ەۋرازيا ۇلتتىق ۋنيۆەرسيتەتى كوكپارشىلار دايارلاۋدى قولعا الماق
وتىرىستا قارالعان باستى ماسەلە - ەۋرازيا ۇلتتىق ۋنيۆەرسيتەتىنىڭ قابىرعاسىنان ۇلتتىق سپورت تۇرلەرى بولىمشەسىن اشىپ، بولاشاق ماماندار دايىنداۋ. اتالعان بولىمشە ۇلتتىق سپورتتىڭ بارلىق تۇرلەرىن دامىتۋعا اتسالىساتىن بولادى. ايتالىق، بۇگىنگى تاڭدا ۇمىتىلىپ بارا جاتقان قولونەر شەبەرلەرىن دايىنداۋ، توعىزقۇمالاق سپورتشىلارىن تاربيەلەۋ، قۇسبەگىلىكتى دارىپتەۋ، قازاقى قۇماي تازى باپتاۋدىڭ قىرى مەن سىرىنا ۇيرەتۋ نەگىزگى نازارعا الىنادى.
سونىمەن قاتار كوكپارشىلار دايىنداۋ، تۇيەپالۋان ءداستۇرىن دۇنيەگە پاش ەتۋ، ۇلتتىق سپورتتىڭ وزگە دە تۇرلەرىنەن وقۋشىلار تاربيەلەپ، بولاشاق ماماندارىن جەتىلدىرىپ شىعارۋ كوزدەلمەك، دەپ حابارلايدى ق ر ۇلتتىق سپورت تۇرلەرى قاۋىمداستىعىنان.
«بۇگىنگى تاڭدا ۇلتتىق سپورتتىڭ قىر-سىرىن بىلەتىن مامانداردىڭ دەرلىگى جاسى ەگدە تارتقاندار. وسى تۇرعىدان كەلگەندە، وزەكتى ماسەلە - جاس ماماندار، تورەشىلەر دايىنداۋ بولىپ تابىلادى. ونىڭ ۇستىنە، قازىرگى تاڭدا قاراپايىم اۋىل جۇرتىنىڭ ساناسىندا جوعارى وقۋ ورنى باي-باعلاننىڭ بالاسىنا بۇيىرعان دەگەن تۇسىنىك بار. ءبىزدىڭ ماقساتىمىز - اۋىلدا وسكەن، ات قۇلاعىندا ويناپ، كوكپار تارتىپ، اساۋ ۇيرەتكەن قازاقتىڭ قارادومالاق بالاسىن وقۋعا تارتۋ، مامان رەتىندە تاربيەلەۋ. سونىمەن بىرگە ولاردىڭ اقىسىز وقۋىنا جاعداي جاساۋ، مەملەكەتتەن ارنايى گرانت تاعايىنداۋعا مۇرىندىق بولۋ»، - دەيدى مەملەكەتتىك جاتتىقتىرۋشى ر. ساتتىبايەۆ.
