ون ءبىر تۋر بويى جەڭىلىسسىز كەلەدى

كەزدەسۋ الاڭ يەلەرىنىڭ باسىمدىلىعىمەن ءوتتى. 18-مينۋتتا ماگامەد ۋزدەنوۆ قوناقتار قاقپاسىنىڭ كىلتىن تاپسا، ەكىنشى تايم باسىندا ەمير يۋشيچ پەن رۋستام ساحيبوۆ ەسەپتى 3:0 گە جەتكىزدى. ءبىراق قاراتاۋلىقتار دا بەرىلمەي باقتى. كوپ ۇزاماي ەرقاسىم ەشەنقۇل قوس دوپتىڭ اۆتورى اتانعانىمەن، «لاشىننىڭ» بۇدان ارىگە شاماسى جەتپەدى. ءسويتىپ ويىن 3:2 ەسەبىمەن اياقتالىپ، «اقجايىق» كەزەكتى جەڭىسىنە قول جەتكىزدى.

بۇل تۋردا ورالدىقتاردىڭ نەگىزگى قارسىلاستارى ءساتسىز ويناپ، ۇپاي جوعالتتى. كوش باسىنداعى كوكشەنىڭ «وقجەتپەسى» استانادا «استانا-1964» كومانداسىنان 1:4 ەسەبىمەن ويسىراي ۇتىلسا، اقتاۋدىڭ «كاسپيى» ماقتاارالدا ەڭ سوڭعى ورىنداعى «ماقتاارالمەن» تەڭ وينادى. كۇنى بۇگىن «وقجەتپەستە» 46 ۇپاي بولسا، شىمكەنتتىڭ «قىرانى» مەن «كاسپيدىڭ» ودان ءبىر ۇپايى كەم. بۇلاردى وكشەلەپ كەلە جاتقان «اقجايىقتىڭ» ەنشىسىندە 44 ۇپاي بار. دەمەك، پرەمەر-ليگاعا بەرىلەر جولداما تاعدىرىن الداعى ويىندار شەشەدى دەگەن ءسوز بۇل.

باتىس قازاقستاندىقتار كەلەسى كەزدەسۋىن 27- قىركۇيەك كۇنى تەمىرتاۋدا «بولات-امت» كومانداسىمەن وتكىزەدى.

ايتا كەتەيىك، سەرگەي ۆولگين باپتايتىن «اقجايىق» 15- ماۋسىمنان بەرى، 11 تۋر بويى جەڭىلىس ءدامىن تاتپاي كەلەدى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى