بانكتەن ءىرى مولشەردە اقشا ۇرلاپ قاشقان قازاقستاندىق ەلگە اكەلىندى

ول سەنىپ تاپسىرىلعان بوتەننىڭ مۇلكىن يەلەنىپ الۋ جانە ىسىراپ ەتۋ، سونداي-اق قىلمىستىق جولمەن الىنعان اقشانى زاڭداستىرۋ ءۇشىن قازاقستان رەسپۋبليكاسى قىلمىستىق كودەكسىنىڭ 176-بابىنىڭ 3- ءبولىمىنىڭ «ا»، «ب» - تارماقتارى، 193-بابىنىڭ 3- ءبولىمىنىڭ «ب»، «ۆ» - تارماقتارى بويىنشا قىلمىستىق جاۋاپكەرشىلىككە تارتىلاتىن بولادى. بۇل تۋرالى قازاقستان رەسپۋبليكاسى باس پروكۋراتۋراسىنىڭ باسپا ءسوز قىزمەتى حابارلادى.

«قىلمىستىق قۋدالاۋ ورگانى ە. قوسايەۆتى 2005-جىلدان 2008-جىلعا دەيىنگى ارالىقتا ۇيىمداسقان قىلمىستىق توپتىڭ قۇرامىندا ارەكەت ەتە وتىرىپ، «ب ت ا بانك» ا ق-نىڭ اقشالاي قاراجاتىن ءىرى مولشەردە ۇرلاعانى، كەيىننەن ولاردى زاڭداستىرعانى ءۇشىن ايىپتاۋدا.

قىلمىس جاساعان سوڭ قوسايەۆ قىلمىستىق قۋدالاۋ ورگاندارىنان جاسىرىنىپ ءجۇردى، سوندىقتان بىرنەشە جىل مەملەكەتارالىق ىزدەۋدە بولدى. ونى رەسەيلىك قۇقىق قورعاۋ ورگاندارى بريانسك قالاسىندا ۇستادى.

ەكى ەلدىڭ باس پروكۋراتۋرالارىنىڭ جاقسى جولعا قويىلعان جۇمىسىنىڭ جانە ءتيىمدى ءوزارا ءىس-قيمىلىنىڭ ناتيجەسىندە قوسايەۆتى قازاقستانعا بەرۋ تۋرالى شەشىم قابىلداندى.

بۇگىن، 21- قىركۇيەكتە رەسپۋبليكا باس پروكۋرورىنىڭ نۇسقاۋى بويىنشا قۇقىق قورعاۋ ورگاندارىنىڭ قىزمەتكەرلەرى قوسايەۆتى رەسەيدەن قازاقستان اۋماعىنا الىپ كەلدى جانە ول استانا قالاسىنىڭ ۋاقىتشا ۇستاۋ اباقتىسىنا قامالدى»، - دەپ جازىلعان حابارلامادا.

قازىرگى ۋاقىتتا ءىس بويىنشا تەرگەۋ جۇرگىزىلۋدە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى