شاكارىم تۋرالى تىڭ دەرەكتەر تابىلدى
جاقىندا اباي ادەبي- مەموريالدىق مۇراجايىنىڭ باسشىلىعى عىلىمي ىسساپارمەن ماسكەۋگە بارىپ، مۇراعاتتان شاكارىمنىڭ قولىنا بۇركىت ۇستاپ تۇسكەن فوتوسۋرەتىنىڭ ءتۇپنۇسقاسىن تاپقان.
بۇعان دەيىن مۇراجايدا سۋرەتتىڭ كومەسكى كوشىرمەسى عانا بولعان ەدى. سونىمەن قاتار شاكارىمنىڭ ءوزى ەكەنى تۋرالى ناقتى دەرەك تە جوق ەدى. ال ماسكەۋدە تابىلعان سۋرەتتىڭ سىرتىندا، ونىڭ 1927 - جىلى تۇسىرىلگەنى جانە ونداعى ادامنىڭ شاكارىم ەكەنى جازىلعان. فوتوسۋرەتتى ورىس زەرتتەۋشىسى فيدور فيەلسترۋپ راسىمگە العان ەكەن.
مۇراجاي قىزمەتكەرلەرى وسى ساپارىندا ۇلى ابايدىڭ شاكىرتى، بەلگىلى اقىن تۇرعان اۋىلدىڭ دا 30 شاقتى سۋرەتىن الا كەلىپتى. زەرتتەۋ بارىسىندا فيەلسترۋپتىڭ قازاق اقىنىمەن كەزدەسۋى جانە ونىڭ ءوز اۋزىنان ەستىگەن اڭگىمەلەرىنىڭ جازباسى دا تابىلدى. شاكارىم ورىس عالىمىنا قۇسبەگىلىك ونەرى مەن قازاق حالقىنىڭ سۇتتەن جاسالاتىن ۇلتتىق تاعامدارى تۋرالى بايانداپ بەرىپتى.
جاندوس اۋباكىر، اباي مۇراجايىنىڭ ديرەكتورى:
- بۇل ءبىزدىڭ ەلىمىز ءۇشىن اسا قۇندى. بۇعان دەيىن سۋرەتتى كىتاپتان كوشىرمە جاساپ العان بولساق، ەندى سۋرەتتىڭ ءتۇپنۇسقاسىن تاۋىپ وتىرمىز. ياعني بۇل ءبىزدىڭ ەلىمىز ءۇشىن، شاكارىم تانۋ، اباي تانۋ عىلىمى ءۇشىن ۇلكەن جاڭالىق دەپ ەسەپتەيمىن.
www.24.kz
