وڭتۇستىك ءوڭىر جاستارىنىڭ زياتكەرلىك بال كەشى ءوتتى - كەسكىن
ول جاستاردىڭ بويىندا جوعارى دەڭگەيلى مادەنيەتتىلىك پەن ىزگىلىكتى دامىتۋ ماقساتىندا جانە جاڭا وقۋ جىلىندا 1- كۋرس ستۋدەنتتەرىنىڭ قۇرمەتىنە ۇيىمداستىرىلعان.
اتالمىش ءىس-شارا بيىل «وڭتۇستىك بالى» زياتكەرلىك بال كەشى اتاۋىمەن ەرەكشەلەندى. بالعا قاتىسۋشىلار قازاق جاستارىن ەل بىرلىگىنە، ەل يگىلىگىنە سۇبەلى ۇلەس قوسۋعا شاقىردى. وڭتۇستىك ءوڭىر جاستارى وسىناۋ شارانى «ءبىز دۇنيە جۇزىندەگى بەيبىتشىلىكتى قولدايمىز!» دەگەن جالىندى ۇرانمەن ۇيىمداستىرىپ وتىرعاندارىن جەتكىزىپ، الەمدە ورىن الىپ وتىرعان قاقتىعىستارعا قاراماستان، جەر بەتىندەگى ءار ادامنىڭ بەيبىت زاماندا ءومىر سۇرۋگە لايىق ەكەنىن پاش ەتۋگە تىرىستى.
وبلىستىق زياتكەرلىك بالىنا جالپى اۋدان، قالالىق ىرىكتەۋ كەزەڭىنەن وتكەن 32 جۇپ قاتىسىپ، ءوز ونەرلەرىن كورسەتتى. ول قالاداعى جوعارى جانە ورتا ارناۋلى وقۋ ورىندارىنىڭ 1- كۋرس ستۋدەنتتەرىن قۇتتىقتاۋ راسىمىمەن جانە وبلىس ونەرپازدارىنىڭ مەرەكەلىك كونسەرتتىك باعدارلاماسىمەن جالعاستى.
اتالمىش شارا اياسىندا الەۋمەتتىك جەلىلەردە قاتىسۋشىلاردىڭ فوتوسۋرەتتەرىنە كونكۋرس جاريالانعان بولاتىن. ونىڭ قورىتىندىسى بويىنشا 17- قىركۇيەك كۇنى 1329 داۋىس جيناعان شىمكەنت قالاسىنىڭ جاستارى ابزال جانبوسىنوۆ پەن ايدا ناقىپبەكوۆا «ۇزدىك جۇپ» بولىپ تانىلدى. سونىمەن قاتار ارنايى حورەوگراف مامانداردان قۇرىلعان ءادىلقازىلار القاسىنىڭ شەشىمىمەن كەشتىڭ «حانزاداسى» مۇحامەتجانوۆ مۇرات، ال «حانشايىمى» گۋريانوۆا كارينا بولدى. جەڭىمپازدارعا «فرانسۋز ءۇيىنىڭ» اتىرىنە سەرتيفيكاتتار تابىستالدى، دەلىنگەن و ق و اكىمدىگىنىڭ رەسمي سايتىندا.
