ريزابەك نۇسىپبەك ۇلى: بۇل شىعارما مەنىڭ اتا- اناما، تۋعان تۋىستارىما دەگەن شىنايى سۇيسپەنشىلىكتەن تۋدى - كەسكىن
«نۇر وتان» پارتياسى «باقىتتى وتباسى» جوباسى اياسىندا ۇيىمداستىرعان اكتسيا «وتباسىمنىڭ تاريحى» تاقىرىبىن قامتىدى. قورىتىندىسى بۇگىن شىعارىلعان ەرەكشە بايقاۋعا قاتىسۋشىلار تاراپىنان اسا بەلسەندىلىك بايقالدى.
كەلىپ تۇسكەن جۇزدەگەن جۇمىستىڭ اراسىنان 60 شىعارما ىرىكتەلگەن. ولاردىڭ ىشىندە ۇزدىك شىققان ازاماتتارمەن ارنامىزدىڭ تىلشىلەرى جۇزدەسىپ قايتقان ەدى.
وردا بۇزار وتىز جاسقا اياق باسقان ريزابەك نۇسىپبەك ۇلى التايدىڭ ارعى بەتىندە دۇنيەگە كەلگەن ازامات قازىر حالىقارالىق قازاقپارات اگەنىتتىگىنىڭ شەف-رەداكتورى. كوپبالالى وتباسىندا وسكەن ول اكەنىڭ ايالى الاقانىن سەزىنىپ، انا مەيىرىمىنە بولەنىپ ەرجەتكەنىن تەبىرەنە ەسكە الادى. «ۇيادا نە كورسەڭ، ۇشقاندا سونى ىلەسىڭ» دەگەندەي سول اياۋلى جانداردان العان تاعىلىمدى ءوز پەرزەنتتەرىمە سىيلاۋ ازاماتتىق بورىشىم دەيدى.
ريزابەك نۇسىپبەك ۇلى، «وتباسىمنىڭ تاريحى» بايقاۋىنىڭ جەڭىمپازى:
«جۇرەكتەن شىققان سوز جۇرەككە جەتەدى»، دەيدى. بۇل شىعارما مەنىڭ اتا- اناما، اعا باۋىرلارىما دەگەن شىنايى سۇيسپەنشىلىكتەن تۋدى. وتان وتباسىنان باستالادى ءار- ءبىر شاڭىراق قوعامنىڭ ءبىر- ءبىر تال ۋىعى. ءار وتباسىندا بەرەكە بولسا، قوعامدا بەرەكە بولادى. ء"وز- اعاسىن اعالاي الماعان، كىسى اعاسىن جاعالاي المايدى" دەيدى حالقىمىز. باسقالاردى قۇرمەتتەۋ ءوز اتا- اناسىن قۇرمەتتەۋدەن، اعا باۋرىن سىيلاۋدان باستالادى. وسى قاسيەت بىرتىندەپ حالىقتى سۇيۋگە كوپشىل بولۋعا ۇلاسادى. سول ارقىلى قوعامدا مەيرىمدى باۋىرمال ادامدار كوبەيدى، دەپ بىلەمىن.
«وتباسىمىزدىڭ قورعانى - اكەمىز نۇسىپبەك بەگاسىل ۇلى رۋحى بيىك ەڭسەلى كىسى. ءومىر ەرتە ەسەيتىپ ءىنى- قارىنداستارىنا باس بولىپ، ءبىر- ءبىر شاڭىراققا اينالدىرعان. انام ءزابيلا قيبات قىزى - مەن ءۇشىن الەمدەگى ەڭ مەيرىمدى جان. اۋلەتىمىزدىڭ ۇيتقىسى، جىلۋى، بەرەكەسى ادەمى الديىمەن، ماعىنالى ەرتەگىلەرىمەن ءومىردىڭ ءمانىن سانامىزعا ءسىڭىردى، جاقسى جامانىن ۇعىندىردى. ادامداردى سۇيۋگە، مەيىرىمدى بولۋعا شاقىردى» . وتباسى تۋرالى تولعانعان ريزابەكتىڭ جۇرەگىن جارىپ شىققان جولدار وسىلاي سويلەيدى. التى بالا ەر جەتتىك. بۇگىندە ءاربىرىمىزدىڭ وتباسىمىز بار. ءبىراق كۇيبەڭ تىرشىلىككە ەرىپ باۋىرلاردى ۇمىتۋ دەگەن بىزدە جوق ءاردايىم ساعىنا قاۋىشامىز دەيدى كەيىپكەرىمىز. وسى رەتتە وتباسى دەگەن قۇندىلىقتى قۇرمەتتەگەن «نۇر وتانعا» دا شەكسىز ريزاشىلىعىن بىلدىرە كەتتى.
ريزابەك نۇسىپبەك ۇلى، «وتباسىمنىڭ تاريحى» بايقاۋىنىڭ جەڭىمپازى:
بۇل - جاستارعا بەرەرى مول جوبا. ءار وتباسىنىڭ قۇندىلىقتارىن ساقتاۋدا ماڭىزى ەرەكشە. وسى ورايدا مۇنداي جوبانى قولعا الىپ ۇيىمداستىرعان «نۇر وتان» پارتياسىنا العىس ايتامىن.
كەلەسى كەيىپكەرىمىز - ورالدىق گوردەي تريشەنكوۆ. 26 جاستاعى ازاماتتىڭ ەكى قولى مەن ەكى اياعى كەمتار. ءبىراق ول ەشقاشان مويىعان ەمەس. كەرىسىنشە، ونەرىن شىڭداۋعا تىرىسادى. ءان شىعارادى، پوەزياعا دا جانى جاقىن. كومپيۋتەردى جەتىك مەڭگەرگەن گوردەي جەرگىلىكتى باسىلىمدا جۇمىس ىستەيدى. ايتۋىنشا، جارىمەن دە الەۋمەتتىك جەلى ارقىلى تانىسقان. ال وسىدان ەكى اپتا بۇرىن تريشەنكوۆتەر شاڭىراعىندا ءسابي ومىرگە كەلدى.
گوردەي تريشەنكوۆ، «وتباسىمنىڭ تاريحى» بايقاۋىنىڭ جەڭىمپازى:
جۇمىستان قولىم بوساعاندا قالا مەن تابيعات كورىنىستەرىن فوتوعا تۇسىرگەندى جانىم سۇيەدى. كىتاپ وقىپ تۇرامىن. مەنىڭ ۇستانىمىم - ءومىردى سول كۇيىندە سۇيە ءبىلۋ كەرەك، ونىڭ ءار ساتىنەن ءلاززات الا ءبىلۋ كەرەك.
بايقاۋدىڭ باستى ماقساتى - وتباسى ينستيتۋتىن نىعايتىپ، اۋلەت قۇندىلىقتارىن ناسيحاتتاۋ. ءۇش اپتاعا سوزىلعان شىعارماشىلىق بايقاۋعا جۇزدەگەن ازامات قاتىستى ءتۇرلى ماماندىق يەلەرى، جاس ەرەكشەلىكتەرى دە ءارقيلى جانداردى توعىستىرعان وتباسى تاقىرىبى. ولار Facebook, VKontakte, Instagram, جەلىلەرىندە ەستەلىكتەر جازىپ، فوتولارىن جاريالادى. ەندى «جۇزدەن جۇيرىك» اتانعان اۆتورلاردىڭ دۇنيەلەرى «نۇر وتان» پارتياسىنىڭ سايتىنان ورىن تاپپاق.
بازاركۇل وتىنشيەۆا
«استانا» تەلەارناسى
