حالىقارالىق «جىبەك جولى» فەستيۆالىنە كورەرمەندەر ۇلكەن قىزىعۋشىلىق تانىتىپ وتىر

«استانا وپەرا» تەاترىنىڭ ديرەكتورى تولەگەن مۇحامەدجانوۆتىڭ سوزىنە قاراعاندا، تەاتر ساحناسىندا قازاقستان، يتاليا، فرانسيا، قىتاي، رەسەي وپەرا جانە بالەت جۇلدىزدارى ونەر كورسەتەدى.

«كەيبىر سپەكتاكلدەرگە قازىرگى كەزدە بيلەتتەر جوق. ادامدار قويىلىمدارعا ۇلكەن قىزىعۋشىلىق تانىتىپ وتىر. فەستيۆالدىڭ باعدارلاماسى وتە قىزىق. الداعى جىلى وسى مادەني شاراعا قاتىسۋشى ۇجىمداردىڭ سانى ارتا تۇسەدى دەگەن ويدامىن. وسى ورايدا 2015-جىلى بۇدان باسقا دا مەملەكەتتەردەن ارتىستەر كەلەدى دەپ پايىمداپ وتىرمىز»، - دەدى ول.

ت. مۇحامەدجانوۆتىڭ ايتۋىنشا، فەستيۆال اياسىندا بيبىگۇل تولەگەنوۆانىڭ «ءسۇيۋ، ۇمىتتەنۋ جانە سەنۋ» اتتى بەنەفيسى ك س ر و حالىق ءارتىسىنىڭ 85 جىلدىق مەرەيتويىنا وراي 30- قىركۇيەككە بەلگىلەنىپ وتىر.

م. تولەبايەۆتىڭ «ءبىرجان-سارا» وپەراسى قازاقستان جانە رەسەي ارتىستەرىنىڭ قاتىسۋىمەن 20- قىركۇيەكتە قويىلادى.

سونىمەن قاتار ۇلتتىق قىتاي تەاترى 25- قىركۇيەكتە قىتايدىڭ بىرەگەي ۇلتتىق مادەنيەتىن، وپەرا جانە بالەت ونەرىن كورسەتىپ، حالىق اندەرى مەن بي قويىلىمدارىنان تۇراتىن كونسەرت ۇسىنادى.

بۇدان بولەك، «رومەو مەن دجۋلەتتا» بالەتىن 19 قىركۇيەكتە كورۋگە بولادى. رومەو رولىنە رومان ميحاليەۆ (فرانسيا) شاقىرتىلسا، دجۋلەتتانى ءمادينا باسپايەۆا سومدايدى.

«سپارتاك» بالەتىن كورەرمەن 23- قىركۇيەكتە تاماشالاي الادى. باس پارتيانى «استانا وپەرا» بالەتىنىڭ ءسوليسى ادامجان باقتيار، فريگيانى ق ر ەڭبەك سىڭىرگەن قايراتكەرى ءمادينا باسپايەۆا ورىنداسا، ەگينا پارتياسىن ۇلكەن تەاتردىڭ پريما بالەريناسى ەكاتەرينا شيپۋلينا (رەسەي)، سونداي-اق كراس پارتياسىن ۇلكەن تەتاتردىڭ پرەمەرى الەكساندر ۆولچكوۆ سومدايدى.

ايتا كەتەيىك، «استانا وپەرا» العاشقى «جىبەك جولى» حالىقارالىق فەستيۆالىن وتكىزەدى. استانا تۇرعىندارى مەن قوناقتارى ونەر مەرەكەسىن 17- قىركۇيەك پەن 6- قازان ارالىعىندا تاماشالاي الادى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى