادى.
سوعىس اياقتالعاننان كەيىن ايەلدەر گاردەروبىندا ەر ادامداردىڭ ءبىراز كيىم ۇلگىلەرى پايدا بولا باستايدى. اسىرەسە، 20-جىلدارى ءسان الەمىندە ەلەۋلى وزگەرىستەر ورىن الادى. بۇل كەزدە ايگىلى كيىم ديزاينەرى كوكو شانەل شالبارلاردىڭ ايەلدەر گاردەروبىنىڭ اجىراماس بولىگىنە اينالاتىنداي ۇلگىلەرىن جاساپ شىعارادى. وسىلايشا «شالبار تەك ەرلەردىڭ كيىمى» دەگەن ستەرەوتيپ حالىق ساناسىنان بىرتە-بىرتە جويىلا باستايدى.
ءبىراق ايەلدەردىڭ شالبار كيۋىنە قارسىلىق تانىتقاندار دا از ەمەس ەدى. اسىرەسە، ەكىنشى دۇنيەجۇزىلىك سوعىس اياقتالعانشا ايەلدەردىڭ شالبار كيۋىنە تىيىم سالىنادى. ونىڭ ۇستىنە سوعىستان كەيىنگى داعدارىس ايەلدەردى قايتادان كەڭ ەتەكتى كويلەكتەردى كيۋگە ماجبۇرلەيدى. سوعان قاراماستان شالباردى كۇندەلىكتى كيەتىن كيىمىنە اينالدىرعان ايەلدەر دە بولعان. سونداي-اق، ايەلدەردىڭ قوعامدىق جۇمىستارعا ارالاسۋى دا ولاردىڭ شالبار كيۋىنە سەبەپشى بولادى.
دايىنداعان: گۇلنۇر باقىتبەكوۆا
massaget.kz
