سوعىسقا اتتانىپ بارا جاتقان قازاقستاندىقتارعا رەسمي ەسكەرتۋ جاسالادى
«لاڭكەستىك پەن ەكسترەميستىك قۇبىلىستىڭ الدىن الۋ ماقساتىندا شەتەلگە ەكسترەميستىك نەمەسە لاڭكەستىك ويمەن اتتانىپ بارا جاتقان قازاقستان ازاماتتارىنا ۇلتتىق قاۋىپسىزدىك ورگانىنداعىلار رەسمي تۇردە ەسكەرتۋ ايتسا دەيمىز. ارنايى وسىنداي قۇقىق بەرىلۋى كەرەك. ءبىز مۇنداي رەسمي ەسكەرتۋ قاندى قاقتىعىس بولىپ جاتقان جەرلەردە لاڭكەستەرمەن بىرگە سوعىسۋعا بەل بۋىپ، شەتەلگە كەتىپ جاتقان جەكەلەگەن ازاماتتارىمىزدىڭ قاراسىن كۇرت قىسقارتادى دەپ توپشىلايمىز» - دەدى ق ر پارلامەنتى سەناتىنىڭ كوميتەتىنە ەكسترەميزم مەن لاڭكەستىككە قارسى تۇرۋعا قاتىستى زاڭناماعا ەنگىزىلگەن وزگەرىستەر مەن تۇزەتۋلەر جوباسىن تانىستىرعان باس پروكۋروردىڭ ورىنباسارى اندرەي كراۆچەنكو.
«ءبىز مۇنداي ازاماتتارعا رەسمي ەسكەرتۋ جاساپ، ەلىمىزدە ولاردى قىلمىستىق جاۋاپكەرشىلىك كۇتىپ تۇرعانىن انىق ۇعىندىرۋىمىز كەرەك. وسىنداي الدىن الاۋ شاراسى قانى قىزۋ ازاماتتاردىڭ ءوز-وزىنە كەلۋىنە كومەكتەسەدى دەپ بولجايمىز» - دەيدى ول.
الدىندا بۇل زاڭ جوباسىندا «ۇلتتىق قاۋىپسىزدىك ورگانىندا ەكسترەميزمگە نەمەسە لاڭكەستىككە قاتىسى تۋرالى مالىمەتتەر بولسا ول تۇلعالاردى قازاقستان رەسپۋبليكاسىنا كىرگىزۋگە تىيىم سالاتىندىعى» حابارلانعان. كراۆچەنكونىڭ ايتۋىنا قاراعاندا، بۇگىندەرى قازاقستان تەرريتورياسىندا شەتەلدەگى ەكسترەميستىك نەمەسە لاڭكەستىك ۇيىمدارعا قاتىسى بار 70 كە جۋىق شەتەلدىك ازامات ارنايى قىزمەت ارقىلى جانە قۇقىق قورعاۋ ورگاندارىمەن انىقتالعان.
سونداي-اق، ۇسىنىلىپ وتىرعان وزگەرىستەر ايرىقشا سوت ءتارتىبى بويىنشا تەرريتوريالىق مارتەبەسىنە قاراماستان قانداي دا ءبىر ۇيىمداردى ەكسترەميستىك نەمەسە لاڭكەستىك دەپ تانۋىنا مۇمكىندىك بەرەدى. مۇنداي ىستەر بويىنشا سوت شەشىمى بىردەن جۇزەگە اسىرىلاتىن بولادى. قازىرگى ۋاقىتتا قازاقستاندا 15 ۇيىم لاڭكەستىك، بەس ۇيىم ەكسترەميستىك دەپ تانىلعان.
سول سەكىلدى اتالعان زاڭ جوباسىندا اقپاراتتىق ماتەريالداردى دا سوت تارتىبىمەن لاڭكەستىككە جاتقىزۋ قاراستىرىلعان جانە اقپاراتتىق ماتەريالداردى ەكسترەميستىك دەپ تانۋ قۇقىعى بار. بۇگىنگە دەيىن قازاقستاندا 611 ماتەريال ەكسترەميستىك بولىپ تانىلعان.
زاڭداعى تاعى ءبىر جاڭاشىلدىق - سوتپەن ەكسترەميستىك بولىپ تانىلعان ۇيىمداردىڭ مۇلىكتەرىن تاركىلەپ، مەملەكەت تابىسىنىڭ اينالىمىنا ەنگىزۋ. لاڭكەستىك قىلمىسپەن سوتتالعان نەمەسە وسى قىلمىس تۇرلەرى بويىنشا قۇقىق قورعاۋ ورگاندارىنىڭ نەمەسە ارنايى قىزمەتتىڭ نىساناسىنا ىلىنگەن بارلىق تۇلعالارعا قاتىستى قارجىلىق باقىلاۋ جۇرگىزۋدى قامتاماسىز ەتۋ جاعى دا بۇل قۇقىقتىق قۇجاتتا قاراستىرىلعان. «قازىر قىلمىستىق كودەكستىڭ ەكى قۇرامى عانا قارجىلىق باقىلاۋعا جاتقىزىلادى، ءبىراق قىلمىستىق كودەكستە لاڭكەستىك قىلمىس كوپ ايتىلادى. وعان جالدانىپ، جەكە تۇلعالارعا نەمەسە ۇيىمعا شابۋىلداۋشى، حالىقارالىق قۇقىقتى قالقان ەتىپ قازاقستان رەسپۋبليكاسى پرەزيدەنتىنىڭ ومىرىنە قاۋىپ تۋدىرۋشى، قاستاندىق جاساۋشى جانە تاعى باسقا دا كوپتەگەن قىلمىس تۇرلەرى جاتادى» - دەيدى كراۆچەنكو.
سونىمەن قاتار باس پروكۋراتۋرا جانىنداعى قۇقىقتىق ستاتيستيكا جانە ارنايى ەسەپ كوميتەتى سوتپەن ەكسترەميستىك نەمەسە لاڭكەستىك بولىپ تانىلعان ۇيىمداردىڭ، اقپاراتتىق ماتەريالداردىڭ ءبىرىڭعاي ءتىزىمىن ەنگىزۋ قۇقىعىن وزىنە بەرۋدى سۇراپ وتىر. ولار ونى ۆەدومستۆا سايتىندا جاريالاۋعا مۇددەلى.
اۆتور: رەنات تاشقىنبايەۆ
