ورالدا «ماڭگىلىك ەلدىڭ التىن ادامى» ساحناعا شىقتى

تەاتر ديرەكتورى قۋانىش اماندىقوۆتىڭ اتاپ وتكەنىندەي، باتىس قازاقستاندىق قازاق تەاترىنىڭ 22-ماۋسىمى جىلداعىداي «ماحامبەتپەن» ەمەس، بيىل اتالمىش قويىلىممەن اشىلدى. سپەكتاكلدى كەزىندە وسى تەاتردا قىزمەت اتقارعان قازاقستاننىڭ ەڭبەك سىڭىرگەن ءارتىسى، «قۇرمەت» وردەنىنىڭ يەگەرى مۇرات احمانوۆ ساحنالادى. سۋرەتشىسى - قايىر ورازعاليەۆ.

وقيعا اعايىن اراسىنداعى تالاس-تارتىس ارقىلى ءوربيدى. اقىرى ونىڭ سوڭى ارعىنبايداي (باقىتجان وتەعاليەۆ) باتىردىڭ ولىمىنە اكەلىپ سوعادى. قۇنىكەر جاق «قانعا قان» دەپ تۇرىپ الادى. ياعني ايىپتى جاقتان ءبىر ادامنىڭ باسى كەسىلۋى ءتيىس. بيلەر شەشىمى دە وسىعان تىرەلەدى. مىنە، سول ساتتە ورتاعا قازىناداي (حورلان شامەلوۆا) ەل اناسى شىعىپ، ءوز كەسىمىن ايتىپ، اراشا تۇسەدى.

بۇدان كەيىن باتىرى ولگەندەر كۇڭ ەتىپ ءتورت قىزدى بەرۋدى تالاپ ەتەدى. مۇنى دا قازىنا بولدىرمايدى. اقىرى ەكى جاقتى ءبىتىستىرىپ تىنىپ، التىن ايەلگە اينالادى. شىعارما ەلباسىنىڭ ماڭگىلىك ەل يدەياسىمەن ۇندەس، حالىقتى بەرەكە-بىرلىككە جەتەلەيدى. سپەكتاكلدە سونداي-اق ەربول ەسەندوسوۆ، مۇقانعالي تومانوۆ، سامال ءابۋوۆ سىندى تەاتردىڭ بەلدى ارتىستەرى وينايدى.

تۋىندى اۆتورى يران-عايىپتىڭ ايتۋىنشا، شىعارما بۇدان وتىز جىلداي بۇرىن سىر وڭىرىنە بەلگىلى «قازىنا» دەگەن داستاننىڭ ىزىمەن جازىلعان. ارادا وسىنشاما ۋاقىت وتكەندە، ونىڭ اق جايىق ساحناسىندا قويىلۋىنىڭ بەينەلىك ءمانى بار. بۇدان ەكى جىل بۇرىن تەرەكتى اۋدانىنداعى تاقساي قورىمىنان «التىن حانشايىم» تابىلىپ، ول تاياۋدا قالپىنا كەلتىرىلىپ، وبلىستىق تاريحي-ولكەتانۋ مۋزەيىنە قويىلعان بولاتىن. ەندى، مىنە، تاعى ءبىر «التىن ايەل» ورال ساحناسىنا جول تارتىپ وتىر. ەلدىڭ بىرلىگىن ساقتايتىن دا وسىنداي التىن ادامدار بولسا كەرەك.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى