استانادا قازاقستان مەن قىتاي مادەنيەتىنە ارنالعان سۋرەت كورمەسى وتەدى
شارانى «مۇرات جولى» مادەني-قوعامدىق بىرلەستىگى «وتانعا باستايتىن جول» اتتى جوبا نەگىزىندە ەكى ەل حالىقتارىنىڭ دوستىق جانە مادەني قارىم-قاتىناستارىنىڭ ودان ءارى دامۋىن دەمەۋ ماقساتىندا ۇيىمداستىرىپ وتىر. وعان وتانداس تالانتتى جاس سۋرەتشى، ونەر شەبەرلەرىنىڭ تىرناقالدى تۋىندىلارى قويىلادى. بۇل تۋرالى «مۇرات جولى» مادەني-قوعامدىق بىرلەستىگى حابارلاپ وتىر.
«قازاقستان رەسپۋبليكاسى مەن قىتاي حالىق رەسپۋبليكاسى بۇگىنگى تاڭدا اسا تاتۋ-ءتاتتى دوس ەلدەر. ەكى ەل باسشىلارىنىڭ كەلەلى كەلىسىمدەرىمەن ءبىزدىڭ ەلدە - ارقانىڭ توسىندەگى التىن كۇزدىڭ العاشقى ايىندا ەجەلگى كورشى قىتايدىڭ مادەنيەت كۇندەرى وتپەك. مەملەكەتتىك دەڭگەيدەگى مادەني ءىس-شارانىڭ وتۋىنە وراي، كورمەگە نەگىزىنەن مايلى بوياۋلى سۋرەتتەر، گرافيكالار، قولونەر تۋىندىلارى، فوتو تۋىندىلار قويىلادى»، دەلىنگەن حابارلامادا.
سونداي-اق قازاقتىڭ ءبىرتۋار كومپوزيتورى باقىتجان بايقاداموۆپەن ومىردە دە، ونەردە دە دوس بولىپ وتكەن، قىسقا عۇمىرىندا اسا قۇندى، مول مۇرا قالدىرعان قىتايدىڭ حالىق كومپازيتورى شيان شينحاي (Xian Xinghai) جايلى دەرەكتى فيلمنىڭ تۇساۋكەسەرى بولادى.
ۇيىمداستىرۋشىلاردىڭ اتاپ وتۋىنشە، كوپ ىزدەنىستەن تۋعان فيلمنىڭ باستى ەرەكشەلىگى - قازاقستاندا وتكەن قىتاي كومپوزيتورى تۋرالى دا، ءارى ەرتەدەگى ەكى ءىرى تۇلعانىڭ ەرەكشە دوستىعى تۋرالى دا تۇڭعىش تەلەفيلم دەرەككوزدىلىگىندە. «دەرەكتى فيلمدە كومپوزيتور شيان شينحايدىڭ بۇكىل سانالى عۇمىرىنىڭ بولىنبەس ءبىر بولشەگى بولعان قازاقستاندا وتكەن جاسىن جىلدارىمەن بىرگە، قوس قايراتكەردىڭ ەكى ەلدىڭ دوستىعىنا التىن ارقاۋ بولعان جاقىن جولداستىق جارقىن كەلبەتى كورسەتىلگەن»، دەلىنگەن حابارلامادا.
اۆتور: ءابۋ-اسقار مەكەش ۇلى
