قايرات نۇرتاستىڭ «اۋىرمايدى جۇرەك» ءانىنىڭ ءسوزى قالاي جازىلدى؟ - كەسكىن
2011-جىلى «ەلارنا» تەلەارناسى ۇيىمداستىرعان «ساز الەمى» جوباسىندا «جىل ءانى» اتاعىن جەڭىپ العان «اۋىرمايدى جۇرەك» ءانىنىڭ ءسوزىن ولجاس وتار، ءانىن باۋىرجان ەسەبايەۆ جازعان. جالپى، ەكەۋىنىڭ شىعارماشىلىق وداعىنان باسقا دا تانىمال اندەر بار. ماسەلەن، سايات مەدەۋوۆتىڭ ورىنداۋىنداعى «كورىسكەنشە مەنىڭ، اياۋلىم» ءانىن دە وسى ەكەۋى جازعان ەكەن.
«ءان جازىلار الدىندا دوسىم باۋىرجان ەسەبايەۆ تارازعا كەلىپ، ەكەۋمىز بيليارد ويناۋعا باردىق. ەكەۋمىز دە بيلياردتى ۇناتامىز، بەس ساعاتتاي ىشىندە ويناپ تاستاپپىز. ودان كەيىن ونەر، ولەڭ تۋراسىندا اڭگىمەلەستىك. ءسوز اراسىندا ول جاقىندا ءبىر ءان جازعانىن ايتىپ، اۋەندى تىڭداتتى.
ءاندى ءبىر تىڭداعان سوڭ، وعان بىردەن ولەڭ شىعارا سالۋ تابيعاتىمدا جوق. سوندىقتان قايتا-قايتا تىڭداي بەردىم. كوپ ۇزاماي «اۋىرمايدى جۇرەكتى» جازدىق. كەيىننەن ءاندى باۋىرجاننان قايرات نۇرتاس الىپ، تىڭدارمانعا جەتكىزدى. مەن ونى وسىنشالىقتى تانىمال بولادى دەپ ويلاماپ ەدىم» - دەيدى و. وتار.
بۇل از دەسەك، بۇگىنگى تاڭدا «اۋىرمايدى جۇرەك» ءانى قىرعىزستان، تاجىكستان، مونعوليا، تۇركيا، قىتاي مەملەكەتتەرىن شارلاپ، اۋەزدىلىگىمەن تالاي جاننىڭ قۇلاق قۇرىشىن قاندىرىپ ءجۇر.
«بىرىككەن اراب امىرلىكتەرىنەن ارابشاعا، ا ق ش-تان اعىلشىن تىلىنە اۋدارىپ بەرسەڭىزدەر دەگەن ۇسىنىس ءتۇستى. ءبىزدىڭ اۋلەتتە انامنان باستاپ ءبارى اعىلشىن، تۇرىك، اراب تىلدەرىنە ساۋاتتى. ماتىنمەن جۇمىس ىستەپ جاتىرمىز»، - دەيدى اقىن.
و. وتار اقىننىڭ كوبىنەسە ءانشىنىڭ تاساسىندا، قالتارىستا قالىپ قوياتىنى تۋرالى دا ايتىپ ءوتتى. «مۇنداي جايتتار كەزدەسىپ جاتادى. كونسەرتتەردە اقىننىڭ اتى اتالماي، تەلەديداردىڭ تيترلارىندا قاتەلىكتەر كەتىپ جاتاتىنىن وزگە ارىپتەستەرىم دە ايتىپ قالادى. وعان جۋرناليستەر قاۋىمىنىڭ قوساتىن «ۇلەسى» دە جوق ەمەس.
سوزىمە دالەل بولۋ ءۇشىن ايتايىن، «ساز الەمىنىڭ» ماراپاتتاۋ سالتاناتىنان كەلە جاتقان جولدا پويىزدا شوۋ-بيزنەس تۋرالى ءبىر جۋرنال ساتىپ الدىم. «اۋىرمايدى جۇرەكتىڭ» «جىل ءانىن» جەڭىپ العانى جازىلىپتى. الايدا، ءوزىمنىڭ اتى-ءجونىمدى تابا المادىم»، - دەيدى ول.
سونىمەن، قازىرگى ۋاقىتتا قارجى مينيسترلىگىنىڭ سالىق كوميتەتىندە باس ساراپشى بولىپ قىزمەت اتقاراتىن اقىن ولجاس وتار - ەرنار ايداردىڭ ورىنداۋىنداعى «اقتاماق»، «ۇمىتتىڭ با؟»، «قاناتىڭنىڭ ءتۇسى» اندەرىنىڭ، جۇلدىزاي دۇيسەنبيەۆا ايتاتىن «اعا»، «بالالىق»، قايرات نۇرتاس پەن عاني ماتەبايەۆ شىرقاپ جۇرگەن «جىلدار مەن جولدار» اتتى اندەردىڭ ءانى مەن ءسوزىن شىعارعانىن ايتا كەتۋ كەرەك. جامبىل وبلىسى، تالاس اۋدانىندا تۋعان اقىننىڭ ءبىر كەزدە ايتىس اقىنى رەتىندە دە باعى جانعان جىلدارى بولعان ەكەن.
ال بۇگىنگى تاڭداعى تانىمال كومپوزيتورلاردىڭ ءبىرى باۋىرجان ەسەبايەۆتىڭ دا «ارمان»، «تاڭعى ەلەس» سىندى حيت بولعان شىعارمالارى مەن «مونشاقتىم»، «ءاليا»، «جەتىمدەر»، «اقساۋلە»، «اداسقان مەنىڭ مارالىم»، «جارىعىم، اي» سياقتى تانىمال اندەرى بار.
ايناش ەسالي
