سولتۇستىك قازاقستان وبلىستىق سوتىندا تاڭقالارلىق مالىمدەمە جاسالدى
ول سوتقا بەرگەن جاۋابىندا تەرگەۋشىلەردىڭ «جالدامالى جانالعىش وبەكتىنى شاتاستىرىپ الدى» دەگەن اقپارىن جوققا شىعاردى. بۇل تۋرالى egemen.kz ءتىلشىسى حابارلادى.
بىلتىر 24- جەلتوقساندا سولتۇستىك قازاقستان وبلىستىق قارجى پوليتسياسى باسشىسىنىڭ ءبىرىنشى ورىنباسارى جاندوس احمەتوۆ كىسى قولىنان قازا تاپقان ەدى. ىمىرت ۇيىرىلە 11 جاستاعى ۇلىمەن ۇيىنە ورالعان ونى بەلگىسىز بىرەۋ دالىزدە اتىپ ولتىرگەن بولاتىن.
ب ا ق وكىلدەرىمەن وتكىزگەن بريفينگتە وبلىس پروكۋرورىنىڭ ورىنباسارى بىرلىك ءتاشىموۆ بۇل ماسەلەگە قاتىستى قىسقاشا تۇسىنىكتەمە بەرگەن. ونىڭ ايتۋىنشا، قولدارىنا كىسەن سالىنعان ءۇش قىلمىسكەردىڭ ەكەۋى رەسەي، بىرەۋى قازاقستان ازاماتى بولعان. ولارعا كىسى ءولتىرۋ، قاستاندىق جاساۋ، قارۋدى زاڭسىز جاساۋ جانە پايدالانۋ ايىپتارى تاعىلعان. ول ىشكى ىستەر سالاسى تەرگەۋشىلەرىنىڭ دەرەكتەرىنە سىلتەمە جاساي وتىرىپ، رەسەي ازاماتى بولعاندىقتان، قاستاندىققا ءاۋ باستا وبلىستىق قارجى پوليتسياسى باسقارماسىنىڭ باسشىسى نىسانا ەتىپ الىنعانىن جەتكىزگەن.
سوتقا باستى زارداپ شەگۋشىلەردىڭ ءبىرى رەتىندە شاقىرىلعان وبلىستىق قارجى باسقارماسىنىڭ بۇرىنعى جەتەكشىسى نۇرلان شابدار كيللەردىڭ وبەكتىنى شاتاستىرىپ الدى دەگەن تەرگەۋشىلەردىڭ ۋاجىنە كۇدىك كەلتىرگەن ەدى.
سوتتا پ. كوۆاليەۆتىڭ وبەكتىنى شاتاستىرماعانىن، ج. احمەتوۆتى ءولتىرۋ تاپسىرماسىن ءوزىنىڭ جەرلەسى ابۋلەدير جامالديەۆتەن العانىن مالىمدەدى. ال جامالديەۆ سوتقا بەرگەن تۇسىنىگىندە پ. كوۆاليەۆتىڭ كۋالىگىن راستايتىنىن، قاراۋىلعا ءاۋ باستا قارجى پوليتسياسى باسقارماسىنىڭ باسشىسى نىسانا ەتىپ الىنعان دەگەن جورامالدى ىشكى ىستەر مينيسترلىگىنىڭ تەرگەۋشىلەرى كۇشتەپ تانعانىن، تەلەفون ارقىلى اناسىمەن سويلەسكەننەن كەيىن بار شىندىقتى ايتۋعا توقتالعانىن جەتكىزدى. ول كىسى ولتىرۋگە تاپسىرىس بەرۋشىلەردىڭ ءبىرى ماسكەۋدە تۇراتىنىن، وزىنە تۋىسقاندىق قارىم-قاتىناسى بارىن دا جاسىرمادى. قارۋدى قازاقستاندىق ازامات ب. حۋكيەۆ تاۋىپ بەرگەن.
ج. احمەتوۆتى 23- جەلتوقساندا ءولتىرۋ جوسپارلانعانىمەن، الدەكىمدەر كەدەرگى جاساعاندىقتان، قاستاندىق ەرتەڭىنە جۇزەگە اسقان.
ءومىر ەسقالي
