قانات يسلام الداعى جەكپە-جەگىنە دايىندىق جۇمىستارىن الماتىدا جالعاستىرۋى مۇمكىن
«اكادەميا كەرەمەت جەردە ورنالاسقان. اينالا تاۋ، كولىك از. قۇلاق تىنىش. جەكپە-جەكتەرگە دايىندالۋعا بارلىق مۇمكىندىك قاراستىرىلعان. سوندىقتان، وقۋ-جاتتىعۋ جيىنىن وسى جەردە وتكىزسەم دەگەن ويدامىن. ونى وسى اكادەميا باسشىلارىمەن كەزدەسىپ شەشۋىمىز كەرەك»، - دەدى قانات يسلام.
سونىمەن قاتار، قانات «استانا» پرەزيدەنتىتك كاسىپقوي سپورت كلۋبىمەن دە كەلىسىم-شارت جاساسۋى ىقتيمال. ول بۇل ماسەلەنىڭ الداعى ءبىر-ەكى اپتادا شەشىلىپ قالاۋى مۇمكىن ەكەندىگىن جەتكىزدى. سونداي-اق قانات حالىقارالىق اۋەسقوي بوكس قاۋىمداستىعىنىڭ پرەزيدەنتى چينگ-كۋو بۋ مىرزانىڭ ونى جاڭا AIBA Professional Boxing APB جوباسىنا قاتىسۋعا شاقىرعانىن ءمالىم ەتتى.
«بۋ مىرزا كەل دەپ جاتىر. وتكەن جىلى الەم بىرىنشىلىگىنە كەلگەن كەزدە شاقىرعان. ول كىسىنىڭ ءىلتيپاتىنا، قۇرمەتىنە العىسىم شەكسىز. مەن اۋەسقوي بوكستا كوپ ءجۇردىم. شاقىرىپ جاتقاندارىنا راحمەت. مۇمكىندىك بولسا، اللا بۇيىرتسا، الداعى كۇندەرى كورە جاتارمىز. دەگەنمەن، مەنىڭ قازىرگى تاڭداۋىم - كاسىپقوي بوكس. مەن كاسىپقوي بوكسقا اۋىسقان سوڭعى ەكى جىلدان بەرى ءبىراز جۇمىستار اتقارىلدى. قۇدايعا شۇكىر، حالقىم «باسىنا كوتەرىپ» جاتىر. راحمەت! قازىر مەن ءبىر ۇلكەن ورتادا ءجۇرىپ جاتىرمىن. بۇرىن ىستەمەگەن جۇمىس. ەندى ءبىز دە بايقاپ كورەلىك. مەن قاي بوكستا جۇرسەم دە كوك تۋدى كوتەرىپ، ەل نامىسىن قورعاپ جۇرگەنىمە قۋانىشتىمىن»، - دەدى قانات يسلام.
قاناتتىڭ كەزەكتى جەكپە-جەگى الداعى قازان ايىنىڭ 30 نا جوسپارلانعان. ەندى بىرنەشە كۇننىڭ ىشىندە قارسىلاسىنىڭ دا اتى-ءجونى بەلگىلى بولادى.
ەستەرىڭىزگە سالا كەتەلىك، قانات يسلام قازىر WBA (حالىقارالىق كاسىپقوي بوكس قاۋىمداستىعى) رەيتينگىندە جەتىنشى ورىندا تۇر. كاسىپقوي رينگتە 18 جەكپە-جەك وتكىزىپ، بارلىعىندا جەڭىسكە جەتكەن. WBA FedeCaribe تۇجىرىمىنىڭ چەمپيونى. ا ق ش-تىڭ فلوريدا شتاتىنىڭ پاحوكي قالاسىندا پروموۋتەر ءارى باپكەر نەلسون لوپەستىڭ كلۋبىندا جاتتىعادى. قاناتتىڭ ايتۋىنشا، الداعى ءبىر جەكپە-جەكتەن كەيىن 2015-جىلى چەمپيوندىق اتاققا تالاسۋى مۇمكىن. قازىرگى تاڭدا اتالمىش نۇسقا بويىنشا ءبىرىنشى جارتىلاي سالماقتا الەم چەمپيونى - امەريكالىق بوكسشى فلويد مەيۆەزەر ەكەنى بەلگىلى.
ال بۇكىل الەمدىك بوكس اكادەمياسىنىڭ بوكسشىلارعا ەسىگى اشىق.
اكادەميا ەكولوگيالىق تازا ايماقتا ورنالاسقان. جالپى اۋماعى 5 گەكتارعا جۋىق. عيماراتتاردىڭ جالپى اۋدانى 29000 شارشى مەتردى قۇرايدى. اكادەميا ەكى كورپۋستان تۇرادى. ونىڭ ءبىرى - ەكى ورىندى جانە جارتىلاي ليۋكستىك بولمەلەرى بار قوناق ءۇي. ول ءبىر مەزەتتە 176 ادامدى قابىلداي الادى. ەكىنشى سپورتتىق كورپۋستا 210 جانە 150 ورىندىق كونفەرەنتس- زالدار، 45 جانە 65 ادامعا شاقتالعان وقۋ سىنىپتارى، ەكى جاتتىعۋ رينگى، ءبىر وليمپيالىق رينگ، ايەلدەرگە جانە ەرلەرگە ارنالعان ساۋنالارى بار 25 مەترلىك باسسەين، حالىقارالىق ستاندارتقا ساي فۋتبول الاڭى، ۆولەيبول جانە باسكەتبول الاڭدارى، تەننيس كورتى، 40 ورىندىق كافە، 150 ورىندىق اسحانا جانە قازىرگى زامانعى جابدىقتارمەن قامتاماسىز ەتىلگەن مەديتسينالىق ساۋىقتىرۋ ورتالىعى جۇمىس ىستەيدى.
اۆتور: جاپپاربەرگەن ايبوتا
