پۋتين ەۋروپا قالالارىن ەكى كۇندە باسىپ الماقشى

بۇل تۋرالى 18- قىركۇيەك كۇنى نەمىستىڭ Süddeutsche Zeitung باسىلىمى پوروشەنكو مەن ەۋرووداق باسشىلارىنىڭ اڭگىمەسى جازىلعان جازباعا سىلتەمە جاساپ جازدى، - دەپ حابارلايدى Deutsche Welle.

ەۋروپالىق سىرتقى ساياسات قىزمەتى كەلىسسوزدەرىنىڭ حاتتاماسىنا قاراعاندا، ۋكراينا پرەزيدەنتى بۇل تۋرالى ەۋروپالىق كوميسسيا ءتوراعاسى جوزە مانۋەل بارروزۋعا وتكەن جۇما كۇنى ونىڭ كيەۆكە ساپارى بارىسىندا ايتقان. پوروشەنكونىڭ ايتۋىنشا، پۋتين وعان سوزبە-ءسوز: «ەگەر مەن قالاسام، رەسەيلىك جاساقتار ەكى كۇن ىشىندە كيەۆتى عانا ەمەس، ريگانى، ۆيلنيۋستى، تالليندى، ۆارشاۆا مەن بۋحارەستى دە باسىپ الار ەدى»، - دەگەن.

نەمىس باسىلىمدارىنىڭ حابارلاۋىنشا، پۋتين پوروشەنكوعا «ەۋرووداققا كوپ يەك ارتپاۋعا» كەڭەس بەرگەن، سەبەبى ول «ەۋروپالىق كەڭەس دەڭگەيىندە قابىلداناتىن شەشىمگە ىقپال ەتىپ، وعان تىيىم سالا الادى».

حاتتاماعا قاراعاندا، پوروشەنكو پۋتيننىڭ ءسوزىن كرەمل باسشىسىنىڭ ەۋرووداقتىڭ رەسەيمەن كورشىلەس ەلدەرگە ىقپالىنا ەموتسيالىق تۇرعىدان قانشالىقتى قارسى تۇرا الاتىنىن كورسەتۋ ءۇشىن كەلتىرىپ وتىر.

بۇعان دەيىن ەۋروپادا جوزە مانۋەل بارروزۋ مەن ۆلاديمير پۋتيننىڭ تەلەفون ارقىلى اڭگىمەلەسكەنى كوپشىلىكتى ەلەڭ ەتكىزگەن ەدى. پۋتين ول كەزدە: «مەن قالاسام، كيەۆتى ەكى اپتا ىشىندە الار ەدىم» دەگەن-مىس. تامىز ايىنىڭ سوڭىندا بارروزۋ بۇل اڭگىمەنىڭ مازمۇنىن ەۋروپا ەلدەرى جەتەكشىلەرى مەن ولاردىڭ ۇكىمەت باسشىلارىنا جاريا ەتتى. كرەمل بارروزۋدى جەكە اڭگىمەنى كوپشىلىككە جاريا قىلدى دەپ ايىپتادى.

ايتا كەتەيىك، قىركۇيەك ايىنىڭ باسىندا ۋكراينا پرەزيدەنتى BBC تەلەارناسىنا بەرگەن سۇحباتىندا رەسەي ارمياسىنىڭ كيەۆتى عانا ەمەس، ەۋروپانىڭ باسقا دا قالالارىن باسىپ الا الاتىنىن ايتقان بولاتىن. «رەسەي ارمياسى - 1,2 ميلليون ادام. بۇل قيسىنعا قاراعاندا، ەگەر بۇكىل الەم ۋكراينامەن ءوز ىنتىماقتاستىعى بويىنشا بىرىگە الماسا، رەسەي «كيەۆتى الا الادى»، رەسەي ۆارشاۆانى، ۆيلنيۋستى، ريگانى، بۋحارەستى، باسقا دا كەز كەلگەن قالانى باسىپ الا الادى»، - دەگەن بولاتىن پوروشەنكو باعدارلاما جۇرگىزۋشىسى HARDTalk-قا.

Tengrinews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى