الماتىدا بوكس اكادەمياسى اشىلدى
اكادەميا الماتىنىڭ ماڭىنداعى ىلە الاتاۋىنىڭ بويىندا، ەكولوگيالىق تازا ايماقتا ورنالاسقان.
اكادەميانىڭ اشىلۋ سالتاناتىنا ق ر مادەنيەت جانە سپورت ءمينيسترى ارىستانبەك مۇحامەدي ۇلى، AIBA-نىڭ پرەزيەدەنتى چينگ كۋو ۆۋ، AIBA-نىڭ ۆيسە-پرەزيدەنتى تيمۋر ق ۇلىبايەۆ، قازاقستان بوكس فەدەراتسياسىنىڭ ۆيتسە-پرەزيدەنتى سەرىك قوناقبايەۆ، وليمپيادا ويىندارىنىڭ چەمپيوندارى سەرىك ساپيەۆ، ەرماحان يبرايموۆ، مۇحيتتىڭ ارعى جاعىندا كاسىپقوي بوكستان ەل نامىسىن ابىرويمەن قورعاپ جۇرگەن قانات يسلام سىندى بەلگىلى ازاماتتار قاتىستى.
ءاۋ باستا اكادەميانى سالۋ قۇقىعىن كانادا مەملەكەتى ۇتىپ العان ەدى. ءبىراق، «ۇيەڭكى جاپىراق» ەلىنىڭ وكىلدەرى قارجىلىق قيىندىقتارعا بايلانىستى بۇل جوبادان باس تارتقان. كەيىن ەۋروپانىڭ بىرنەشە ەلدەرى ۇمىتكەر بولعان.
دەگەنمەن، AIBA سوڭىندا اكادەميانى سالۋ قۇقىعىن قازاقستانعا بەرگەن. ءسويتىپ، 2011 - جىلى AIBA مەن قازاقتان بوكس فەدەراتسيالارىنىڭ باسشىلارى رەسمي قۇجاتقا قول قويىپ، سول جىلدان باستاپ ەلىمىزدە بۇل عيماراتتىڭ قۇرىلىسى باستالعان.
جاڭا اكادەميا ەكى ۇلكەن عيماراتتان تۇرادى. كىرە بەرگەندەگى وڭ قاناتتاعى عيمارات 3 قاباتتان تۇرادى. بۇل جەردە قوناق ءۇي مەن اسحانا ورنالاسقان. قوناق ءۇي ءبىر مەزەتتە 160 ادامدى قابىلداي الادى.
ونىڭ ىشىندە 10 بولمە جارتىلاي ليۋكس. ول بولمەلەردە باپكەرلەر مەن قۇرامالاردىڭ جەتەكشىلەرى توقتايدى. ال، 76 بولمە ەكى ورىندىق. ەكى ورىندىق بولمەلەردە سپورتشىلار جاتادى. قوناق ۇيدە تالاپتارعا ساي تەلەديدار، تەلەفون، جەلدەتكەش جانە سىمسىز ينتەرنەت، شومىلاتىن بولمە بار.
كىرگەن بويداعى سول قاپتالدا ورنالاسقان عيمارات 4 قاباتتى.
بۇل جەردە نەگىزىنەن سپورت زالدار مەن جينالىس زالدارى بار. تارقاتىپ ايتاتىن بولساق بۇل عيماراتتىڭ 1-قاباتىندا 2 جاتتىعۋ رينگى مەن 500 كورەرمەنگە لايىقتالعان تاعى 1 رينگ بار. سونداي-اق بۇل قاباتتا ۇزىندىعى 25 مەتر، ەنى 8 مەتر، تەرەڭدىگى 2-2,5 مەتر، 4 جولاقتى ءجۇزۋ باسسەين مەن ەرلەرگە جانە ايەلدەرگە ارنالعان ساۋنا جۇمىس ىستەيدى.
ءبىرىنشى قاباتتىڭ باستى ەرەكشەلىگى مۇراجاي بولادى. دەگەنمەن ول ءالى ءوز جۇمىسىن باستاماعان. بۇل جەردە قازاقستان بوكسىنىڭ تاريحىندا التىن ارىپپەن جازىلعان بىلعارى قولعاپ شەبەرلەرىمىزدىڭ جۇلدەلەرى مەن ەلىمىزگە ەڭبەگى سىڭگەن جاتتىقتىرۋشىلاردىڭ جەتىستىكتەرى تۋرالى سىر شەرتەتىن كىتاپتار مەن ولاردىڭ جەكە زاتتارى تۇرادى.
ەكىنشى قاباتتا جاتتىعۋ بولمەسى بار. بۇل جەردە جاڭا زاماناۋي تەحنولوگيالارمەن جابدىقتالعان ەلەكتروندى جانە مەحانيكالىق زىلتەمىر، جۇگىرەتىن جولاقشا، فيزيكالىق جاتتىعۋ جاسايتىن قۇرىلعىلار بار. ودان بولەك ەكىنشى قاباتتا سپورتشىلاردىڭ دەنساۋلىعىن باقىلايتىن مەديتسينالىق بولمە ورنالاسقان. بىلىكتى سپورت دارىگەرلەرى بۇل جەردە سپورتشىلاردان دوپينگ تەست، فيزيوتەراپيا سىندى سىنامالارىن الىپ وتىرادى. سونىمەن قاتار ەكىنشى قاباتتا 250 ادامعا لايىقتالعان جينالىس زالى بار.
عيماراتتىڭ ءۇشىنشى قاباتىندا 35 جانە 65 ادامدىق وقۋ بولمەلەرى ورنالاسقان. سونىمەن قاتار 20 جانە 150 ادامدى ءبىر ۋاقىتتا قابىلداي الاتىن جينالىس بولمەسى بار. ودان بولەك ءۇشىنشى قاباتتا اكىمشىلىك بولمەلەر جۇمىس ىستەيدى.
ءتورتىنشى قاباتتىڭ قۇرىلىسى سوڭىنا دەيىن بىتپەپتى. دەگەنمەن، بىزگە بەلگىلى بولعانداي بۇل قاباتتا جوعارى لاۋازىمدى تۇلعالاردى قابىلدايتىن VIP بولمەلەر بولادى ەكەن.
ال، ەكى عيماراتتىڭ ماڭايىندا جۇگىرۋ جولاقتارى، فۋتبول، تەننيس جانە باسكەتبول الاڭدارى ورىن تەپكەن.
جالپى عيماراتتاردىڭ قۇرىلىس ايماعى 5 گەكتار جەردى الىپ جاتىر. ال، قۇرىلىستىڭ كولەمى 29000 شارشى مەتر. بۇل اكادەميانىڭ قۇرىلسىن تولىعىمەن قازاقستان بوكس فەدەراتسياسى قامتاماسىز ەتكەن. دەگەنمەن، قۇرىلىسقا قانشا اقشا كەتكەنى ەشكىمگە ايتىلماي، قۇپيا ساقتالۋدا.
ارىستانبەك مۇحامەدي ۇلى، ق ر مادەنيەت جانە سپورت ءمينيسترى:
- قۇرمەتتى سپورتشىلار، باپكەرلەر، جانكۇيەرلەر جانە بارشا بوكستىڭ ماڭايىندا جۇرگەن ماماندار، مەن سىزدەردى بۇگىنگى دۇنيەجۇزىلىك بوكس قاۋىمداستىعىنىڭ اكادەمياسىنىڭ رەسمي اشىلۋ سالتاناتىمەن شىن جۇرەكتەن قۇتتىقتايمىن. بارشاڭىزعا بەلگىلى، بوكس - قازاقستانداعى ەڭ دامىعان سپورتتىڭ ءبىر ءتۇرى بولىپ سانالادى. ونى ءبىزدىڭ بوكسشىلارىمىزدىڭ كورسەتكىشىنەن كورۋگە بولادى. جاڭا اكادەميادا جاڭا الەم جانە وليمپيادا ويىندارىنىڭ چەمپيوندارى تاربيەلەنىپ شىعادى دەگەن ويدامىن. سونداي-اق اكادەميانى سالۋدى الدىنا ماقسات ەتىپ، ونىڭ ورىنداعان، جالپى جوبانىڭ اۆتورى - تيمۋر اسقار ۇلى قۇلىبايەۆقا راقمەت ايتقىم كەلەدى.
چينگ كۋو ۆۋ، AIBA پرەزيدەنتى:
- قۇرمەتتى تيمۋر اسقار ۇلى، قۇرمەتتى مينيستر مىرزا جانە بوكستىڭ دامۋىنا ۇلەس قوسىپ جۇرگەن بارشا ازاماتتار، مەن سىزدەرگى بۇگىنگى AIBA اكادەمياسىنىڭ اشىلۋىمەن شىن جۇرەكتەن قۇتتىقتايمىن. 2006 - جىلى، مەن بۇل ۇيىمنىڭ پرەزيدەنتى بولعاندا الدىما اكادەميا اشۋ تۋرالى ءبىرىنشى كەزەكتە ويلادىم. الايدا، ول جوسپارىمدى بىرنەشە جىل بويى ورىنداي الماي كەلدىم. كەيىن، 2011 - جىلى ءبىز تيمۋر قۇلىبايەۆپەن بىرلەسە وتىرىپ، قازاقستاندا، ونىڭ ىشىندە الماتى اكادەميا اشۋ تۋرالى جوسپار قۇردىق. مىنە، بۇگىن بىرنەشە جىل بويى توككەن تەرىمىزدىڭ وتەۋىن كورىپ وتىرمىز. بۇل جەردە تەك اۋەسقوي بوكسشىلار عانا ەمەس، سونىمەن قاتار كاسىپقوي بوكسشىلار دا جاتتىعۋ جۇمىستارىن وتكىزۋگە مۇمكىندىك الادى.
قازىردىڭ وزىندە اكادەميادا ءبىر تۋرنير (قازاقستان، رەسەي، وزبەكستان، قىرعىزستان ايەلدەر قۇراماسىنىڭ جولداستىق كەزدەسۋى - اۆت) جانە ءبىر سەمينار ءوتىپ ۇلگەردى. ەندى كەلەشەكتە دە ءبىز باپكەرلەر مەن تورەشىلەردىڭ بىلىكتىلىگىن ارتتىرۋ ءۇشىن مۇندا كوپ جينالاتىن بولامىز.
سەرىك قوناقبايەۆ، قازاقستان بوكس فەدەراتسياسىنىڭ ۆيتسە-پرەزيدەنتى:
- ارمىسىزدار، قۇرمەتتى قوناقتار! سىزدەر مەن بىزدەر بۇگىن تاريحي ساتكە كۋا بولىپ وتىرمىز. ولاي دەيتىن سەبەبىم، مۇنداي اكادەميا جەر جۇزىندە مۇلدە جوق. قازاقستان بوكس فەدەراتسياسى AIBA-نىڭ بىزگە جاساعان ۇسىنىسىنا بىردەن كەلىسىپ، ءدال وسىنداي كەرەمەت عيماراتقا قول جەتكىزىپ وتىرمىز. مەن دە بوكسشى بولعانمىن. ءبىراق، مەن جاتتىعىپ جۇرگەن كەزدە مۇنداي جاعداي مۇلدە جوق ەدى. ءبىز كوبىنە تاۋدا، تاس لاقتىرىپ، تاۋعا ورمەلەپ دايىندالاتىنبىز. ال مۇندا جاتتىعۋ ءۇشىن زاماناۋي قۇرالداردىڭ بارلىعى دا بار. بۇل قازاقستانداعى بوكستى تاعى ءبىر قادام العا جىلجىتاتىن ۇلكەن مەرەكە دەپ بىلەمىن.
اۆتور: ۋاليحان قوسانباي
